ساڈا خطہ بڑا مردم خیز اے

مطلوب ورائچ

ایہ ٹھیک سگوں پکی پیڈی حقیقت اے کہ ستاروں سے آگے جہاں اور بھی ہیں پر ستاریاں تک اپڑن لی وی اک عزم تے ارادے دے نال جہد مسلسل دی وی ضرورت اے۔ انج کرن والے اپنے آپ نوں پاکستان وچ تے پاکستان توں باہر جا کے ستاریاں تے کمند پان والے کئی نابغہ روزگار مل جان گے۔ پیاری دھرتی مردم سازی وچ ہمیشہ توں زرخیز رہی اے۔ علامہ نے کہیا سی:
ذرا نم ہو تو یہ مٹی بڑی زرخیز ہے ساقی
ایہدی سجری مثال میاں چنوں نال تعلق رکھن والا اک نوجوان حمزہ یوسف اے جہدے والدین برطانیہ جا وسے سن۔ ایہ خاندان بڑی مضبوطی دے نال اپنے کلچر تے روایات دے نال جڑیا ہویا اے۔ حمزہ یوسف نے نائن الیون دے مسلماناں دے خلاف عالمی سطح تے نفرت پھیلان والیاں نوں جواب دین لئی سیاست وچ حصہ لین دا فیصلہ کیتا تے کامیابی دیاں پوڑھیاں بڑیاں تیزی نال چڑھیاں۔ اوہ اج سیاست وچ کامیابی پاروں سکاٹ لینڈ دا فرسٹ منسٹر بن گیا کیوں جے سکاٹ لینڈ اجے برطانیہ دے زیراثر اے ایس لئی ایہدے فرسٹ منسٹر دے کول وزیراعظم ورگے ای اختیارات ہوندے نیں۔ حمزہ یوسف نے حلف اٹھایا تے اوہدے دادا‘ دادی تے ماں باپ وی موجود سن۔ حمزہ یوسف نے آکھیا کہ اوہنوں پنجابی ہون تے مان اے۔ اوہدا تعلق بھٹہ جٹ خاندان نال اے۔ اوہنے انگلش دے بعد اپنی مادری زبان وچ وی حلف اٹھایا۔ ایس نوجوان نے محنت کیتی تے اوہدا پھل پایا۔
ساڈا خطہ مردم خیز اے۔ ایہدی اک توں ودھ کے اک مثال اے۔ اج دے برطانوی وزیراعظم رشی سونک دا تعلق وی ایسے خطے نال اے۔ اوہدے والدین گوجرانوالہ دے رہن والے نیں۔ اج امریکہ دی نایب صدر کمیلاہیرس وی ہندوستان نال تعلق رکھن والیاں نیں۔ برطانیہ میٹروپولیٹن دنیا دی وڈی پولیٹنز وچوں اے۔ ایس شہر توں کونسلر منتخب ہونا وی اعزاز اے۔ ایس شہر دا میئر ایم صادق اے اوہدا تعلق وی پاکستان نال اے۔ برطانیہ دی پہلی مسلمان خاتون وزیر بنن دا اعزاز وی پاکستان نال تعلق رکھن والی سعیدہ وارثی دے حصے وچ آیا۔ اوہ کنزرویٹو پارٹی دی سربراہ وی رہیاں نیں۔ نصرت غنی دوجی مسلم تے پاکستانی خاتون نیں جو برطانوی کابینہ وچ شامل ہوئیاں۔ ایہ سارے لوک تے ایہناں توں علاوہ وی بہت سارے بیرون ملک جا کے میرٹ تے ترقی دے عروج تے اپڑے۔ سیاست دے باہر وی پاکستانی بلندیاں تے نظر آندے نیں۔ پاکستان دے پہلے دو تن امیر ترین شخصیات وچ اک شاہد خان نیں اوہ امریکہ وچ رہندے نیں اوتھوں اوہناں نے محنت کرکے اک مقام بنایا اے۔ پاکستانیاں نوں وسیلے دستیاب ہون تے انج ای ترقی دے مرحلے طے کردے نظر آن۔ ساڈے ایتھے ٹیلنٹ دی کمی نہیں ایہنوں اجاگر کرن تے موقعے دین دی ضرورت اے۔
اج بھگت سنگھ تے رائے احمد خان کھرل جو ساڈی آزادی دے ہیرو نیں ایہناں دا خواب پورا ہو گیا۔ بھگت سنگھ نوں آزادی دی خاطر قید کٹنی پئی تے پھاہے لا دتا گیا۔ احمدخان کھرل نوں انگریز فوج نے مقابلے دوران شہید کر دتا سی۔ ایہناں دو شہیداں دے خواباں دی تعبیر اے کہ اج ایس خطے نال تعلق رکھن والے اکابر اوہناں ملکاں وچ حکمرانی کر رہے نیں جو کدی غاصب دی حیثیت نال ایس خطے تے قابض سن۔ آزادی دے ہیروز دیاں قربانیاں نال استعمار ایس خطے چوں نکل گیا پر اوہ ایس خطے دے لوکاں نوں اپنے اندروں نہیں کڈھ سکیا ایہو قوماں دا انتقام ہوندا اے۔ اک پاسے ساڈا تعلق مردم خیز خطے نال اے دوجے پاسے اسیں کجھ مفاد پرستاں دے مفادات دے ڈھائے چڑھ کے رسوا ہو رہے آں۔ اسیں زندہ قوم ہون دے دعویدار آں۔ اج حکمراناں نے زندہ قوم نوں آٹے دی قطاراں وچ لا دتا اے پاکستان زرعی ملک اے کنے شرم دی گل اے کہ زرعی ملک وچ کنک دی کمی ہو گئی۔ مینوں کجھ دن پہلاں سوئٹزرلینڈ تے جرمنی جانا پیا اوتھے پاکستان دی صورتحال بارے جانوں کئی گوریاں نے مینوں کہیا کہ جے سوئٹزرلینڈ وچ چاکلیٹ تے ددھ دی کمی ہو جاوے تے ایہ ساڈے لئی ڈب مرن دا مقام اے۔
دوستو! میں بچپن وچ اک مثال بزرگاں توں سنی سی کہ کبوتر بلی نوں ویکھ کے بے شک جنیاں مرضی اکھاں بند کر لوے پر اوہ بلی دیاں اکھاں بند نہیں کر سکدا تے دوستو ساڈے ملک دے سیاستداناں تے ساڈے رہنماواں دے حالات وی کجھ انج دے ای نیں۔ یعنی اوہناں نوں کوئی ایہ دسن والا ای شاید نہیں کہ اوہناں دے سارے کرتوت اج دے ایس ڈیجیٹل دور وچ ہر بندے تے واضح نیں۔ اسیں کوئی پندرھویں صدی وچ نہیں رہ رہے سگوں ایہ 2023ء دا زمانہ اے۔ دنیا ساڈے وطن وچ چلن والے ایس سیاسی کھلواڑ نوں اپنی عینک نال ویکھ رہی اے حالاں کہ عالمی میڈیا تے عالمی سیاست بشمول اقوام متحدہ تے ساڈے اتحادی عرب ممالک‘ ترکی تے چین وی ساڈے کرنٹ افیئرز تے نظر رکھے ہوئے نیں۔ مینوں یقین اے کہ ظلمت شب دی سویر ہون والی اے تے صبح دے سورج دی پہلی کرن میرے وطن دے لوکاں لئی خوشخبری لیان ای والی اے۔٭