روحانی رابطے

ڈاکٹر صغرا صدف

اسیں اکثر ویکھنے آں کہ لوک بظاہر گڈی چلا رہے ہوندے نیں کسے فٹ پاتھ یاں پارک وچ چل رہے ہوندے نیں‘ گھر‘ دفتر‘ بازار وچ کدھرے کوئی کم کر رہے ہوندے نیں تے نال نال گلاں وی کر رہے ہوندے نیں۔ اج توں پنجی تریہہ ورھے پہلاں کوئی انج کر رہیا ہوندا تے پاگل شمار ہوندا پر اج ایہ سب روٹین دا حصہ اے۔ ایہ سب اوہناں دے کن دے کول لگی اک چھوٹی جہی ڈیوائس تے گڈی دے ڈیش بورڈ‘ میز دی دراز‘ یاں جیب وچ رکھے موبائل فون دا مرہون منت اے جہدے راہیں اوہ ہزاراں میل دور کسے ہور براعظم وچ اپنے کسے دوست نال براہ راست گل بات کر رہے ہوندے نیں ذرا سوچو فون دی ایجاد توں پہلاں دا کوئی انسان پرت آوے تے ایہنوں کرامت قرار دیوے‘ ایہ سارے سگنلز دا کمال تے کرامت ای تے ہے۔ انسانی ذہن دی کارفرمائی اے‘ سائنسی فکر فطرت دیاں قوتاں نوں ہمنوا بنا کے خلاء وچ ہزاراں ٹن وزنی جہاز اڑاندی اے تے ہوا دی لہراں نوں تاراں بنا کے رابطے استوار کردی اے۔ موبائل نیٹ ورک وانگوں ای روحانی نیٹ ورک کم کردا اے۔ اوتھے کسے قسم دیاں ظاہری تاراں نہیں ہوندیاں‘ اندرونی سسٹم نمبر ملاندا تے رابطے ممکن کرواندا اے۔ روحانی فضیلت یاں اہلیت عبادت یاں ریاضت توں حاصل نہیں ہوندی۔ ریاضتاں نال صرف سسٹم دے نال تعلق مضبوط کیتا جاندا اے۔ جے سوکھے لفظاں وچ کہواں تے قدرت ولوں کجھ لوکاں نوں ایہ مخصوص پیکیج عنایت کر کے گھلیا جاندا اے اوہناں نوں صرف اوہنوں آن‘ آف کرنا تے فنکشنز سمجھنا ہوندے نیں۔ ویلے دے نال نال جیویں جیویں انسان دے اندر لطافت ودھدی جاندی اے تے نفس دیاں سلطنتاں مطیع ہوندیاں جاندیاں نیں ایہدا دائرہ کار ودھا دتا جاندا اے پر ایتھے وی اپ ایٹ کرن دا اختیار انسان دے کو ل رکھیا گیا اے۔ بھاویں ایہ روحانی لہراں اینیاں طاقتور ہوندیاں نیں کہ ہر حال وچ انسان دا دھیان اپنے ول کرا لیندیاں نیں پر فیر وی دنیاوی بکھیڑیاں تے مادی سرگرمیاں وچ الجھیا انسان جے اوہنوں مسلسل نظرانداز کردا رہوے تے ایہدے سگنلز تے ردعمل نہ دیوے تے فیر اوہدے تے بجلی بن کے ڈگدیاں نیں تے ایہدے وجود نال ساری کثافت تے رکاوٹاں ساڑ کے سواہ کر دیندیاں نیں۔ ایہ اک تکلیف دہ عمل اے پر سزا وچ جزا وی اے۔ قدرت دی مہربانی نوں عمل وچ لیان لئی نیٹ ورک نال جڑے رہنا ضروری ہوندا اے وجود دی عمارت تے نصب انٹینا دا رخ ٹھیک رکھنا وی مقصود اے تاں جے کسے ہور ایجنسی یاں طاقت دے سگنلز دی دخل اندازی نہ ہووے۔
جس طرح اج سائنسی ایجادات پاروں اسیں دنیا دے کسے وی ملک وچ رابطہ کر سکدے نیں۔ صوفی تے ولی وی اوسے طرح ہزاراں میل دور بیٹھے مرشد نال گل بات کردے سن۔ دوریش دے درجے تے فائز جدوں اپنے آپ نال گلاں کردے کردے دراڈے علاقیاں وچ رونما ہون والے حالات دی خبر دیندے سن تے گھٹ عقل اوہناں نوں دیوانہ کہندے سن بس ایہ سمجھ لوو صوفی دے کول جو موبائل اے اوہ نظر نہیں آندا‘ اوہنوں ہینڈ فری دی وی لوڑ نہیں ہوندی اوہ گھنٹوں گلاں کر سکدا اے ویڈیو کال دے راہیں مرشد دا دیدار کر سکدا اے تے اوہنوں اپنی بے تابی بارے وی دس سکدا اے۔ ایہدی رہنمائی حاصل کر سکدا اے پر ایہ دوطرفہ عمل اے۔ جس طرح کسے بندے نال گل کرن لئی اوہدا فون نمبر ڈائل کرنا ضروری ہوندا اے اوسے طرح ولی وی اک باطنی سسٹم نال جڑے ہوندے نیں۔ اوہناں نوں وی اجازت دی لوڑ ہوندی اے۔ اکثر اوقات مرید دی کوئی غلطی اوہنوں سسٹم توں باہر سٹ دیندی اے اوہدے رابطے گھٹ ہو جاندے نیں۔ مرشد دی نظر کرم وچ دوبارہ تھاں پان لئی اوہنوں گھنگرو بنھ کے رقص کرنا پیندا اے تے کدی سخت چلے کٹنے پیندے نیں۔ کدی کدی آزمائش طور تے روحانی ہستیاں نوں نیٹ ورک توں کجھ عرصے لئی بے دخل کر دتا جاندا اے کہ جدائی دا روگ جھلنا وی تربیت دا حصہ اے کیوں جے اوہنوں اپنی یکسوئی تے بھرویں دھیان نال اپنے نظام نوں چارج کرنا پیندا اے۔
اکثر پچھیا جاندا اے کہ روحانی رابطے کیویں کم کردے نیں تے سمجھ لوو کہ جس طرح انٹرنیٹ دے سگنلز دا راہ پدھرا ہووے تے سکرین تے ساری ٹریفک نسدی وکھائی دیندی اے اوسے طرح روحانی رابطے کم کردے نیں۔ بصارت‘ سماعت تے وجدان دے تن سگنلز وجود دے انٹینا تے ظاہر ہو رہے ہون تے اوہ کجھ وکھا‘ سنا دیندے نیں جہناں نال آل دوالے بیٹھے لوک بالکل بے خبر ہوندے نیں۔ سامنے بیٹھے بندے دے متھے تے اوہدی فطرت دا جوہر ہیڈلائن وانگوں چمکن لگدا اے بندہ کس راہ دا مسافر اے؟ اوہدی سوچ منفی اے یاں مثبت تے اوہ خیر دے پھیلائو وچ کس حد تک سرگرم اے۔ سب پتہ لگ جاندا اے زیادہ تفصیلاں دی لوڑ وی نہیں ہوندی تے نہ اوہدے بارے دسیا جاندا اے کہ ہر کسے دی پردہ داری قدرت نوں وی مقصود اے۔٭