’’جمہوریت بہترین انتقام ‘‘یاں ’’انتقام بہترین جمہوریت‘‘

مطلوب ورائچ

دوستو: اللہ تے اوہدے رسول محمدؐ ہوراں دے دسے ہوئے اصولاں د یمطابق انسانی زندگی دی تعمیر راہیں رضائے الٰہی دا حصول‘‘ ایہ اسلامی جمعیت طلباء دا اوہ سلوگن اے جہدی کشش نال راقم اسلامی جمعیت طلباء ول راغب ہویا تے فیر اوہدا ناظم تے کالج یونین دا صدر وی ایسے پلیٹ فارم توں منتخب ہویا پر اوس ویلے وی جماعت اسلامی طلباء دی حد تے اک مضبوط فلسفے دے نال موجود سی پر عملی زندگی وچ جماعت اسلامی دے روپ وچ اوہدی لیڈرشپ بذات خود کوئی مرکزی کردار ادا کرن وچ ہمیشہ نکام رہی تے ایہو وجہ اے کہ حافظ حسین احمد (مرحوم) ورگا امیر جماعت اسلامی نوں شاید فیر کدی نہیں ملیا۔ حافظ مرحوم صاحب اپنے وژن نال شباب ملی ورگے دوجے پراجیکٹ تے کم شروع کیتا سی تے عملی سیاست کرن والیاں لئی اک اٹریکشن تے پلیٹ فارم دتا سی۔ پر بدقسمتی نال لوکاں وچ جماعت اسلامی دا تصور مسلم لیگ(ن) دی بی ٹیم توں ودھ پذیرائی حاصل نہ کر سکیا۔ ایہو وجہ اے کہ اج جماعت اسلامی اپنے سنہرے افکار تے روشن منشور دے باوجود اک تریجے درجے دی پارٹی بن کے رہ گئی اے۔
پاکستان وچ پارٹیاں دے تغیرات دی اک تریخ اے۔ اج جے کوئی پارٹی پاکستان دی سب توں وڈی پارٹی اے تے کل ہو سکدا اے کہ اوہ دوجے یاں تریجے نمبر تے چلی جاوے۔ ماضی قریب وچ پیپلزپارٹی پاکستان دی سب توں وڈی پارٹی ہوندی سی۔ مسلم لیگ (ن) اوہ وی کدی پیپلزپارٹی توں اگے کدی پچھے چلی جاندی پر اج تک 2018ء وچ ہون والے انتخابات دے بعدوں تحریک انصاف نوں پاکستان دی سب توں وڈی پارٹی سمجھیا جاندا اے پر جے اگلے انتخابات ہون کوئی ہور پارٹی اوہدی تھاں لے لوے پر اک پارٹی جو مستحکم تے مستقل بنیاداں تے اک ای تھاں کھڑی اے اوہ اے جماعت اسلامی۔ اوہ کدی پاکستان دی سب توں وڈی پارٹی نہیں رہی تے نہ ای اوہ پاکستان دی سب توں چھوٹی پارٹی رہی اے۔ ایہ ہمیشہ درمیانی پارٹیاں وچ شمار ہوندی رہی پر ایہدے وچ دو رائے نہیں کہ پاکستان دی سب توں منظم پارٹی جماعت اسلامی سی تے شاید رہوے گی۔ ایس پارٹی دے نال اک ہور حقیقت وی جڑی اے کہ ایہ کدی کسے ہور پارٹی دے نال مستقل بنیاداں تے اتحادی نہیں رہی۔ کل ایہ تحریک انصاف دے نال سی کے پی کے وچ ایہناں دیاں وزارتاں سن فیر تحریک انصاف دے نال ایہناں دے راہ وکھرے ہو گئے۔ پیپلزپارٹی دے نال ایس پارٹی دا کدی اعلانیہ اتحاد نہیں رہیا پر سندھ وچ 15 ورھے توں جدوں پیپلزپارٹی اقتدار وچ اے جماعت اسلامی اوہدا ساتھ دے رہی اے۔ ہن میئر دا الیکشن ہویا تے پیپلزپارٹی نے طاقت دے سر تے جماعت اسلامی نوں الٹا کے رکھ دتا‘ سارے سیاسی ضابطے‘ اخلاقیات نوں مدھ کے جماعت اسلامی تے پی ٹی آئی دی اکثریت نوں اقلیت وچ بدلیا تے مرتضیٰ وہاب جو ساڈی دوست فوزیہ وہاب دے بیٹے نوں میئر بنا دتا گیا۔ جماعت اسلامی دی کراچی وچ 162 سیٹاں سن پی ٹی آئی دے 62 لوک جتے سن بعد وچ جماعت اسلامی دی ہور جتے ہوئے امیدواراں نوں شکست وچ بدل دتا گیا تے اوہ 153 رہ گئے تے فیر جماعت اسلامی تے پی ٹی آئی دے اتحاد دے بعد ایس گروپ نوں پیپلزپارٹی دے خلاف واضح برتری حاصل ہو گئی پر ایس دوران 9 مئی دے واقعات ہون نال پی ٹی آئی ریاست تے ریاستی اداریاں دے زیرعتاب آ گئی تے پی ٹی آئی دے منتخب اراکین نوں ریاستی تشدد‘ جبر تے دھونس نال اوہناں دیاں وفاداریاں بدلن دا عمل شروع ہو گیا اصل وچ ایس سارے واقعات دے پچھے وی مرکز وچ (ن) لیگ دے سب توں وڈے اتحادی آصف علی زرداری دی سوچ سی۔ اوہ چاہندے سن کہ پندراں ورھے تک سندھ دے اقتدار دے سیاہ سفید دے مالک رہن دے بعد کراچی نوں کسے وی طریقے نال اپنے زیرتسلط لیاند اجاوے حالاں کہ 2018ء دے جنرل الیکشن دے نتیجے دے مطابق کراچی دی قومی اسمبلی دیاں چوی سیٹاں وچوں پیپلزپارٹی اک‘ ایم کیو ایم پنج جد کہ پی ٹی آئی نے سولاں جتیاں تے ایہناں نتیجیاں دی موجودگی دے باوجود پیپلزپارٹی ہر صورت کراچی دے اقتدار تے قابض ہونا چاہندی سی۔
تحریک انصاف دے بہت سارے لوکاں نوں پارٹی دی حمایت چھڈن تے مجبور کیتا گیا پر جماعت اسلامی دا اک وی ممبر نہیں ٹُٹیا۔ ایہ بہرحال کریڈٹ جماعت اسلامی نوں جاندا اے۔ تحریک انصاف دے نال ہویا کیہ اے ایہدے تے وی تھوڑا جیہا غور کرن دی ضرورت اے۔ عمران خان ولوں سندھ وچ دو لیڈراں تے اعتماد کیتا گیا جہناں دا سیاست نال کدی تعلق نہیں سی رہیا۔ اک فیصل واوڈا تے دوجے علی زیدی سن۔ بدقسمتی نال ایہ دوویں شخصیات سیاسی اخلاقیات توں عاری نکلیاں‘ سیاست دے اخلاقی معیار تے پورا نہ اتر سکیاں۔ عمران خان نے علی زیدی نوں سندھ دا پارٹی صدر بنایا سی‘ پارٹی صدر ہون دی حیثیت نال سارے معاملات اوہناں دے حوالے کر دتے گئے ایہ اوہو پارٹی اے جنہے 2918ء وچ کراچی وچ اک طرح نال کلین سویپ کیتا سی۔میں سمجھنا واں جماعت اسلامی پاکستان وچ اک ہور تارا سنگھ ثابت ہوئی اے۔ تقسیم ہند دے موقعے تے ماسٹر تارا سنگھ نے سکھاں نوں نہرو دے پچھے لا دتا اوہناں نے پاکستان دی مخالفت کیتی‘ مسلماناں دا قتل عام کیتا تے سکھاں نوں سب توں ودھ نقصان ماسٹر تارا سنگھ دی وجہ نال ہویا جے ماسٹر تارا سنگھ قائداعظم دی گل من لیندے تے سکھاں لئی وی بہت سودمند ہوندا‘ اج اوہ پاکستان دا حصہ ہوندے تے گردوارہ ننکانہ صاحب اوہناں دی دسترس وچ ہوندا۔
آخر وچ خواجہ آصف دے ایس بیان تے گل ضرور بن دی اے جہدے وچ خواجہ آصف نے قومی اسمبلی دے اندر کھڑے ہو کے اوورسیز پاکستانیاں دے خلاف گلاں کیتیاں اوہناں نے تارکین وطن نوں بے شرم قرار دتا سی نال ایہ کہیا سی کہ کہڑی ترسیلات ایہ لوک پاکستان گھلدے نیں تے خواجہ آصف نے ہور ہرزہ سرائی کردے ہوئے پارلیمنٹ دے فلور تے کہیا کہ اوورسیز پاکستانی صرف اپنے ماں باپ نوں دفنان لئی پاکستان آندے نیں تے اوہناں دا پاکستان نال تعلق کیہ اے؟ خواجہ آصف‘ پی ڈی ایم تے اسٹیبلشمنٹ دے لیڈر جدوں کدی کینیڈا‘ جاپان‘ جرمنی‘ آسٹریلیا‘ امریکہ‘ فرانس یاں دوجے یورپی ملکاں وچ جان گے تے فیر اوہناں دے نال ایس توں وکھرا مینوں ہوندا نظر نہیں آ رہیا جو کجھ ہو رہیا اے۔٭