ملک بھر وچ یوم تقدس قرآن منایا گیا

سویڈن واقعے خلاف

اُچیچی لکھت

وزیراعظم شہباز شریف دی ہدایت تے ملک بھر وچ سرکاری تے غیر سرکاری سطح اتے ہر طبقہ فکر نال جڑے افراد نے سویڈن وچ ملعون شخص دے ہتھیں قرآن پاک نذرآتش کیتے جان دے واقعے دی شدید مذمت کیتی۔وفاقی تے صوبائی دارالحکومتاں دے علاوہ ملک دے دوجے چھوٹے وڈے شہراں وچ احتجاجی ریلیاں کڈی گئیاں جد کہ سیاسی تے سماجی جماعتاں تے تنظیماں ولوں وی سویڈن وچ قرآن کریم دی بے حرمتی دے خلاف اج ملک گیر مظاہرے کیتے جا رہے نیں۔
سویڈن واقعے دے خلاف سپریم کورٹ بار ایسوسی ایشن ولوں اک مذمتی قرارداد منظور کیتی گئی ۔ دوجے پاسے سندھ ہائیکورٹ بار ایسوسی ایشن نے وی سویڈن وچ قرآن پاک دی بی حرمتی دے واقعے اتے حکومت نوں سفارتی سطح تے ایس مذموم سازش دا مقابلہ‘ سفارتخانہ بند کرن تے مصنوعات دا بائیکاٹ کرن دا مطالبہ کیتا اے۔
وزیراعظم شہباز شریف دے نمائندہ خصوصی علامہ طاہر محمود اشرفی نے لہور وچ پریس کانفرنس کردیاں کہیا کہ دنیا بھر وچ یوم تقدس قرآن منایا جا رہیا اے۔ اوہناں نے آکھیا کہ پہلاں ایہہ معمالات حکومتی سرپرستی دے بغیر ہوندے سن ہن سویڈن حکومت دی سرپرستی وچ قرآن کریم ساڑیا گیا اے۔اوہناں نے کہیا کہ اسلام ساری کتاباں تے انبیا دے احترام دا حکم دیندا اے۔ عوام سویڈن واقعے دے خلاف پرامن مظاہرے لئی نکلن تے بھرواںاحتجاج ریکارڈ کروان۔علاوہ ازیں مسلم لیگ ن منیارٹی ونگ دے مرکزی صدر تے پاکستان مسیحی کونسل پاکستان دے صدر سینیٹر کامران مائیکل نے اپنے مذمتی بیان وچ کہیا اے کہ سویڈن وچ قرآن پاک دی بے حرمتی دا واقعہ ناقابل قبول اے۔ پاکستان دے مسیحی ایس واقعے خلاف احتجاج وچ بھرواں شریک نیں تے مذمت کردے نیں۔
دریں اثنا ملک دے مختلف شہراں وچ مسیحی برادری تے اوہناں دے مذہبی رہنماواں نے سویڈن واقعے دے خلاف اپنا احتجاج ریکارڈ کروایا۔ ایس سلسلے وچ جاری بیاناں وچ مطالبہ کیتا گیا اے کہ ایس گھنائونے واقعے وچ مولث افراد خلاف سخت کارروائی کردیاں ایس امر نوں یقینی بنایا جاوے کہ آئندہ ایس قسم دے واقعات عمل وچ نہ آن۔
دوجے پاسے گجرات وچ سویڈن واقعے خلاف احتجاجی ریلی کڈی گئی۔ جہدے وچ شرکا نے سویڈن واقعے خلاف مذمتی پلے کارڈ ‘ بینرز چکے ہوئے سن۔کراچی وچ تاجر تنظیماں ولوں نماز جمعہ مگروں احتجاج دے طور تے 2گھنٹیاں لئی کاروبار بند رکھن دا اعلان کیتا گیا اے۔ ایس دے علاوہ مختلف مقامات اتے احتجاجی ریلیاں وچ سویڈن واقعے دے سخت لفظاں وچ مذمت کیتی جا رہی اے۔آل کراچی تاجر اتحاد ولوں احتجاجی ریلی میمن مسجد توں ٹاور تک کڈی گئی جہدے وچ شرکا نے سویڈن حکومت دے خلاف نعرے بازی کیتی۔
اک مسلمان لئی ضروری اے کہ اوہ محتاجاں نوں انج ای ویکھے جیویں اوہ فیدہ مند تجارت ول ویکھدا اے۔ جان لینا چاہیدا اے کہ اج دے دن دی تھوڑی محنت روزقیامت لئی دو تن گن فیدے دا کارن نہیں بلکہ کئی گنا فیدے دا کارن ہووے گی۔ اللہ تعالیٰ فرماندے نیں ‘ ترجمہ: ایسا کون شخص اے جہڑا اللہ نوں چنگا قرض دیوے فیر اللہ اوہنوں کئی گنا ودھا کے دیوے تے اللہ تعالیٰ ای تنگی کردا اے تے کشائش کردا اے تے تسیں سارے اوہدے ول لوٹائے جائو گے۔ سورہ البقرہ:245
اک ہور جگہ اللہ تعالیٰ فرماندے نیں‘ ترجمہ: آکھ دیو بے شک میرا رب ای اپنے بندیاں وچوں جہنوں چاہوے روزی کھلی کر دیندا اے تے جہنوں چاہوے تنگ کر دیندا اے تے جہڑی کوئی چیز وی تسیں خرچ کردے او سو اوہو اوہدا عوض دیندا اے تے اوہ سب توں بہتر روزی دین والا اے۔ سورسبا:39۔
دوجی جگہ اللہ تعالیٰ فرماندے نیں‘ ترجمہ: جہڑے لوک اپنے مال اللہ دی راہ وچ رات تے دن لکا کے تے ظاہر خرچ کردے نیں تے اوہناں لئی اپنے رب دے کول ثواب اے‘ اوہناں اتے نہ کوئی ڈر اے تے نہ اوہ غمگین ہون گے۔ سورہ البقر:274
حضرت عقبہ بن عامرؓ فرماندے نیں کہ میں رسول اللہﷺ نوں ایہہ فرماندے ہوئے سنیا کہ قیامت دے دن ہر شخص اپنے صدقہ دے سایہ وچ ہووے گا‘ ایتھوں تک کہ فیصلہ کیتا جاوے گا۔
حضرت ابو ہریرہؓ کولوں روایت اے کہ رسول اللہﷺ نے ارشاد فرمایا کہ سختی اللہ دے قریب اے‘ جنت دے قریب اے۔ سارے لوکاں دے قریب اے۔ جہنم توں دور اے تے بخیل اللہ توں دور اے۔ جنت توں دور اے۔ سارے لوکاں توں دور اے۔ جہنم دے قریب اے تے جاہل سخی عابد بخیل توں ودھ اللہ نوں پیارا اے۔ جامع ترمذی:1961
حضرت ابو ہریرہؓ کولوں روایت اے کہ نبی پاکﷺ نے ارشاد فرمایا: سخاوت جنت وچ اک درخت اے جہڑا شخص دنیا وچ سخی ہووے گا اوہ ایس درخت دی اک شاخ نوں پھڑے گا تے اوہ شاخ اوہنوں نہیں چھڈے گی ایتھوں تک کہ اوہنوے جنت وچ داخل کر دیوے گی تے بخیلی جہنم وچ اک درخت اے تے جہڑا شخص دنیا وچ بخیل ہووے گا اوہ اوس درخت دی اک شاخ پھڑے گا تے اوہ شاخ اوہنوں نہیں چھڈے گی ایتھوں تک کہ اوہنوں دوزخ وچ سٹ دیوے گی۔ شعب الایمان للبیہقی 10377
حضرت ابو بکر صدیقؓ کولوں روایت اے کہ رسول اللہﷺ نے ارشاد فرمایا کہ جنت وچ کمینی خصلت والا تے کنجوس تے احسان جتان والا نہیں داخل ہووے گا‘ جامع ترمذی1963
حضرت ابو سعید خدریؓ کولوں روایت اے کہ سرور کائنات حضور اکرمﷺ نے ارشاد فرمایا: دو خصلتاں مومن وچ جمع نہیں ہو سکدیاں کنجوسی تے بداخلاقی‘ جامع ترمذی:1962
حضرت ابو ہریرہؓ کولوں روایت اے کہ رسول اللہﷺ نے ارشاد فرمایا کہ بنی اسرائیل دے تن آدمی سن۔ اک کوڑھی برص والا‘ دوجا گنجا‘ تیجا انھا۔ اللہ تعالیٰ نے اوہناں تناں دے امتحان دا ارادہ فرمایا تے اوہناں تناں دے کول اک فرشتے نوں بھیج دتا۔ چنانچہ اوہ فرشتہ سب توں پہلاں برص والے کوڑھی دے کول آیا تے اوہنوں آکھیا کہ دنیا وچ تینوں سب توں بوہتی کہڑی چیز محبوب اے؟ تے اوہنے آکھیا کہ چنگا رنگ‘ چنگی کھال تے میری ایہہ بیماری چلی جاوے جہدی وجہ نال سارے لوک میرے توں گھن کردے نیں۔ ایہہ سن کے فرشتے نے اوہدے بدن اتے ہتھ پھیر دتا تے اک دم اوہدا مرض دفع ہو گیا تے اللہ تعالیٰ نے اوہنوں بہترین رنگ تے بہترین کھال عطا فرما دتی۔ فیر فرشتے نے اوہنوں پچھیا کہ تینوں کیہڑا سامان پسند اے؟ تے اوہنے آکھیا کہ اونٹ۔ تے اللہ تعالیٰ ولوں اوہنوں اک اونٹنی عطا کردتی گئی تے فرشتہ ایہہ آکھ کے اوہدے کولوں چل پیا کہ اللہ پاک تینوں برکت عطا فرماوے۔ فیر ایہہ فرشتہ گنجے دے کول آیا تے آکھیا کہ دنیا وچ تینوں سب توں ودھ کہڑی چیز محبوب اے؟ اوہنے آکھیا: حسین بال تے میری ایہہ بیماری چلی جاوے جہدی وجہ نال لوک میرے توں نفرت کردے نیں۔ ایہہ سن کے فرشتے نے اوہدے اتے ہتھ پھیر اتے دم زدن وچ اوہدی بیماری جاندی رہی تے اللہ پاک ولوں اوہنوں نہایت ای حسین بال عطا کردتے گئے۔ ایہدے مگروں فرشتے نے پچھیا: تینوں کہڑا مال سپند اے؟ تے اوہنے آکھیا:گاں۔
فیر اوہنوں اک گاں عطا کردتی گئی تے فرشتہ ایہہ آکھ کے چل پیا کہ اللہ تعالیٰ تینوں برکت دیوے۔ اوہدے مگروں ایہہ فرشتہ انھے دے کول آیا تے آکھیا کہ دنیا وچ تینوںکہڑی چیز سب توں بوہتی محبوب اے؟ تے اوہنے آکھیا کہ بس ایہو کہ اللہ تعالیٰ میری بینائی واپس عطا فرما دیوے تاں جے میں لوکاں نوں ویکھ سکاں۔ ایہہ سن کے فرشتے نے اوہدی اکھاں دے اتے ہتھ پھیر دتا تے فوراً ای بینا ہو گیا تے اللہ تعالیٰ نے اوہدی بینائی لوٹا دتی۔ فیر فرشتے نے آکھیا کہ تینوں کہڑا مال بوہتا پسند اے؟ تے اوہنے آکھیا کہ بکری ۔تے اوہنوں اک بکری عطا کردتی گئی فیر اونٹنی‘ گاں‘ بکری تناں نے بچے دتے تے اوہناں وچ ایس قدر برکت ہوئی کہ کوڑھی دے کول اک میدان بھر کے اونٹ ہو گئے تے گنجے دے کول اک میدان بھر کے گاواں ہو گئیاں تے انھے دے کول اک میدان بھر کے بکریاں ہو گئیاں۔فیر کجھ دناں مگروں ایہو فرشتہ برص والے کوڑھی دے کول اپنی اوسے شکل و صورت وچ آیا جہڑی شکل و صورت وچ پہلی واری آیا سی تے آ کے اوہنے آکھیا کہ میں اک مسکین بندا واں تے میرے سفر دے سارے ذرائع ختم ہو چکے نیں۔ ہن اللہ تعالیٰ دے سوامینوں وطن پہنچان والا نہیں اے۔ میں تہاڈے کولوں اوس اللہ دے نام تے جہنے تہانوں چنگا رنگ تے خوبصورت چمڑا تے اونٹ دی ولت عطا کیتی اے‘ اک اونٹ دا سوال کرنا واں کہ اوہدے ذریعے میں اپنا سفر تمام کر لوواں۔
ایہہ سن کے کوڑھی نے جواب دتا کہ میرے اتے بہت سارے حقوق نیں (یعنی بہت سارے لوکاں نوں تے بہت سارے کماں وچ دینا اے) فرشتے نے آکھیا کہ میں تینوں پہچاننا واں کیہ توں کوڑھی نہیں ساں؟ تہاڈے برص دی وجہ نال سارے لوک تہاڈے نال نفرت نہیں کردے سن؟ توں فقیر ساں تے اللہ تعالیٰ نے تیری بیماری دور کرکے تینوں مال عطا فرما دتا۔ایہہ سن کے کوڑھی نے آکھیا کہ مینوں تے ایہہ مال اپنے بزرگاں کولوں میراث وچ ملیا اے۔ فرشتے نے اکھیا کہ توں جھوٹ بول رہیا اے تے اللہ تعالیٰ فیر تینوں انج ای کر دیوے جیویں کہ توں پہلاں ساں۔ فیر اوہ فرشتہ اپنی صورت وچ گنجے دے کول آیا تے ویسا ای سوال کیتا جیسا کہ کوڑھی نال کیتا سی تے گنجے نے وی اوہو جواب دتا جہڑا کوڑھی نے دتا سی۔ فرشتہ اوہدے کولوں وی ایہو آکھ کے چل پیا کہ جے تو جھوٹ بول رہیا اے تے اللہ تعالیٰ تینوں ویساای کر دیوے جیسا کہ توں پہلاں ساں۔ اوہدے مگروں ایہہ فرشتہ اپنی پہلی ای شکل و صورت وچ انھے دے کول آیا تے آکھیا کہ میں اک مسکین بندا واں تے مسافر آں۔ میرے سفر دے سارے ذرائع ختم ہو چکے نیں‘ ہن اللہ دی مدد دے سوا میرے وطن پہنچن دی کوئی صورت ای نہیں اے۔ میں تیرے کولوں اوس اللہ دے نام تے جہنے دوبارہ تینوں بینائی عطا کیتی اک بکری منگنا واں کہ اوہنوں میں اپنے وطن پہنچن دا ذریعہ بناواں۔
ایہہ سن کے انھے نے آکھیا کہ جی میں تے انھا سی تے اللہ نے مینوں دوبارہ بینائی عطا فرما دتی(توں اللہ دے نام تے سوال کیتا اے) توں ایس میدان وچ میری جہنی بکریاں نیں اوہانں وچوں جہنی چاہووے لے جا تے جہنی چاہووے چھڈ جا۔ خدا دی قسم ! توں اللہ دے نام اتے جہنی وی لووے گا میں تیرے کولوں اوہدا مطالبہ کر کے تینوں مشقت وچ نہیں پاواں گا۔ ایہہ سن کے فرشتے نے آکھیا کہ توں اپنا مال اپنے کول ای رکھ تینوں۔ تہاڈے تناں دا امتحان لیتا گیا اے تے اللہ تعالیٰ تیرے توں خوش ہو گیا تے تہاڈے دونویں ساتھیاں کولوں ناراض ہو گیا۔ (صحیح بخاری‘ 3464)
حضرت عبداللہ بن جعفرؓ اک واری جنگل وچ تشریف لے جا رہے سن۔ رستہ وچ اک باغ اتے گزر ہویا۔ اوتھے اک حبشی غلام باغ وچ کم کر رہیا سی۔ اوہدی روٹی آئی تے اوہدے نال اک کتا وی باغ وچ چلا آیا تے اوس غلام دے کول آ کے کھڑا ہو گیا۔ اوس غلام نے کم کردے کردے اک روٹی اوس کتے دے سامنے سٹ دتی۔ اوس کتے نے اوہنوں کھا لیتا تے فیر کھڑا رہیا۔ اوہنے دوجی تے فیر تیجی روٹی وی پا دتی۔ کل تن ای روٹیاں سن‘ اوہ تینوں کتے نوں کھووا دتیاں۔ حضرت بن عبداللہ بن جعفرؓ غور نال کھڑے ویکھدے رہے‘ جدوں اوہ تنوں ختم ہو گئیاں تے حضرت عبداللہ بن جعفرؓ نے اوس غلام کولوں پچھیا کہ تہاڈی کہنی روٹیاں روزانہ آندیاں نیں؟ اوہناں نے عرض کیتا: آپ نے تے ملاحظہ فرما لیتا‘ تن ای آیا کردیاں نیں۔ حضرت نے فرمایا کہ فیر تناں دا ایثار کیوں کر دتا؟ غلام نے آکھیا :حضرت ایتھے کتے رہندے نہیں‘ غریب بھکا کدھرے دوروں سفر کر کے آیا اے ایس لئی مینوں چنگا نہیں لگیا کہ اوہنوں انج ای واپس کر دیاں۔ حضرت نے فرمایا کہ فیر تسیںاج کیہ کھاوو گے؟ غلام نے آکھیا اک دن فاقہ کر لوواں گا‘ ایہہ تے کوئی ایسی وڈی گل نہیں اے۔حضرت عبداللہ بن جعفرؓ نے اپنے دل وچ سوچیا کہ لوک مینوں آکھدے نیں کہ تے بہت سخاوت کردا اے‘ ایہہ غلام تے میرے توں بہت ودھ سخی اے۔ ایہہ سوچ کے شہر وچ واپس تشریف لے گئے تے اوس باغ نوں تے غلام نوں تے جو کجھ سامان باغ وچ سی سب نوں اوہدے مالک کولوں خرید اتے خرید کے غلام نوں آزاد کردتا تے اوہ باغ اوس غلام دی نذر کر دتا۔ (فضائل صدقات:ج2‘ ص164)
یقینا سخاوت تے فیاضی تے اللہ تعالیٰ دے رستے وچ خرچ کرن نال نہ صرف ایہہ کہ انسان دے مال و دولت وچ بے پناہ برکت ہوندی اے بلکہ ایہدے توں اوہدی عزت تے آبرو وچ وی بے پناہ وادھا ہو جاندا اے بلکہ اک بزرگ دا قول اے کہ سخاوت تے فیاضی تے مخلوق خدا اتے خرچ کرن نال انسان دے جملہ عیوب لوکاں دی نظراں توں اوجھل ہو جاندے نیں تے ایہناں ساریاں دی جگہ اوہدی ایہہ اک سخاوت تے فیاضی والی اچھائی لے لیندی اے۔
سویڈن وچ اک بدبخت دہریے ولوں قرآن پاک دی بے حرمتی دے دلخراش واقعے اتے غم و غصہ دی شدید لہر نے پورے عالم اسلام نوں اپنی لپیٹ وچ لے لیتا اے تے غیر مسلم ملکاں وچ وی مسلمان ایس گھنائونے فعل دے خلاف جلوساں تے مظاہریاں دی صورت وچ سراپا احتجاج نیں۔ جدہ وچ سعودی عرب دی تحریک تے اسلامی ملکاں دی تنظیم او آئی سی دے ہنگامی اجلاس نے اپنے اعلامیہ وچ قرآن پاک‘ اسلامی اقدار‘ علامتاں تے مقدسات دی بے حرمتی روکن لئی عالمی برادری نوں سخت ترین کارروائی دا مطالبہ کیتا تے مسلم ملکاں اتے اجتماعی اقدامات کرن تے زور دتا اے۔ بعض مسلم ملکاں نے احتجاج دے طور تے سویڈن توں اپنے سفیر واپس بلا لیتے نیں یا نویں سفیر بھیجن دی کارروائی روک دتی اے۔ پاکستان‘ ترکیہ‘ شام‘ لبنان‘ اردن‘ فلسطین تے سعودی عرب نے ایس گھنائونے فعل دی شدید مذمت کردیاں سویڈن توں مجرم نوں قرار واقعی سزا دوان دا مطالبہ کیتا اے جد کہع راق‘ کویت‘ عرب امارات تے مراکش وچ سویڈن دے سفیراں نوں طلب کر کے شدید احتجاج ریکارڈ کرایا اے۔ خود سویڈن دی حکومت نے دارالحکومت سٹاک ہوم دی جامع مسجد دے باہر عیدالاضحی دی نماز دے دوران قرآن پاک دے ورقے مقدسہ نوں نذرآتش کرن دی مذمت کردیاں ایہنوں اسلاموفوبیا قرار دتا اے تے کہیا اے کہ ایس توہین آمیز واقعے نال سویڈن دی حکومت دا کوئی تعلق نہیں۔ قرآن پاک یا کسی وی مقدس کتاب دی توہین‘ اشتعال انگیزی‘ جارحانہ تے گستاخانہ اقدام اے۔ انج دے واقعات حکومت دے خیالات دی عکاسی نہیں کردے لیکن واقعے دا المناک پہلو ایہہ اے کہ مجرم نوں ایس شیر انگیزی دی اجازت اک عدالت نے دتی سی کیوں جے سویڈش پلس نے رپورٹ پیش کیتی سی کہ انج دے واقعے اتے کوئی ردعمل نہیں آوے گا جد کہ زمینی حقائق بدنیتی اتے مبنی ایس رپورٹ دی نفی کردے نیں۔ واقعے دی اطلاع ملن تے دنیا بھر دے ڈھائی ارب توں ودھ مسلماناں دے دل چھلنی ہو گئے نیں تے اوہ احتجاجی جلسے جلوسیاں وچ اپنی حکومتاں نوں مطالبہ کر رہے نیں کہ سویڈن نال ہر قسم دے تعلقات منقطع کر کے ایہدی مصنوعات دا بائیکاٹ کردتا جاوے تے مجرم نوں جو کہندا اے کہ اوہ کسی مذہب اتے یقین نہیں رکھدا عبرتناک سزا دوائی جاوے۔
او آئی سی نے مغربی ملکاں نوں کہیا اے کہ اوہ انسانی حقوق دے حوالے نال عالمی قنون دے مطابق آزادی اظہار دا حق استعمال کرن جو کسی مذہب یا اوہدے شعائر دی توہین دی اجازت نہیں دیندے۔
ایہہ امر انتہائی افسوسناک اے کہ مغربی ملکاں وچ زبانی دعویاں دے برخلاف اسلوموفوبیا مسلماناں لئی نسل پرستی روزمرہ دا معمول بن گئی اے۔ صرف جرمنی وچ پچھلے سال 998 مسلم مخالف واقعات رونما ہوئے تے 5سو زبانی حملے کیتے گئے۔ اسلام‘ مسلماناں تے اسلامی مقدسات دی بے حرمتی کرن والیاں وچ جرمن مرداں دے علاوہ زنایاں وی شامل سن۔ اشتعال انگیز بیانات‘ دھمکیاں تے تشدد معمول بن چکیا اے۔ پاکستان وچ سویڈن دے افسوسناک واقعہ اتے شدید ردعمل سامنے آیا اے۔ دینی تے سیاسی جماعتاں تے اوہناں دے رہنماواں نے اوہدی شدید مذمت کیتی اے تے سویڈن دے سفیر نوں ملک بدر کرن‘ اوہدی مصنوعات دے بائیکاٹ تے مجرم نوں کڑی سزا دوان دا مطالبہ کیتا اے۔ پیر نوں اسلام آباد وچ ایس حوالے نال تاجراں نے زبردست مظاہرہ کیتا جہدے وچچ قرآن حکیم دی بے حرمتی نوں ناقابل برداشت جرم قرار دتا گیا۔ دوجے شہراں وچ وی احتجاج دا سلسلہ جاری اے۔ لوڑ ایس گل دی اے کہ اسلامی ملک او آئی سی دے پلیٹ فارم توں ایہہ معاملہ اقوام متحدہ وچ پیش کرن تے جہڑے ملک وچ توہین قرآن یا اسلوموفوبیا دا جرم سرزد ہویا اوہدے عالمی بائیکاٹ دی قرارداد منظور کروا کے اوہدے اتے سختی نال عملدرآمد کرایا جاوے۔
قرآن کریم دی بے حرمتی دے واقعے خلاف عالمگیر سطح اتے احتجاج کیتے جان مگروں سویڈن نے قرآن کریم تے دوجے مقدس صحیفیاں دی بے حرمتی نوں جرم قرار دین تے غور شروع کردتا۔ سویڈن دے وزیر انصاف گوناراسٹرومر دے مطابق قرآن پاک دی بے حرمتی دے حالیہ واقعے نے سویڈن دی سلامتی نوں نقصان پہنچایا۔ اوہناں دا کہنا اے کہ سویڈن دی حکومت ایس گل داجائزہ لے رہی اے کہ آیا اوہ قرآن پاک یا دوجی مقدس کتاباں دی بے حرمتی نوں غیر قنونی قرار دے سکدی اے۔ واضح رہوے کہ پوری دنیا وچ سویڈن وچ قرآن کریم دی بے حرمتی خلاف احتجاج جاری اے۔ ایس واقعے خلاف حکومت پاکستان دے اعلان اتے ملک بھر وچ اج یوم تقدیس قرآن منایا جا رہیا اے۔ وزیراعظم شہباز شریف نے قوم نال جمعہ مگروں سویڈن وچ قرآن کریم دی بے حرمتی دے واقعے اتے احتجاج جاری اے۔ ایس واقعے خلاف حکومت پاکستان دے اعلان اتے ملک بھر وچ یوم تقدیس قرآن منایا گیا۔ وزیراعظم نے کہیا کہ سانحہ سویڈن اتے پوری امت مسلمہ مضطرب اے۔ قرآن ساڈے دل وچ اے قرآن ساڈے لئی صرف قرات نہیں بلکہ جین دا قرینہ اے۔