پاکستان دا مان

ڈاکٹر صغرا صدف

احسان شاہد ورگے لوک ملک و قوم لئی اعزاز ہوندے نیں‘ جو اپنے عمل نال صرف اپنا ناں اچا نہیں کردے اپنی ذات نوں سربلند نہیں کردے سگوں اپنی قوم دی پچھان سنواردے تے جگمگاندے نیں۔ اوہ پتہ نہیں کنے ورھیاں توں دنیا دے خوبصورت تے تہذیب یافتہ شہر لندن وچ رہندے نیں جو دنیا بھر دے طالب علماں تے سیاحت دے رسیا لوکاں دا پسندیدہ ترین مقام اے ہیرو ورگی شکل والے خوبرو‘ خوش گلو‘ شرارتی‘ ذہین تے سمارٹ لڑکے دا صرف ظاہری حلیہ بدلیا اے نہیں تے اوہ ہن وی اک اجیہا پاکستانی نوجوان اے جو ہر رات ملک دی سلامتی تے ترقی دا خواب پلکاں تے رکھ کے سوندا تے چنگی خبر دی امید نال اکھاں کھولدا اے۔ اپنی زندگی وچ جے کسے بندے لئی تن لفظ خلوص دا پیکر‘ استعمال کرنا چاہواں تے اوہ صرف احسان شاہد اے جو نہ بے مروتی ورتدا اے تے نہ برداشت کردا اے۔ ویہہ پنجی ورھے پہلاں احسان شاہد نال ملاقات ہوئی اوہنوں صغرا ناں نال عقیدت سی۔ مینوں بھین کہیا تے انج نبھایا کہ شاید ای کوئی احساس دا رشتہ اینی محبت‘ عقیدت‘ خلوص تے اپنائیت دا عملی مظاہرہ کر سکے۔
اوہدے گھر قیام دوران جدوں میں کالم لکھ کے فوٹواں بنا کے اپنے پی اے نوں گھلدی تے اوہ کاغذ مینوں سٹن نہیں سی دیندا سگوں سانبھ کے رکھ لیندا سی۔ اینے ورھے لنگھ گئے کدی کوئی اجیہا دور نہیں گزریا جدوں اوہ میرے توں یاں میری دعاواں توں دور رہیا ہووے۔ دو تن ورھے اسیں بھین بھرا بڑے ناراض وی رہے پر دلوں دور نہیں رہے۔ احسان شاہد دی ذات اک سمندر وانگوں اے جہدے اندر کئی اجہے جزیرے نیں جہناں دے ساحلاں تے کجھ تشنگیاں تے خواب دھرے نیں جہناں دی تعبیر اوہنے زندگی دا مقصد بنا رکھیا اے۔ شاید ایہو وجہ اے کہ عملی زندگی وچ بڑی چھیتی اوہنے اپنے آپ نوں انسانیت دی فلاح نال جوڑ کے خیر دے رستے تے قدم رکھ دتا سی۔ ہر معاشرے وچ دکھاں دی گہری دھند ہوندی اے جہناں وچ پھسے لاچار لوک مددگار مہرباناں دے منتظر ہوندے نیں۔ احسان شاہد نے لندن ورگے بے باک تے رنگین شہر وچ تماشائی بن کے لطف لین دی تھاں اپنے واسطے مددگارف رشتے دا کردار پسند کیتا تے پوری دیانتداری نال نبھایا۔ اسیں اوہدے احسان مند آں کہ اوہدے پاروں نیک نامی ساڈا تعارف بنی نہیں تے اوہ وی ساڈے لوک نیں جو اکثر سڑکاں تے نعرے بازی کردے نظر آندے نیں تے انج انج دیاں حرکتاں کردے نیں کہ انسان حیران رہ جاندا اے کہ پردیس وی جھلیا تے جہالت وی کمائی۔ جتھے اوہ اپنی تخریبی حرکتاں نال ایس ملک دے لوکاں نوں بے چین تے متفکر کردے نیں اوتھے احسان شاہد ورگے لوک بلاتفریق ہر کمیونٹی دے مسئلے حل کرکے اوہناں نوں سکھ ونڈ کے ساڈے سب دا سر فخر نال اُچا کردے نیں۔ برطانیہ اک فلاحی ملک اے تے کمیونٹی لئی فلاحی کم کرن والیاں دی سلاہنا کردا اے۔ حال ای وچ برطانیہ دے بادشاہ ولوں احسان شاہد نوں برٹش ایمپائر میڈل دے اعلیٰ اعزاز نال نوازیا گیا۔ میں اعزاز پان والیاں دی فہرست ویکھ رہی سی اوہدے وچ سرفہرست احسان شاہد دا ناں لکھیا سی۔ دوجے لوکاں وچ تعلیم‘ کھیڈ تے سماجی خدمات نبھان والیاں دا تذکرہ سی پر احسان دا اوپن کچن سب توں وکھرا لگا۔ برٹش ایمپائر میڈل صرف اوہدا نہیں سگوں ساڈا سب دا اے۔ پاکستان دا اعزاز اے کیوں جے پاکستان تے اوہدے دل وچ وسدا اے۔ اوہ نس نس کے لہور تے میاں چنوں اپڑدا اے۔ میاں چنوں اوہدی جنم بھومی اے تے لہور اوہنوں عطاء الحق قاسمی دی وجہ نال پیارا اے۔ اوہ بیک وقت کئی محبتاں نوں دل وچ بسائے سفر تے ٹردا رہندا اے۔ ہر لمحہ فکر کرن تے متحرک رہن والا اجیہا انسان اے کم جہدے نزدیک عبادت وانگوں وی اے تے تفریح وی۔ ایس لئی سخت محنت تے بھج نس اوہنوں تھکاندی نہیں سگوں ہور حوصلہ ودھاندی اے۔
پردیس وچ رہن والا ہر بندہ ملک دا سفیر ہوندا اے۔ اوہدا ہر عمل پرکھیا تے ہر فقرہ تولیا جاندا اے۔ اوہدے قول و فعل دی گونج اوہدے ملک دی فضاواں تک اپڑدی اے۔ دعا اے کہ بیرون ملک رہن والے پاکستانی احسان شاہد وانگوں اپنے ہم وطناں دا وی احساس کرن تے جس ملک وچ رہندے نیں اوہدی تکریم نوں وی سامنے رکھن۔ انسانیت دی خدمت نوں شعار بنا کے نیک نامی کمان تاں جے اوہناں تے جنم دین والی دھرتی مان کر سکے۔ آخر وچ احسان شاہد دا ایہ خوبصورت شعر تہاڈی نذر جو اوہدا فلسفہ حیات تے یقین کامل دا عکاس اے۔
سب کی بگڑی سنوارنے والا کب کسی کو عذاب دیتا ہے
روز محشر حساب کیا لے گا جو مجھے بے حساب دیتا ہے