کیپٹن عمار شہید

محمدصغیر قمر

عمار نوں شہید ہوئے کجھ دن گزرے سن اسیں اوہناں دے گھر گئے۔ سراپا استقامت اوہناں دی ماں نے کہیا عمار کارگل دے محاذ تے سی میں خواب وچ اوہنوں ویکھیا۔ اسیں اپنے پنڈ وچ آں تے اسمان توں ان گنت لوک پیراشوٹ راہیں اتر رہے نیں اوہناں وچ عمار وی اے۔ اوہ بریگیڈیئر طارق محمود (ٹی ایم) شہید دے انداز وچ پاکستان دا جھنڈا لہراندے ہوئے تھلے آ رہیا اے۔ زمین تے اتردے ای اوہ میریاں نگاہواں توں اولھے ہو جاندا اے۔ میں پریشان ہو جانی آں‘ فیر اچانک پچھوں آ کے اوہ میرے موڈھے تے ہتھ رکھ رکھ کے کہندا اے۔ امی میں جدوں عمار نوں پیراشوٹ جمپ وچ سبز ہلالی جھنڈا چکدے ہوئے ویکھیا تے یقین ہو گیا کہ میرا جگر گوشہ ضرور کوئی عظمت لے کے اسماناں توں اترے گا۔ کوئی ماں ایس توں وڈی عظمت تے سعادت دا تصور وی کر سکدی اے؟ پنجی ورھیاں دے اک نوجوان دی ماں لئی ایہ فخر ای دو جہاں دی دولت توں ودھ کے اے کہ اوہدا کم عمر پتر جہدی ہنے ہنے منگنی ہوئی سی ایس طرح اوہدے ددھ دی لاج رکھدا تے تربیت دا حق ادا کردا اے۔ اپنے خاندان نوں اجہی عظیم سعادت دا تحفہ دے کے آپ ابدی زندگی حاصل کر لیندا اے۔ کیپٹن عمار مارچ نوں راولپنڈی وچ پیدا ہوئے۔ اوہناں دے والد میجر محبوب حسین بڑے دیندار تے مزاجاً حریت پسند بندے سن۔ اسلام دے شیدائی سگوں صحیح معنیاں وچ دیوانے۔ بیٹا دین دی محبت وچ باپ تے بازی لے گیا۔ دیوانگی دی حد ایہہ وے کہ اپنی خواہش تے ایس محاذ تے جہاد کرن اپڑ گیا جتھے وڈے وڈے بہادراں دا پتہ پانی ہو جاندا اے تے فرزانگی دی انتہا ایہہ وے کہ ابدی کامیابی حاصل کرن وچ کامیاب ہو گیا تے کسے نوں کنوں کن خبر نہ ہون دتی۔
عمار شروع توں ای حریت پسند بچہ سی۔ میجر محبوب نال میرا بھراواں ورگا تعلق سی۔ اوہ ریٹائرمنٹ دے بعد جنرل حمید گل دے ہو گئے۔ جنرل صاحب اوہناں نوں دین دا مجنوں کہندے سن۔ اسیں دو چار اکٹھے ہو کے میجر صاحب نوں تنگ کردے اوہ کدی کھل کے نہیں سی ہسدے ساڈی کوشش ہوندی اوہناں نوں گدگدیاں کریئے پر اوہ اپنی متانت تے سنجیدگی نہ چھڈدے‘ بس مسکرا کے نکل جاندے۔ عمار اوہناں دے پرانے ویسپا سکوٹر تے بہہ کے آ جاندے۔ اپنے باپ وانگوں سنجیدہ پر مسکراندا بچہ۔ ویکھدے ای ویکدے جوان ہو یا تے اک دن میجر محبوب برفی لے کے آئے عمار پاس آئوٹ ہو گیا اے فیر کدی کدی عمار دا ذکر ہوندا تے میجر صاحب کہندے اوہ بچپن وچ ای ولی لگدا سی مینوں ہن وی ولی لگدا اے۔ عمار ذہانت و فطانت وچ ہمیشہ اپنے طالب علم ساتھیاں وچ نمایاں رہے تے غیرت و حمیت دا جذبہ اجیہا محکم سی کہ چھ ست ورھے دی عمر وچ اپنے ساتھیاں دے نال رَل کے جنگ جنگ کھیڈدا تے سارے مل کے فتح تے خوشی مناندے۔ عمار دے ماموں طارق کہندے نیں کہ ست ورھے دی عمر وچ اک واری جہازی سائز دے اغذ تے جنگ دا نقشہ بنایا۔ کاغذ دے درمیان لکیر کھچ کے اک پاسے پاکستان دی فوج‘ ٹینک تے گڈیاں بنائیاں تے دوجے پاسے ہندوستان دے فوجیاں تے اسلحے نوں وکھایا تے اوہناں دی صلاحیتاں دا یقین سی اوہنے اوہ نقشہ ٹیچر نوں وکھایا پر اوہناں دے ٹیچر نوں یقین نہیں سی آندا کہ اک معصوم بچہ جنگ د ا اجیہا پلان کر سکدا اے۔ اوہنے کیریئر دا سارا سفر تیز رفتاری نال طے کیتا اوہ اوہناں بچیاں وچوں سن جو اپنا کوئی لمحہ ضائع نہیں کردے۔
میں ملٹری کالج جہلم وچ داخلہ لیا پنج ورھے تک ایتھے تعلیم حاصل کرن دے بعد میں پی ایم اے جائن کیتا۔ میں پاس آئوٹ ہون دے بعد ایف ایف دا انتخاب کیتا پر اضطراب کسے مقام تے رکن نہیں سی دیندا۔ ایس ایس جی دی تربیت حاصل کرن تے کمربستہ ہوئے تے اکتوبر وچ سپیشل سروسز گروپ دا کورس کامیابی نال مکمل کرن دے بعد یلدرم بٹالین وچ شامل ہوئے۔ ایتھے وی اوہناں دے جنون دی شورش نہ گئی اپنیاں صلاحیتاں وچ نکھار پیدا کرن لئی اک کورس دے بعد دوجا کورس کردے رہے۔ اوہ جدوں چھٹی تے آندے ابا دے پھٹپھٹے ویسپا تے بہہ کے ملن آندے۔ اوہناں دا اک ای شوق سی پڑھن لئی ڈھیر ساریاں کتاباں مل جان۔ میں اوہناں نوں لائبریری وچ گھل دیندا جو پسند آندی لے لیندے‘ جاندے ہوئے کہندے انکل ایہناں دے پیسے؟ تے اوہنوں جواب وی پتہ ہوندا تسیں جائو اسیں میجر صاحب توں لے لواں گے تے سانوں اگلا فقرہ وی پتہ سی اوہ ہمیشہ کہندا انکل! تھنک یو معرکہ کارگل توں پہلاں اوہ انفنٹری کالج کوئٹہ لئی منتخب ہو ئے سن پر کارگل وچ بھارت نال جنگ چھڑ گئی تے اوہ اوہدے وچ شامل ہون لئی بے تاب ہو گئے۔ کارگل لئی اوہناں نے اپنے آپ نوں رضاکارانہ پیش کیتا سی ایس معرکے تے جان لئی اپنے گھر والیاں نوں وی خبر نہ ہون دتی۔ کیپٹن شیرخان شہید عمار دے کورس میٹ سن۔ کارگل وچ وی اکٹھے سن۔ دوہاں نے اک ای دن شہادت پائی۔ کیپٹن عمار کس طرح شہید ہوئے اوہناں دے ساتھیاں دا دا کہنا اے کہ دشمن جدوں ٹائیگر ہلز تے پاک فوج دی سپلائی کٹن وچ مصروف سی اوس توں اگلی پوسٹ تے پاک فوج دے بندے پھس گئے سن۔ اوہ بہادری نال لڑدے رہے پر اوہناں وچوں کجھ ڈاڈھے زخمی ہو چکے سن۔ اوہناں نوں دشمن دے گھیرے چوں کڈھنا ضروری سی۔ کیپٹن عمار‘ کریپٹن کرنل شیر خان تے اوہناں دے چھ ساتھی دشمن تے حملہ آور ہوئے۔ اوہناں نوں اپنے زخمی بھائیاں تک اپڑنا تے اوہناں نوں اوتھوں کڈھنا سی۔ ایہ سوکھا کم نہیں سی پر اوہناں نے اک واری فیر رضاکارانہ طور تے ایہ ناممکن مشن پورا کرن دی کوشش کیتی تے معرکے وچ شہید ہو گئے۔ اوس رات دے پچھلے پہر اوہناں نے دشمن دیاں ساریاں رکاوٹاں نوں پار کر لیا تے راہ وچ آن والے بزدل بھارتی فوجیاں نوں گاجر مولی وانگوں وڈھ کے رکھ دتا سی۔ اوہ مٹھی بھر سن تے دشمن سینکڑوں دی گنتی وچ سی پر صبح تک اوہ دشمن دیاں لاشاں توں گزردے تے اگے ودھدے رہے۔ کیپٹن عمار پہاڑ دی کس گھاٹی تے جھنڈا لہران وچ کامیاب ہوئے تے کتھے اوہناں دا لہو گریا‘ اوہناں دے کجھ ساتھیاں دے جسد خاکی واپس آ گئے پر عمار اپنے کجھ دوجے ساتھیاں دے نال کارگل دے ان دیکھے ان جانے پہاڑی گوشے وچ ایسے محو خواب ہوئے کہ کسے نوں اوہناں دا سراغ وی نہ مل سکیا۔٭