دوجی زندگی

اوہنے میری قدر نہیں کیتی‘ میں دوجی بیوی بن جاندی لیکن شاید اوہ بنان اتے تیار نہیں سی

لکھت:شازیہ بیگ

اوہنے میری قدر نہیں کیتی‘ میں دوجی بیوی بن جاندی لیکن شاید اوہ بنان اتے تیار نہیں سی۔ ایہناں لفظان دے نال ای مایا دی آواز وچ سسکیاں وج بدل گئی۔ اوہ خود نوں مضبوط ظاہر کرن دی کوشش کردے کردے شاید تھک چکی سی۔ میرے کول اوہدی کال آئی تے اوہ مدد چاہندی سی۔ میں یقین دوایا کہ میں اوہدے شوہر نوں واپس لیان دی کوشش کراں گا۔
ایہہ گل غالباً دو سال پرانی اے۔ا ک دوست نے مایا بارے دسیا کہ اوہدے شوہر نے دوجے ویاہ دی ٹھان لیتی اے جد کہ اوہدی پہلاں توں اک دھی اے جہدی عمر 14 سال اے۔ اوہ دوجا ویاہ پاکستان وچ کرے گا جد کہ پہلی بیوی دبئی وچ اے۔ میں آکھیا دوجے ویاہ وچ کیہ حرج اے۔ جے اوہ برابری دے نال رکھ سکدا اے تے کر لووے۔ دوست دا آکھنا سی کہ اوہ ذمہ دار منڈا نہیں۔ اوہ میری مدد جاہندا سی تاں جے مایا نوں تہاڈے بارے دسیا اے۔ اوہ تہاڈے نال آپ گل کرنا چاہندی اے جد کہ کراچی وچ مایا دے والدین وی ملنا چاہندے نیں۔ بہرحال کجھ دناں مگروں مایا دے والدین نال ملاقات ہوئی۔ مایا دے والد معین صاحب دا کہنا سی کہ میں بس اک واری اپنے داماد نال ملنا چاہنا واں تے پچھنا چاہنا واں کہ میری دھی وچ کیہ کمی اے جہڑا تسیں اینا وڈا قدم چک رہے او۔ ایتھے ایہہ دسنا ضروری اے کہ مایا کوئی عام کڑی نہیں سی بلکہ اوہ اعلیٰ تعلیم یافتہ سی جہدی وجہ نال دبئی وچ اوہنوں بہترین ملازمت وی ملی۔ لکھ کوششاں دے باوجود مایا دا شوہر طارق اپنے سسر نال ملن اتے تیار نہیں ہویا۔
اک رات مایا دا میسج ملیا کہ میں تہادے دوست دی بھانجی آں تے تہاڈے نال گل کرنا چاہنی آں۔ واٹس ایپ میسیج دے ذریعے مختصر گل بات مگروں میں مایا نوں آکھیا کہ فون اتے تفصیل دس دیو۔ مایا دی کال آئی تے اوہ رون لگی۔ بس ایہو آکھدی جاندی کہ میں نہیں جاندی میرے کولوں کیہ غلطی ہوئی۔
ہویا انج کہ طارق کسی کم نال اسلام آباد گیا سی جتھے اوہدی نائلہ نال ملاقات ہوئی۔ نائلہ غیر شادی شدہ سی تے ملازمت کردی سی۔ طارق اوہدے عشق وچ بری طرح گرفتار ہو چکیا سی۔ اوہنوں اپنی دھی دا وی کوئی خیال نہیں رہیا سی جہڑی دبئی وچ پیو دی منتظر سی۔ طارق اسلام آباد توں واپس دبئی پہنچ کے وی دن رات نائلہ نال گل کردا رہندا۔ حد تے ایہہ ہو گئی کہ نائلہ نال گل کرن لئی ہن اوہ کدھرے دور نہ جاندا بلکہ گھر دے بیڈ روم وچ ای اوہدے نال فون اتے گلاں کردا۔ مایا کڑھدی رہندی۔ مایا ایہہ گلاں دسدی جاندی تے روندی جاندی کہ جہڑے مرد دی جوان دھی ہووے اوہ کیویں اینا غیر ذمہ دار ہو سکدا اے۔ بہرحال میرا موقف وکھرا سی۔ میں مایا نوں سمجھایا کہ محبت وچ بڑی طاقت اے۔ دھی نوں پیو دے نال رکھو‘ اوہ واپس آ جاوے گا۔ میرے خیال وچ دوجا ویاہ کرنا جرم نہیں سی لیکن پہلی بیوی تے دھی نوں کلیا چھڈنا نہایت غیر ذمہ داری سی۔
ویلا لنگھدا گیا‘ مایا دی کالاں آندیاں رہیاں۔ طارق نائلہ دے عشق وچ اینا پاگل ہویا کہ اوہ پاکستان آ گیا جد کہ اوتھے بیوی تے دھی گھر وچ کلیا رہے۔ کورونا دے دن سن۔ سب کجھ بند ہوندا سی۔ مایا لئی خریداری وی مسئلہ سی جد کہ طارق دی دھی بری طرح متاثر ہو رہی سی۔ مایا نے بہت چاہیا کہ خاندان دے وڈے جان تے طارق دے گھر والیاں نال گل کرن لیکن سب نوں اپنی بے عزتی دا خوف سی۔ اخیر میں فیصلہ کیتا کہ میں طارق نال ملاں گا۔
مایا کولوں نمبر حاصل کیتا تے طارق نوں کال کیتی۔ سلام دعا مگروں مایادا ذکر کر کے ملن دی خواہش دا اظہار کیتا۔ اوہنے سخت لہجے وچ آکھیا کہ تسیں کون ہوندے او میرے معاملے وچ دخل دین والے۔ میں جواب دتا کہ جہڑے تہاڈے اپنے تے وڈے نیں جدوں اوہ اک گھر تے خاندان بچان لئی اگے نہیں آ رہے تے اک مسلمان ہون دے ناطے میرا فرض اے کہ میں تہاڈا گھر ٹوٹن توں بچاواں۔ بہرحال طارق ولوں تلخ جملے سنن مگروں ملاقات طے پا گئی۔
طارق دے نال اوہدا بھراں وی سی۔ ملاقات نوں چنگے خوشگوار ماحول وچ رکھن لئی پہلے ایدھر اودھر دی گلاں شروع ہوئیاں فیر اصل مسئلے ول آئے۔
تہانوں ایس مسئلے وچ اینی دلچسپی کیوں اے؟ طارق دے سوال وچ شک دا عنصر غالب سی۔یکوں جے میری وی اک دھی اے تے میں دھی دے پیو نال تعلق نوں سمجھ سکنا واں۔ تہاڈی دھی تہاڈی منتظر اے۔ میرا جواب طارق اتے کجھ دیر تک تے اثر کردا رہیا لیکن فیر نائلہ دا عشق عالب آ گیا۔ مینوں سن کے نہایت غصہ وچ آگیا۔فیر اوہنے اپنی دھی دے خلاف وی زہر اگلنا شروع کردتا۔دھی وی میری فرمانبردار نہیں‘ اوہنوں میرے پیسیاں نال مطلب اے۔ بس اوہدی خواہشاں پوری کردا رہواں‘ اوہ وی ماں وانگوں اے وغیرہ وغیرہ۔
ہن میں سمجھ چکیا سی کہ طارق نائلہ دے عشق وچ اینا پاگل ہو چکیا اے کہ اوہ کجھ سنن نوں تیار نہیں۔ طارق دے بھراں نے وی کوشش کیتی کہ رشتہ قائم رہوے لیکن اوہ کسی دی سنن نوں تیار نہیں سی لیکن طارق نے میرے مشورے اتے کوئی توجہ نہ دتی۔ فیر اک رات مایا دا واٹس ایپ میسیج آیا۔ اوہدی ہچکیاں جاری سن۔ مایا مینوں سر آکھدی سی۔ میسج وچ سی‘ سر! طارق نے مینوں طلاق دے دتی۔
وقت گزردا گیا۔ طارق دی دوجی بیوی توں وی اوہدے ہاں اک دھی پیدا ہوئی۔ تاہم ہن مایا دی دھی پیو نال ملن نوں تیار نہیں سی۔ ویلا تیزی نال لنگھدا گیا ۔ طارق اپنی دوجی بیوی دے نال دوبارہ دبئی منتقل ہو گیا تے مایا دے گھر دے کول ای گھر لے لیتا۔
ہن مایا دی دوجی زندگی شروع ہو گئی۔ میں مایا نوں مشورہ دتا کہ اوہ اپنی عدت پوری کردیاں ای دوجے ویاہ داد سوچے تے بہتر رشتہ ملدے ای ویاہ کر لووے۔ مایا نوں ایس دوران اک شخص ملیا جہڑا عمر وچ مایا توں بہت گھٹ سی لیکن شادی شدہ سی۔ اوہدے ویاہ نوں کجھ سال ای ہوئے سن تے بیوی امید نال سی۔ اوہ مایا نوں پسند کرن لگیا۔ مایا تے اوہدی دھی دی ہر خواہش پوری کرن دی خواہش کردا۔ کدھرے جانا ہووے اوہ حاضر۔ا وہدی بیوی پاکستان وچ سی جہنوں دبئی بلوانا سی۔
شاہد نے کسی طرح اپنی پہلی بیوی نوں منا لیتا تے مایا نال گل وی کرا دتی تے انج اوہناں دا ویاہ ہو گیا۔ ماشااللہ نہایت خوشگوار گھرانا چل رہیا اے۔ اللہ نے مایا نوں شاہد دی شکل وچ قدر کرن والا خوبصورت تے گھٹ عمر شوہر دتا۔ مایا دی دھی نوں چاہن و الا پیو دتا جہڑا ذمہ دار وی اے۔ ایہہ سب شاہد مایا دے والدین دے توکل دا نتیجہ اے۔
دوجے پاسے طارق پچھتاندا اے۔ اوہنے اک دن مایا نوں کال کیتی تے پچھتاوے دا اظہار کیتا۔ مایا! انجانے وچ مینوں کیہ ہو گیا سی۔ میں تہاڈے نال بہت محبت کرنا واں فیر تہاڈے توں اینا دور کیویں ہو گیا۔ میں تے ہرگل تیرے نال ای کردا سی مینوں کیہ ہو گیاسی ۔ طارق دے لفظاں توں شکست ظاہر ہو رہی سی۔ اوہ ماں دھیاں مینوں چھڈ گئیاں نیں۔ میں کلیا رہ گیا واں۔
طارق! تسیں ہن میرے لئی نامحرم او‘ پلیز میرے نال رابطہ نہ کیتا کرو۔ میں تہانوں بددعا نہیں دیندی کیوںجے تہاڈی دوجی بیوی توں وی اک دھی اے۔ اللہ اوہدے نصیب چنگے کرے تے تہانوں صحیح فیصلیاں دی ہمت دیوے۔مایا نے طارق نوں دعاواں دے کے فون بند کر دتا۔