روشن اکھیاں

مسلسل بارشاں تے مون سون دی آمد پاروں
گرمی دی حدت گھٹ ہو کے موسم خوشگوار ہو گیا سی

پروفیسر عبداللہ بھٹی

مسلسل بارشاں تے مون سون دی آمد پاروں گرمی دی حدت گھٹ ہو کے موسم خوشگوار ہو گیا سی۔ قریبی پارک مسلسل بارشاں دی وجہ نال پانی وچ ڈب چکیا سی۔ واکنگ ٹریک وی ٹٹ پھٹ دا شکار سی نہ ای ادھورے ٹریک نال واک ہو سکدی سی۔ میں شدت نال واک نوں مس کر رہیا سی۔ جیویں ای گلی دی سڑک پانی توں صاف ہوئی میں جوگر پائے تے گلی وچ واک کرنا شروع کردتی۔ نال میں موبائل فون آن کیتا تاں جے خواہش منداں دے فون سن سکاں۔ ایس طرحاں میرے قدم واک جد کہ سماعت لوکاں نال گلاں وچ مصروف سن۔ ادھا گھنٹہ لنگھ گیا کہ میں جدوں واپس مڑیا تے گھر دے کول بہت وڈی مہنگی جیپ نوں کھڑے ویکھیا۔ میرا واک دا کوٹہ اجے ادھورا سی ایس لئی میں نظرانداز کر کے موڑ دے کولوں لنگھ گیا۔ جدوں دو تن واری کولوں لنگھیا تے تجسس دی دیوی بیدار ہو گئی کہ سائل تے بے صبرا بے چین بے قرار ہوندا اے۔ ایہہ کون صاحب نیں جہڑے آرام نال آرام دہ گڈی وچ آرام فرما رہے سن۔ ایس واری کولوں لنگھیا تی جدوں کار دے اندر جھانکیا تے نظر آیا ڈرائیونگ سیٹ تے جوان شخص جد کہ نال والی نشست تے اک بڈھی زنانی موجود سن۔ دونویں میرے ول ویکھ رہے سن لیکن دونواں نے نہ اشارہ کیتا تے نہ ای تھلے اتر کے ملن دی کوشش کیتی تے میں اگے جا کے سکیورٹی گارڈ نوں پچھیا کہ ایہہ کون لوگ نیں۔ کنوں ملن آئے نیں تے سکیورٹی گارڈ بولیا سر ایہہ دو تن دن توں تہانوں ملن آ رہے نیں۔ تہاڈا شیڈول پتہ کر کے گئے سن۔ اج وی ایہہ آئے تے اسیں دسیا تسیں واک کر رہے او تے بولے اسیں اوہناں نوں دوران واک بالکل وی ڈسٹرب نہیں کراں گے جدوں اوہ فارغ ہو جان گے تے مل لواں گے لہٰذا جناب ایہہ تہاڈا انتظار کر رہے نیں۔ دونواں دے انتظار کرن دے انداز نے مینوں متاثر کیتا کہ ایس طلسماتی ہوشربا مادیت پرستی دے دور وچ جدوں بے چینی بے قراری مطلب پرستی جلد بازی ہڈیاں تک سرایت کر گئی اے ایہہ کہڑے جزیرے توں برآمد ہوئے نیں کہ آرام نال بیٹھے انتظار کر رہے نیں کیوں جے میرے ملاقاتیاں وچ اکثریت بے چین بے قرار جلد باز روحواں دی ہوندی اے جو ایس گل توں بالکل بے خبر مینوں مشین یا کوئی پراسرار قوتاں دا مالک جن سمجھ کے آندے نیں۔ اینی جلد بازی بے چینی نفسیاتی بے قراری آندے نیں۔ مینوں عاجز اتے انڈیل دیندے نیں۔ ایہہ ویکھے بغیر میری طبیعت وی ٹھیک اے کہ نہیں اوہناں نوں صرف تے صرف اپنی گل پریشانی دی پئی ہوندی اے۔ بھراں تسیں ضرور اپنی پریشانی شیئر کرو لیکن تھوڑا شائستہ رویہ یا مہذب انداز اپنا لوو گے تے کہڑی قیامت آ جاوے گی۔ تے بے شمار واری میرے نال ہو چکیا کہ میں شدید بخار وچ مبتلا ہووا مگر جان لگنا واں یا کسی دوست یا عزیز دی وفات یا جنازے تے جان لگنا واں تے کوئی بے چین جلدباز روح منوں آ کے ٹکراندی اے۔ میں جے آکھاں کہ بیماری دی وجہ نال یا کسی جنازے وچ جا رہیا اے۔ تہانوں کل پرسوں مل لواں گا تے اوہ میرے درد تے مصروفیت نوں نظرانداز کر کے کہندے نیں سر میرا کم کدوں ہووے گا‘سر میرے مسئلے د حل دسو ‘ سر مینوں تھوڑا جیا ویلا دے دیو۔ سر میں بہت دوروں آیا واں ‘ سر میں بہت مجبور پریشان آں‘ جدوں تک اوہ اپنی گل دسے گا نہیں جاوے گا نہیں۔ اوہ ایس گل نوں بالکل وی محسوس نہیں کرے گا کہ میں بیمار واں یا کسی عزیز دے جنازے اتے جا رہیا واں یا ذاتی کم لئی جا رہیا واں۔ ایسے جلد بازاں دی مینوں عادت جئی ہو گئی اے۔ میں خود نوں سمجھا لینا واں کہ کوئی گل نہیں بیچاری بہت پریشان ہووے گا ایس لئی ایہہ جلد بازی کر رہیا اے۔ ایہنوں متوالیاں دی موجودگی وچ اک امیر زادہ آرام نال انتظار کر رہیا سی۔ ایہہ میرے لئی حیرت دی گل سی کیوں جے امیر زادے ہر چیز نوں پیسے نال خریدن دی کوشش کردے نیں یا مہنگی گڈی‘ موبائل یا مہنگی گھڑی یا لباس وکھا کے شو کردے نیں کہ میں معاشرے دا اک خاص بااثر بندا واں‘ میں کوئی عام ملاقاتی نہیں آں کیوں جے میں سپیشل آںایس لئی مینوں فوری طور تے ترجیحی بنیاداں تے ملیا جاوے کیوں جے ایسے لوک دولت دے بل تے ہر کم کرن دے عادی ہوندے نیں ایس لئی ایہناں نوں انتظار دی عادت نہیں ہوندی جد کہ ایہہ جوڑا امیر ہون دے باوجود آرام نال انتظار دی سولی اتے لٹکیا ہویا سی۔ میں اک دو چکر ہور لائے لیکن شفقت نرم دلی میرے اتے عالب آ گئی کہ کوئی تہاڈا انتظار کر رہیا اے تے تسیں واک اتے لگے ہوئے او۔ لہٰذا میں واک ختم کرن دا ارادہ کیتا تے جہازی مہنگی گڈی ول ودھ گیا۔ مینوں اپنے ول آندا ویکھ کے ڈرائیور سیٹ اتے بیٹھیا جوان چھیتی نال بوہا کھول کے تھلے اتریا تے میرے ول آ کے سلام بولیا۔ میں وی شائستگی خوشدلی نال جواب دتا تے بولیا دسو جناب میں تہاڈی کیہ خدمت کر سکنا واں تے جوان مہذب لہجے وچ بولیا۔ سر پہلاں تے میں تہاڈے کولوں معافی چاہنا واں بغیر وقت لئے تہانوں ملن آگیا لیکن ایہہ مجبوری سی میں اسلام آباد وچ کم کرنا واں۔ بزنس دی وجہ نال مختلف شہراں بلکہ ملک توں باہر رہنا واں۔ دو دن پہلاں لہور آیا تے تہانوں ملن دا پروگرام بنایا۔ سر اندر گڈی وچ میری جنت میری ماں بیٹھی ہوئی اے جو فالج دا شکار اے چل نہیں سکدی ایس لئی اسیں کار وچ بیٹھے ساں۔ سر ایہہ میری دنیا وچ سب توں قیمتی شے اے۔ سر تہاڈے کولوں دعا لین آیا واں کہ ایہہ تندرست ہو جان۔ سر میں ایہناں نوں بیمار نہیں ویکھ سکدا۔ سر میں ایہناں دی صحت لئی کروڑاں روپیہ لا سکنا واں۔ اپنی ساری دولت جائیداد ایہناں دی صحت لئی خرچ کر سکنا واں۔ سر ایہہ میری ماں نہیں اے۔میں بچپن وچ یتیم ہو گیا سی۔ ایہہ میری آیا سی جہناں نے مینوں پال کے جوان کیتا۔ میرے والد صاحب دے جان مگروں میں ایہناں نوں اپنی سگی ماں وانگوں رکھیا ہویا اے۔ ایہناں وچ میری زندگی اے۔ سر ایہناں نے مینوں زندگی دتی۔ میں ایہناں نوں زندگی دینا چاہنا واں۔ جوان دا نام عبدالباسط سی اوہ اپنی ماں دی صحت لئی منتاں ترلے کر رہیا سی۔ ایہہ اوہدی سگی ماں نہیں سی لیکن جس ملازمہ نے آیا بن کے پالیا اوہنوں سگی ماںدا مقام دے دتا تے ایہہ رشتہ گلاں دی حد تک نہیں۔ اصل وچ نبھا رہیا سی۔ میں کار دا بوہا کھول کے ڈرائیونگ سیٹ جد کہ باسط پچھلی سیٹ تے بیٹھ گیا۔ بڈھی ماں فالج دی وجہ نال خموش سی اوہ پیار بھری نظراں نال میرے ول ویکھ رہی سی۔ میں ماں دا ہتھ پھڑ کے چمیا ۔ بہت ساری دعاواںدتیاں ماں نوں پیار کیتا جہنے ملازمہ ہو کے سگی ماں بن کے وکھایا فیر ذکر اذکار دس کے تھلے اتریا تے باسط بہت ممنون روشن نظراں نال میرے ول ویکھ رہیا سی۔ میں قدرت تے حیران سی۔ باسط نے آیا نوں ماں بنا کےاعلیٰ عبادت کیتی ۔ ایسی عبادت جہدا نور اوہدی اکھاں وچ چمک رہیا سی۔ لوک بہت عبادت مگروں ایہہ روشنی نہیں پا سکدے جو روشنی باسط دی اکھاں توں پھٹ رہی سی۔ کاش ایسی حقیقی عبادت سانوں وی نصیب ہووے جو روشنی بن کے ساڈی اکھاں نوں روشن کرے۔