عام انتخابات تے بے یقینی کیسی !

اتحادی حکومت دی آئینی مدت پوری ہون دی تریخ جیویں جیویں کول آ رہی اے
عام انتخابات دے متعلق غیر یقینی ودھدی ای جا رہی اے

شاہد ندیم احمد

اتحادی حکومت دی آئینی مدت پوری ہون دی تریخ جیویں جیویں کول آ رہی اے‘ عام انتخابات دے متعلق غیر یقینی ودھدی ای جا رہی اے۔ ایس غیر معمولی صورتحال وچ وزیراعظم شہبازشریف تے پیپلز پارٹی قیادت آئینی مدت دے اختتام تے اقتدار چھڈن دی یقین دہانیاں کرا رہے نیں لیکن ایہہ یقین دہانیاں اعتبار ای حاصل نہیں کر پا رہیاں۔ ایس نااعتباری دا کارن اک پاسے فضل الرحمن تے نواز شریف ولوں کجھ اہم امور اتے اپنے آئندہ کردار دی وضاحت دا نہ ہونا تے دوجے پاسے فیصلہ سازاں دے اشاریاں دا نہ ملنا اے۔ ایہدی وجہ نال اجے تک انتخابی عمل بے یقینی دا ای شکار وکھائی دے رہیا اے۔
دنیا بھر وچ جو وی ریاستاں آئین دے تابع ہوندیاں نیں ‘ اوتھے کسی معاملے وچ اگر مگر دی کوئی گنجائش نہیں ہوندی اے۔ جے آئین وچ لکھیا گیا اے کہ اسمبلی اپنی پنج سال دی آئینی مدت پوری ہون مگروں تحلیل ہووے گی تے ایس تحلیل دے 90دناں اندر عام انتخابات کرائے جان گے تے مدت پوری ہون مگروں انج ای ہوندا اے۔ ایہہ بحث نہیں چھیڑی جاندی کہ کون انتخابات دی تریخ دیوے گا تے کون انتخابات کراوے گا؟ ایہہ سب کجھ آئین وچ طے اے۔ ایہدے باوجود آئین تے قنون توں ماورا اقدامات دے رستے تلاش کیتے جاندے نیں کیوں جے ایتھے سیاسی جماعتاں جمہوری ڈھانچے اتے استوار ای نہیں نیں‘ سیاسی قیادت عوام دی حمایت دے بجائے غیر سیاسی قوتاں دا سہارا لینا پسند کردے نیں تے اوہناں دے اشاریاں اتے چلدے نیں۔ اہل سیاست دی نظر وچ طاقت دا سرچشمہ عوام دے بجائے مقتدر قوتاں بن گئیاں نیں جو کہ اقتدار وچ لیان تے اقتدار توں کڈن تے دسترس رکھدیاں نیں۔
ملک وچ انتخابات ویلے تے ہوندے یا نہیں لیکن پی ڈی ایم وچ شامل جماعتاں نے اپنی صف بندیاں شروع کر دتیاں نیں۔ اک پاسے اقتدار دی بندربانٹ تے مشاورت ہو رہی اے تے دوجے پاسے بند کمریاں وچ اک دوجے توں ودھ کے اپنی وفاداری تے فرمابرداری دی یقین دہانیاں کرائی جا رہیاں نیں۔ اوہدے نال اک دوجے توں شکوے سکایت دا ڈرامہ وی جاری اے۔ ایہدی اک ہلکی جئی جھلک پچھلے دناں پیپلز پارٹی تے نواز لیگ وچ نظر وی آئی۔ تاہم چھیتی ای ساری لڑائی معاف کرو اپنے دل نوں صاف کرو دے فارمولے اتے عمل کر لیتا گیا اے۔ایس کھیڈ دے دونوویں ای پرانے کھیڈاری نیں تے جاندے نیں کہ آپس دی لڑائی وچ کوئی تیجا فیدہ چک جاوے گا۔
پیپلز پارٹی تے ن لیگ قیادت آئندہ اقتدار دے معاملات مشاورت نال طے کرنا چاہندے نیں لیکن دونوواں دے ای مفادات دے ٹکرائو کارن معاملات طے نہیں ہو پا رہے نیں۔ اک پاسے آصف علی زرداری بلاول بھٹو نوں وزارت عظمیٰ دی مسند تے ویکھنا چاہندے نیں تے دوجے پاسے وزارت عظمیٰ لئی نواز شریف دی وطن واپسی دی راہ ہموار کیتی جا رہی اے جد کہ اقتدار دا ہماسر تے بٹھان والی قوتاں دا قرعہ فال اک واری فیر شہباز شریف دے ای نام نکلن دے آثار وکھائی دے رہے نیں تاہم قبولیت دے پیمانے تے کون پورا اترے گا ایہہ آئندہ عام انتخابات مگروں ای پتہ چلے گا لیکن ایس حصول اقتدار دی دوڑ وچ سب ای اک دوجے نوں مات دین لئی اپنا پورا زور لا رہے نیں۔
انتخابات جدوں وی ہون گے پی ڈی ایم وچ شامل ساری جماعتاں اپنے اپنے جھنڈے تھلے انتخابات وچ حصہ لین گئیاں۔ تاہم سیٹ ایڈجسٹمنٹ دے فارمولے نوں نظرانداز نہیں کیتا جا سکدا۔ ایس انتظام دے باوجود شفاف انتخابات دی صورت وچ وڈے وڈے بت پاش ہون دا احتمال اے۔ جے انتخابات متنازع ہوئے تے دال فیر توں جوتیاں وچ ای ونڈی جاوے گی تے سیاسی عدم استحکام نوں ہوا ملے گی۔ ملک وچ سیاسی استحکام لیان لئی ضروری اے کہ سیاست توں کسی نوں بے دخل کیتا جاوے نہ ای انتخابات وچ حصہ لین توں روکیا جاوے۔ ساری سیاسی جماعتاں نوں برابری دی بنیاد تے انتخابات وچ شامل ہون دا بھرواں موقع ملنا چاہیدا اے۔ انتخابات شفاف ہوئے تے کوئی انگلی چکے گا نہ ای دھاندلی دا الزام لاوے گا۔ جے اک واری فیر اوہو پرانی روایت دہرائی گئی تے عوام دا ایسا ری ایکشن آوے گا کہ اوہدا سامنا کرنا کسی لئی وی ممکن نہیں ہووے گا۔
ایس ویلے اتحادی حکومت نوں سیاسی عدم استحکام دی فکر اے نہ ای عوام دی بدحالی دا کجھ خیال اے۔ حکومتی وزرا وزیراعظم شہباز شریف دے نال رل کے آئی ایم ایف معاہدے اتے لڈیاں پا رہے نیں۔ حکومت ایہنوں اپنے لئی وڈی کامیابی تے آن والی حکومت لئی وبال جان سمجھ رہی اے جد کہ ایہدا سارا بوجھ اتحادیاں نوں ای چکنا پووے گا۔ ایس صورتحال وچ الیکشن دا شوروغوغا تے بلند ہوندا رہووے گا لیکن انتخابات دا ویلے تے انعقاد مشکوک وکھائی دیندا اے۔ انتخابات کدوں ہون گے۔ ایہہ سب کجھ واضح ہوندے ہوئے وی کجھ واضع نہیں ہو پا رہیا اے۔ عام انتخابات دا انعقاد مقتدر ہ دے اشارے دا منتظر اے۔ اوہ جدوں چاہن گے‘ عام انتخابات ہون گے۔ الیکشن کمیشن وی اودھر ای نظر جمائے تے کن لائے بیٹھیا اے۔ تاہم انتخابات جدوں وی ہوئے تے نتائج عوام دی توقعات دے برعکس آئے تے ایسا گھمسان دا رن پووے گا کہ منصوبہ سازاں دی سٹی ای گم ہو جاوے گی۔اللہ تعالیٰ پاکستان نوں ایسی ہر آزمائش توں محفوظ ای رکھے۔ آمین!