اقدار ٹرمپ دا خاتمہ نیڑے اے!

تحریر :شاہد ندیم احمد

امریکہ سیاہ فارم نسل نوں برابری دے حقوق دین دا دعویدار اے پر پلس تے دیگر قانون نافذ کرن والے اداریاں دی طرفوں نہتے سیاہ فاماں دا قتل عام روز مرہ دا معمول بن گیا اے۔پچھلے دناں اک سیاہ فام فارج نوں شہر مینیا وچ پلس اہلکار نے دھون تے گوڈا رکھ کے کافی دیر تیکر دباکے رکھیا جس پاروں سیاہ فارم جارج دی موت واقع ہو گئی۔ ایس توں بعد امریکہ وچ نہ ختم ہون والے مظاہرے پھٹ پئے نیں۔ امریکا دی درجن توں ودھ ریاستاں زبردست احتجاج توڑ پھوڑ تے ہنگامیاں دی لپیٹ وچ نیں۔ اک ہفتے پہلے تیکر ایس او پیز تے مشین وانگوں عمل کرن والے امریکی سارے ایس او پیز نوں بالائے طاق رکھ کے سڑکاں تے آ گئے نیں۔ ایہہ احتجاج دا سلسلہ ہن امریکہ توں برطانیہ جا اپڑیا اے جتھے مختلف شہراں وچ وڈے وڈے ہجوم سڑکاں تے نیں۔امریکہ تے برطانیہ حکومتاں نے میڈیا دے ذریعے جیہڑی نسل پرستی دی اگ دوجیاں لئی بھڑکائی سی، اج ایہناں ای دے ملک نوں اوہ اگ ساڑ رہی اے۔ امریکا وچ صرف سیاہ فام ای نہیں بلکہ جیہڑے سفید فام نہیںنعصب دا شکار نیں، جے ایہہ غیر سفید فام مسلمان ہوئے تے ایس نوں قابل گردن زدنی تصور کیتا جاندا اے۔ امریکا وچ سیاہ فام، غیر سفید فام تے مسلماناں نوں کس نے قابل نفرت بنایا، امریکی حکومت تے اپوزیشن اپنے گھنائونے کھیڈ توں باہر نکل کے ویکھے تے ایہناں نوں ایس وچ اپنا ای مونہہ نظر آئے گا۔
ایہہ امر واضح اے کہ امریکا وچ سیاہ فاماں تے مسلماناں نال امتیازانہ سلوک بھیڑا رکھنا عام جہی گل اے کجھ امریکیاں دے خیال وچ ایہہ لوگ ایسے بھیڑے سلوک دے حق دار نیں۔ ایہہ تعصب پسند طبقہ سفید چمڑی دے سوا کسے نوں بالادستی دین نوں تیار نہیں۔ آئین و قانون تے روایات نوں ہوا وچ اڑا دتا گیا اے، ایسے لئی ہن امریکا اک مسلمہ نسل پرست ریاست بن چکیا اے۔ منی پلس وچ سیاہ فام بندے دے پلس دی حراست وچ قتل دا واقعہ پہلا نہیں پر رد عمل دین وچ سیاہ فام چوکھی مستعد نیں، ایس لئی اوہناں نے سخت رد عمل دتا، ایس دے بعد حکومت مخالف پارٹی وی متحرک ہوئی اے۔ انج ممکن اے کہ ایس دا ملبہ ٹرمپ تے پا کے اینوں اگلے انتخابات وچ ہروا دتا جائے پر امریکا نوں نسل پرستی دے چنگل توں فیر وی نہیں کڈیا جا سکے گا۔ اگرچے پورے امریکا وچ احتجاج ہو رہیا اے، سماجی فاصلے دا خیال نہیں رکھیا جا رہیا، لوگ اک دوجے وچ گھل مل کے جلوس کڈ رہے نیں پر پورے ملک وچ کدھرے کوئی پریس کانفرنس نہیں ہو رہی کہ سماجی فاصلہ اختیار کرو نہیں تے ہسپتال بھر جان گے۔ ایس دا کارن صرف اک اے کہ ایہہ مجمع کسے مذہب دی وجہ نال نہیں، بلکے اک ناحق انسان دے قتل دا اے۔ جے ایہہ مذہبی اجتماع ہوندا تے امریکا دی بوہت ساری تنظیماں دے ڈھیڈ وچ مروڑ اٹھنے سن، پر ایس واقعے نے سب نوں یک جاں کر دتا اے۔
ایس وچ شک نہیں کہ جارج فلائیڈ قتل دے واقعے نے سیاہ فاماں دی آئے دن پلس دے ہتھوں ہلاکتاں تے امریکی غم و غصے نوں تازہ کر دتا اے، تاں ایس توں پہلاں وی سیاہ فام بندے نوں قتل کرن دے مجرم پلس اہلکار نوں گرفتار کیتا گیا، مقدمہ چلیا مجرم نوں سزا سنائی گئی، لوگ ٹھنڈے ہو کے گھراں نوں چلے گئے تے قاتل پلس والا مزے نال کسے دن اپنے گھر چلا گیا۔ ایس دی رہائی دی خبر وی سامنے نہیں آئی، پر جدوں سامنے آئی تے اک دو مظاہریاں دے بعد خاموشی چھا گئی۔ایس وار وی انج دا ای خدشہ اے کہ انصاف دا عالمی سطح تے قتل کرن والے امریکا توں انصاف دی زیادہ توقع نہیں۔
ایس قتل دے واقعے وچ چار پلس والے گرفتار نیں، اک تے تشدد کر کے قتل کرن دا الزام اے، باقی تن تے اعانت جرم دا الزام اے۔ ایس کیس وچ ودھ توں ودھ ایہو ہوئے گا کہ پہلے چارے نوں قتل دا ملزم قرار دتا جائے گا، ایس دے بعد ہنگامے ختم کروائے جان گے تے فیر پہلے والی کہانی چپ کر کے دہرائی جائے گی کیوں جے ایہہ انصاف دے علمبردار غلاماں نال بے انصافی کرنا اپنا حق سمجھدے آئے نیں۔
ایس توں قطع نظر کہ سیاہ فام قتل کیس دا فیصلہ کیہ ہوندا اے تے عوامی احتجاج دا اُٹ کس کروٹ بیٹھ دا اے تاں امریکا وچ ہنگامیاں نوں ویکھ کے غزہ دے فلسطینی تے مقبوضہ کشمیر دے مظلوم کشمیری سوچن تے مجبور ہو گئے نیں کہ کاش اسیں وی سیاہ فام امریکی ہوندے تے ساڈے لئی وی ایس طرح دنیا عالم وچ اواز چائی جانی سی۔ اک سیاہ فام بندا مر گیا تے امریکا وچ اگ لگ گئی، جد کہ ہزاراں فلسطینی تے کشمیری مسلسل مر رہے نیں، ڈاکٹر عافیہ عرصہ دراز توں قید وچ نیں، پر انسانی حقوق دے علمبردار دے کن تے جوں تیکر نہیں رینگدی اے۔امریکا دی حکومت دنیا دے درجناں توں ودھ ملکاں وچ براہ راست جنگ وچ ملوث تے سو دے نیڑے ملکاں وچ بالواسطہ جنگ کر رہیا اے۔ ایس دے ہتھوں دنیا وچ لکھاں لوگ مر رہے نیں پر ایس دے خلاف لوگ سڑکاں تے کیوں نہیں آئے اصل وچ ایہہ معاملہ انج دا نہیں جویں دا نظر آ رہیا اے۔ احتجاجی امریکیاں نوں سیاہ فام نال کوئی زیادہ دلچسپی نہیں، اوہ وی کسے ہور سیاسی ایجنڈے دے تحت احتجاج کر رہے نیں، ٹرمپ مخالف لابی زور پھڑ رہی اے۔ صدر ٹرمپ نے تن ورہے تیکر پر امن ملک دی صدارت کیتی اے پر ہن ایہناں نوں اک مشکل سیاسی صورت حال دا سامنا اے۔ کورونا وبا دی وجہ نال ملکی معیشت اونج ای تباہی دا شکار اے رہی سہی کسر ملک بھر وچ احتجاجی تحریک نے کڈ دتی اے۔ عوام غیر یقینی صورت حال نال دو چار صدر ٹرمپ نوں وائٹ ہائوس وچ لبھدے پھردے نیں، جے احتجاجی تحریک مزید شدت اختیار کر گئی تے ٹرمپ دے اقتدار نوں پینٹا گون وی نہیں بچا سکے گا۔