محفل سجناں دی۔۔۔پنجابی زبان تے ادب دی سیوک تنظیم

عدنان قلزم رانجھا

’’محفل سجناں دی‘‘ پچھلے کئی سالاں توں سیالکوٹ وچ پنجابی زبان ،ادب تے شعر دی سیوا کردی ہوئی اک مقامی تنظیم ایں۔محفل سجناں دی اپنیاں لہیاں تے کم کردی ہوئی پنجابی سیوا دا مان جوگ حوالہ اے۔۔۔۔ ایس دے مقاصد دا ویروا کجھ ایسراں ایں۔۔۔
-1 پنجابی زبان تے ادب دا ودھا: ایس بزم دا پہلا تے اہم ترین مقصد پنجابی زبان ، پنجابی شاعری تے پنجابی نثر دا فروغ اے۔
-2 ایہہ ادارہ اردو یا کسے ہور زبان دے خلاف نئیں البتہ اردو لئی بہت سارے ادارے تے لوک کم کر رہے نیں تے اردو زبان تے ادب اپنے بقا تے ودھا دیاں ان گنت منزلاں طے کر چکیا اے تے اک خاص منزل تے اپڑ چکیا اے جدوں کہ پنجابی زبان تے ادب اجے بہت پچھے وے۔ ایہہ ادارہ پنجابی زبان تے ادب نوں ،اردو زبان تے ادب دے برابر لیان تک کم کر دا رہوے گا۔
-3 پنجابی زبان تے ادب لئی کم کرن والیاں ادیباں تے شاعراں دی حوصلہ افزائی تے ترقی لئی عملی کم وی ایس ادارے دے مُڈھلے مقصداں وچ شامل اے۔ ایس مقصد لئی پنجابی قملکاراں تے پنجابی دے نال نال اردو یا کسے ہور زبان لئی کم کرن تے کوئی روک نئیں ہووے گی۔
-4 محفل سجناں دی دا مڈھلا مقصد پنجابی زبان،ادب ، رہتل تے پنجابیت دا احیاء اے جہدے نال نال ایہہ ادارہ معاشرے وچ معاشرتی قدراں خاص کر کے شدت پسندی تے عدم برداشت نوں صحت مند ادب دے فروغ نال گھٹ کرن تے باہمی احترام وچ وادھا کرن لئی وی کوشاں رہوے گا۔ پنجابی صوفی شاعراں دے کلام وچ پائی جان والی رواداری، صلح کل ، احترام آدمیت تے انسان دوستی دا سبق عام کر کے معاشرے نوں شدت پسندی توں پاک کیتا جا سکدا اے۔
-5پنجابی شاعراں تے ادیباں دی ادب دے فروغ تے مالی مشکلاں نوں گھٹ کرن دا آہر وی ساڈا مقصد جے وسائل میسر آئے تے ایس حوالے نال وی مربوط کوششاں کیتیاں جان گیاں۔
-6 پنجاب وچ پنجابی زبان تے ثقافت نوں سندھ وچ سندھی تے کے پی کے وچ پشتو جنی اچیچتا دوان لئی اسیں اپنا پورا ٹل لاواں گے گے پنجابی ادیباں تے شاعراں دا خاص طور تے تے باقی زباناں دے ادیباں تے شاعراں دا مان، مرتبہ تے معاشرتی درجہ ودھان وچ آخری حد تک جان دی کوشش کیتی جائے گی۔