سینٹ انتخاب‘ اعتزازاحسن دا نوحا

محمد اسلم خان

سینٹ ساڈی منہ زوراشرافیہ دا کلب اے جتھے کوئی انتخاب اج تک ایماندارانہ تے شفاف نہیں ہویا۔ قنون دان تے سندھ ساگر دے داستان گو اعتزاز احسن دسدے نیں کہ سینٹ دے قیام توں اج تک اک وی الیکشن شفاف نہیں ہویا۔ پہلے دن توں ای 25فیصد سینیٹرز صرف دولت دی بنیاد تے آئوندے نیں۔ ہن ایہدے وچ وادھا ہوندا جا رہیا اے۔ سانوں ایس ایلیٹ کلچر توں جان چھڑانی چاہیدی اے۔ سینٹ دیاں ہن بہت گھٹ سیٹاں رہ گئیاں نیں جہدے وچ پیسہ نہیں چلدا۔ سینٹ دے حمام وچ سارے ننگے ہو چکے نیں جو کجھ ہویا نہ ہوندا تے چنگا سی تے ہن عالم ایہہ وے کہ سپ نکل چکیا اے تے سیانے ویانے لکیر کٹی جا رہے نیں۔ سب توں وڈا دھچکا ساریاں تے بھاری آصف زرداری تے اوہناں دے فلسفہ سیاست نوں لگا اے کہ کجھ لوو تے کجھ دیو دی بنیاد تے مطلوبہ نتیجے حاصل کیتے جا سکدے نیں پیپلزپارٹی کدی چوہاں صوبیاں دی زنجیر‘ وفاق دی علامت جماعت سی ہن سندھ تک محدود ہو گئی اے۔
پسپائی دا ایہ سفر جماعت اسلامی نے وی تیزی نال طے کیتا اے جو خیبرپختونخوا دے اوکھے پہاڑی علاقیاں وچ پناہ گزین ہو چکی اے صرف ن لیگ نے وسطی پنجاب دے شہری تے پنڈاں دے ووٹ بینک وچ ڈھیر وادھا کیتا اے جو ہن وفاق تے کاری ضرب لان لئی استعمال کیتا جا رہیا اے۔ سینٹ انتخاب وچ سب توں ودھ مایوسی حضرت مولانا فضل الرحمن نوں ہوئی اے جہناں دا امیدوار مولانا غفورحیدری دس ووٹاں دے واضح فرق نال ہاریا اے تے ہن ایس شکست دے تناظر وچ مریم بی بی تے زرداری نال گلے شکوے کردے پھر رہے نیں کہ پیپلزپارٹی تین لیگ دے ووٹراں نے بے وفائی کیتی اے تے مولانا غفورحیدری نوں ہرایا گیا اے۔ بلاول تے مریم نواز ایہدے تے چپ نیں۔ صرف احسن اقبال نے نیم دلانہ وضاحت دی کوشش کیتی اے۔ ہن مولانا فضل الرحمن نویں ٹیکنالوجی راہیں دس غدار ووٹراں نوں لبھن دا رولا پا رہے نیں۔ مشکوک ارکان دا موبائل فون ڈیٹا حاصل کیتا جا رہیا اے۔ مولانا‘ لانگ مارچ توں پہلاں پارلیمان توں استعفیاں تے دبائو ودھا رہے نیں پر نوازشریف تے زرداری ایس تجویز تے متفق نہیں ہو رہے حضرت مولانا نوں غالباً اک واری فیر مایوسی دا سامنا کرنا پوے گا۔
انج ایہ وی المیہ اے کہ چیئرمین سینٹ دے انتخاب وچ ست ووٹ ضائع کرکے پاسہ پرتن والیاں نے نایب چیئرین دے انتخاب وچ بڑی احتیاط تے ذمے واری نال حق رائے دہی استعمال کیتا اے تے اک ووٹ وی ضائع نہیں ہون دتا۔ مرزا محمد آفریدی دا کمال ایہہ وے کہ اوہناں نے چار دی تھاں دس سینیٹراں نوں راہ راست تے لیان دا کارنامہ کر وکھایا۔ سابق فاٹا نال تعلق رکھن والے مرزا محمد آفریدی بارے ن لیگی قیادت دا دعویٰ سی کہ اوہ اوہناں دی پارلیمانی پارٹی دا حصہ نیں تے جناب عمران خن نوں ڈپٹی چیئرمین لئی ساڈے سینیٹر نوں نامزد کرنا پیا۔ اوہناں نوں کوئی امیدوار نہیں سی مل رہیا ایہ تے ہارن مگروں کھسیانی بلی کھمبا نوچے والا معاملہ اے۔ مہاگرو انور عزیز چوہدری فرماندے سن بادشاہ ست ولیاں دی طاقت رکھدا اے۔
ایہ حقیقت ساریاں تے بھ اری زرداری تے حضرت مولانا شاید بھل چکے سن۔ یوسف رضا گیلانی تے اوہ اسٹیبلشمنٹ دے غیرجانبدار ہون تے خوش ہو رہے سن۔ دوجا ناٹک سینٹ توں جاسوس کیمریاں دی برآمدگی دا اے جہنوں کجھ ستم ظریف بھولے بسرے واٹرگیٹ سکینڈل دے ہم پلہ قرار دے رہے نیں جد کہ دوویں کھوجی مصدق ملک تے مصطفی نواز کھوکھر اک اینکر دے نال اشرافیہ دی دلچسپی دا مرکز کوہسار مارکیٹ دے چائے خانیاں وچ گپ شپ کردے ویکھے جاندے سن۔ فواد چوہدری مزے لیندے ہوئے فرماندے نیں اپوزیشن نے جناں دھیان کیمرا لبھن تے لایا اے اوس دھیان دا پنجی توں تریہہ فیصد اپنے لوکاں دے ووٹ پان دا طریقہ دسن تے لا دیندی تے ایہ ہن رونا نہ رو رہی ہوندی۔ طلال چوہدری دی بلاول زرداری نال دلچسپ نوک جھوک دی خبر اخباراں دی زینت بنی رہی۔ نوازشریف نے مریم دی زندگی نوں لاحق فرضی امکانی خطریاں دی فلم چلا دتی جہدے تے ن لیگ دے اندر وی زیادہ دھیان نہیں دتا گیا سگوں حمزہ شہباز دے سینٹ انتخاب دی وجہ نال سامنے آن دی وجہ نال مریم بی بی نادیدہ نفسیاتی دبائو وچ آئیاں ہوئیاں سن۔ رہے یوسف رضا گیلانی تے اوہناں تے وکھووکھ قسم دے الزامات دی بھرمار رہی اے۔ یوسف رضا گیلانی آپ وی ووٹ ضائع کرن والی ایس ٹیکنالوجی دا شکار ہوئے جو اوہناں دے پُتر موسیٰ گیلانی نے ایجاد کیتی سی جہدے راہیں اوہنے تحریک انصاف دے ارکان قومی اسمبلی نوں ووٹ ضائع کرن دا طریقہ دسیا سی۔ ٹھیک ست دن بعد اوہو ٹیکنالوجی چیئرمین سینٹ دے انتخاب وچ دہرائی گئی۔ سب پہ بھاری زرداری ہلکے ہو کے منظر توں غایب ہو گئے تے مرشدپاک اوسے عدلیہ توں آس لا رہے نیں جہدی حکم عدولی دے جرم وچ وزارت عظمیٰ گنوا بیٹھے سن۔
کاش! وزیراعظم عمران خان دی اوپن بیلٹنگ دی تجویز من لئی جاندی تے ایہ گھڑمس نہ پیندا پر اوس ویلے اپوزیشن ایہدے تے تیار نہ ہوئی۔ ہن اپوزیشن اتحاد عدلیہ دی زنجیر ہلائے گا تے فیصلہ عدالتاں کرن گئیاں جہدے بارے جناب اعتزاز احسن کہندے نیں سپریم کورٹ وچ سینٹ الیکشن دا فیصلہ ایس گل تے منحصر اے کہ ایہ کس بنچ کول لگدا اے۔ 2006ء وچ ہون والے چارٹر آف ڈیموکریسی دے لکھاریاں وچوں آں تے اسیں اوس ویلے بڑا کجھ سوچ رکھیا سی کہ اوپن بیلٹ ہونا چاہیدا اے کیوں جے مالیاتی ہیرپھیر روکن دا ہور کوئی طریقہ نہیں سی۔ نیب مریم نواز دی ضمانت منسوخ کران لئی عدالت نال رجوع کر رہیا اے انج مریم بی بی نے ایہ ضمانت میاں نوازشریف دی تیمارداری دی بنیاد تے کرائی سی۔ وزیراعظم عمران خان تے امیرجماعت اسلامی سراج الحق متفق ہو چکے نیں کہ ایہ ووٹاں دا نہیں‘ نوٹاں دا مقابلہ سی وزیراعظم عمران خان ایس متنازعہ انتخاب نوں سینٹ دی بکرامنڈی قرار دے رہے نیں اللہ خیر کرے۔ حرف آخر ایہ کہ سینیٹر یوسف رضا گیلانی نوں جتوان لئی ووٹ خراب کرن والے انصافی غدار ارکان دی نشاندہی ہو چکی اے جہناں دے خلاف کاروائی بڑی چھیتی شروع ہو جاوے گی۔٭٭