وزیراعظم عمران خان دا دورہ بحرین، اعلیٰ ترین سول ایوارڈ نال نوازیا گیا

منامہ: وزیراعظم عمران خان نوں بحرین دے شاہ حمد بن عیسیٰ الخلیفہ نے اپنے ملک دے اعلیٰ ترین سول ایوارڈ نال نواز دتا اے۔ وزیراعظم عمران خان سخیر محل اپڑے تے بحرین دے شاہ حمد بن عیسیٰ الخلیفہ نے اوہناں دا پرتپاک استقبال کیتا۔ دوواں رہنماواں وچکار ملاقات وچ پاکستان تے بحرین وچکار دوطرفہ تعلقات دے سارے پہلوواں دے علاوہ عالمی تے علاقائی امور تے وی گل بات ہوئی۔ شاہ بحرین ولوں وزیراعظم نوں بحرین دا اعلیٰ ترین سول ایوارڈ عطا کیتا گیا۔ خیال رہوے بحرین دے شاہ حمد بن عیسیٰ بن سلمان الخلیفہ نے وزیراعظم نوں بحرین دا دورہ کرن تے اوہناں دے قومی دن دی تقریب وچ مہمان اعزازی دے طور تے رلت کرن دی دعوت دتی سی۔ایس توں پہلاں وزیراعظم عمران خان نے دورہ بحرین دے دوران وفود دی سطح تے مذاکرات کیتے۔ ایہناں مذاکرات وچ تجارت تے سرمایہ کاری سنے وکھو وکھ امور تے گل بات کیتی گئی جد کہ دوواں ملکاں وچکار وکھو وکھ شعبیاں وچ مفاہمتی یادداشتاں جہناں وچ اعلیٰ تعلیم، سائنسی تحقیق، کھیڈاں تے میڈیکل دے شعبے وچ تعاون سنے دوجیاں یادداشتاں تے دستخط کیتے گئے۔ وزیراعظم عمران خان بحرین دے پہلے سرکاری دورہ تے منامہ اپڑے تے ولی عہد سلمان بن حمد بن عیسیٰ الخلیفہ نے اوہناں دا پرتپاک استقبال کیتا۔ ایس موقع تے اک اعلیٰ سطح وفد وی وزیراعظم دے نال اے جہدے وچ کابینہ دے ارکان دے علاوہ دوجے اعلیٰ حکام وی شامل نیں۔وزیراعظم عمران خان دا دورہ بحرین پورا ہویا تے بحرین دے ولی عہد نے اوہناں نوں ایئر پورٹ تے رخصت کیتا۔ وزیراعظم عمران خان بحرین توں جنیوا روانہ ہو گئے نیں جتھے اوہ عالمی پناہ گزین کانفرنس وچ رلت کرن گے۔