دورہ ملائیشیا دی منسوخی، وزیراعظم نے مہاتیر محمد نوں سعودی تحفظات توں آگاہ کر دتا

جنیوا: وزیراعظم عمران خان نے ملائیشین ہم منصب ڈاکٹر مہاتیر محمد نوں فون کرکے کوالالمپور کانفرنس وچ رلت نہ کرن تے ایس حوالے نال سعودی عرب دے تحفظات توں آگاہ کیتا اے۔ وسیلیاں دے مطابق وزیراعظم عمران خان دے دورہ سعودی عرب دے دوران ملائیشیا وچ ہون والی 6اسلامی ملکاں دے سربراہی اجلاس تے سعودی عرب دی قیادت نے تحفظات دا اظہار کیتا سی۔

ملائیشیا دے وزیراعظم مہاتیر محمد دی قیادت وچ 19توں 21دسمبر تک کوالالمپور وچ اسلامی سربراہی کانفرنس منعقد ہووے گی۔ ”قومی سلامتی دے حصول وچ ترقی دے کردار”دے مرکزی موضوع تے کانفرنس وچ میزبان ملک دے علاوہ انڈونیشیا، قطر تے ترکی دے نمائندے وی شریک ہون گے۔

ترکی دے صدر رجب طیب اردوان، قطری امیر شیخ تمیم بن حماد الثانی، انڈونیشیا دے صدر جوکو وڈوڈو سنے 52ملکاں دے رہنما، سکالرز، علماء تے مفکرین دی رلت دا امکان اے۔