80لکھ کشمیریاں نوں نظر بند کر دتا گیا، عالمی برادری نوٹس لوے: وزیراعظم

جنیوا:وزیراعظم عمران خان آکھیا اے 80لکھ کشمیریاں نوں نظر بند کر دتا گیا، لوک گھراں تے کشمیری رہنما جیلاں وچ بند نیں، عالمی برادری توں کشمیر تے نوٹس لین دی اپیل کیتی سی۔

وزیراعظم عمران خان نے گلوبل پناہ گزیناں دے عالمی فورم نال خطاب کردیاں آکھیا مسئلہ کشمیر توں دو ایٹمی طاقتاں وچ تنازع دا خطرہ اے، بے بس تے بے وسیلہ مہاجرین دے مسئلیاں دا امیر ملک ادراک نہیں کر سکدے، بھارتی حکومت نے آسام وچ متنازعہ شہریت قنون نافذ کردتا، بھارتی شہری گلیاں وچ نکل آئے نیں، مقبوضہ وادی وچ 80لکھ کشمیری محاصرے وچ نیں، جان بوجھ کے مسلم اکثریت نوں اقلیت وچ بدلیا جا رہیا اے۔

عمران خان دا کہنا سی پاکستان نوں انسانی تریخ دے سب بڑے مہاجر مسئلیاں دا ساہمنا رہیا، پاکستان 30لکھ مہاجرین دی میزبانی کر رہیا اے، پاکستان نوں بیروزگاری جہے مسئلیاں دا ساہمنا اے، مہاجرین دی باعزت واپسی لئی موزوں حالات پیدا کرنے ہون گے، پاکستان افغان عمل امن وچ بھرواں کردار ادا کررہیا اے۔