بار تے بنچ وچکار ڈیڈ لاک ختم، عمیر بلوچ دے خلاف توہین عدالت دا شوکاز نوٹس واپس

اسلام آباد: پی آئی سی واقعے مگروں اسلام آباد ہائی کورٹ بار تے بنچ وچکار ڈیڈ لاک ختم ہو گیا۔

عدالت عالیہ نے سیکرٹری ہائی کورٹ بار عمیر بلوچ دے خلاف توہین عدالت دا نوٹس اوہناں دے پیش ہون تے واپس لے لیا۔

چیف جسٹس اطہر من اللہ نے ریمارکس دتے پچھلے دیہاڑ تسیں آ گئے سی، جدوں احساس ہو جاوے تے ایناں ای کافی اے، اسیں توہین عدالت وچ سزا تے یقین نہیں رکھدے، بڑے دکھ نال شوکاز نوٹس جار ی کیتا سی، بار مضبوط ہووے گی تے بنچ مضبوط ہووے گا۔

چیف جسٹس اسلام آباد ہائی کورٹ آکھیا عدلیہ دا احتساب وی مضبوط بار ای کردی اے، بار دا نوبل کردار ایہ اے کہ عدالتاں تے عوام دا اعتماد ودھے، بار نے وی رول ماڈل دا کردار ادا کرنا اے، آس اے ایہ بار عدلیہ دی آزادی دا تحفظ کرے گی۔

اسلام آباد ہائی کورٹ نے بار سیکرٹری عمیر بلوچ نوں عدالتی کاروائی وچ مداخلت تے 12دسمبر نوں توہین عدالت دا شوکاز نوٹس جاری کرکے 19دسمبر تک اوہناں دا لائسنس معطل کیتا سی، وکلاء تنظیماں نے احتجاجاً چیف جسٹس اطہر من اللہ دی عدالت دا بائیکاٹ کیتا رکھیا۔