لہور وچ شدید سردی، جنوری وچ وی دھند دی شدت وچ وادھے دا امکان

لہور: لہور وچ دھند دا راج، یخ بستہ ہواواں چلن نال سردی دی شدت وچ وادھا ہو گیا۔ محکمہ موسمیات نے دو ہفتے دے دوران دھند دی شدت زیادہ رہن دے امکانات ظاہر کردتے نیں۔ تفصیلات دے مطابق لہور سنے پنجاب دے وکھو وکھ علاقے دھند دی شدید لپیٹ وچ نیں۔

مغربی ہواواں نے لہور دا رخ کر لیا اے جہدی وجہ توں سردی دی شدت وی ودھ گئی اے۔ محکمہ موسمیات نے دسمبر دے نال جنوری وچ وی دھند برقرار رہن دی پیش گوئی کردیاں پچھلے ورھیاں دی نسبت دھند دی شدت وچ وادھے دے امکانات ظاہر کیتے نیں۔ ڈائریکٹر محکمہ موسمیات اجمل شاد دا کہنا اے مغربی ہواواں نال لہور دے موسم وچ تبدیلی آئی۔

شہر تے ایہدے مضافات دے درجہ حرارت وچ کمی ریکارڈ کیتی جا رہی اے۔ اگلے ہفتے وچ درجہ حرارت 2 ڈگری سینٹی گریڈ تک جان دا امکان اے۔ محکمہ موسمیات دے مطابق پیر نوں لہور دا گھٹ توں گھٹ درجہ حرارت 5ڈگری سینٹی گریڈ ریکارڈ کیتا گیا اے۔