6لکھ توں ودھ بندیاں نوں بینظیر انکم سپورٹ پروگرام توں کڈھن دا فیصلہ

اسلام آباد: سرکار نے 6لکھ توں ودھ بندیاں نوں بے نظیر انکم سپورٹ پروگرام توں کڈھن دا فیصلہ کیتا اے۔ پروگرام توں فائدہ چکن والے 6لکھ 25ہزار 592بندیاں نوں لسٹ توں کڈھن دی سمری کابینہ نوں گھل دتی اے۔ جہناں وچ وفاقی یاں صوبائی حکومتاں دے سرکاری ملازمین تے 12ایکڑ توں ودھ زرعی زمین رکھن والے وی شامل نیں۔ بے نظیر انکم سپورٹ پروگرام دے تحت سہ ماہی معاوضہ 5500توں ودھا کے 6ہزار کرن دا فیصلہ کیتا جہدا نواں ناں ”احساس کفالت” رکھیا گیا اے ۔

نادر نے پچھلے 8ورھے بے نظیر انکم سپورٹ پروگرام توں فائدہ چکن والیاں دا تفصیلی جائزہ لیا جہدے توں پتہ چلیا کہ ایہناں وچوں 5لکھ 25ہزار بندے اک توں ودھ بیرون ملک سفر کر چکے نیں، 44ہزار بندیاں دے کول اک یاں ودھ گڈی یاں موٹرسائیکل اے۔ 36ہزار بندیاں نے ایگزیکٹو فیس دے کے شناختی کارڈ بنوائے، اک ہزار 246بندیاں نے ایگزیکٹو سنٹر توں پاسپورٹ لئی اپلائی کیتا، 30ہزار بندے ماہانہ اک ہزار روپے موبائل فون دا بل ادا کردے نیں، اوسطاً اک ہزار روپے ٹیلی فون بل ادا کرن والیاں دی تعداد 19ہزار 686اے۔