ثبوت اے نہ ویڈیو، شہریار آفریدی گلاں دی بجائے استعفیٰ دین: طلال چودھری

لہور: پاکستان مسلم لیگ (ن) دے رہنما تے سابق وفاقی وزیر مملکت طلال چودھری دا کہنا اے ویڈیو نہیں فوٹیج دی گل کیتی سی ، دا بیان دے کے شہریار آفریدی یوٹرن نیازی بن گئے نیں۔ قوم توں معافی منگن، ثبوت اے نہ ویڈیو، شہریار آفریدی گلاں نہ کرن، استعفیٰ دین۔ وفاقی وزیر مملکت شہریار آفریدی دی پریس کانفرنس تے ردعمل دیندیاں اوہناں دا کہنا سی یوٹرن ماسٹر دے یوٹرن چیلے جھوٹھ تے جھوٹھ بولن دے بجائے استعفیٰ دین، قوم نے ویکھ لیا کہ اک جھوٹھ دی بنیاد تے رانا ثنا نوں ناحق تے بے گناہ 7مہینے قید رکھیا گیا۔

لیگی رہنما دا کہنا سی شہریار آفریدی گلاں نہ کرن اپنے جھوٹھ تے استعفیٰ دین، ایہناں دیاں اکھاں وچ اج اپنے جھوٹ تے ندامت، شرم تے پشیمانی نظر نہیں آئی سگوں بدستور ڈھٹائی نظر آئی، قوم منتظر سی کہ شہریار آفریدی اج قوم دے ساہمنے ویڈیو پیش کردے۔طلال چودھری دا کہنا سی شہریار آفریدی پریس کانفرنس وچ بوکھلاہٹ تے خوف دا شکار ہوئے، چنگا ہوندا کہ اج اوہ اللہ تعالیٰ توں اپنے جھوٹھ تے توبہ کردے قوم توں معافی منگدے، دوجیاں تے الزام لانا بہت آسان اے پر ایہدا ثبوت دینا بہت مشکل منطقی انجام دیاں گلاں کرکے اج وی دھمکیاں دتیاں۔