وفاقی کابینہ نے نیب آرڈیننس 2019ء دی منظوری دے دتی، سمری صدر نوں ارسال

اسلام آباد: وفاقی کابینہ دی منظوری دے بعد نیب ترمیمی آرڈیننس 2019ء صدر مملکت نوں گھل دتا گیا اے۔ قومی احتساب بیورو 50کروڑ توں ودھ دی کرپشن تے کاروائی کرے سکے گا۔ تن مہینے وچ تحقیقات مکمل نہ ہون تے گرفتار سرکاری ملازم ضمانت دا حقدار ہووے گا۔ تفصیلات دے مطابق حکومت نے نواں نیب آرڈیننس لیان دی تیاری کر لئی اے۔ وفاقی کابینہ دے ارکان نے ترمیمی آرڈیننس 2019ء دی سرکولیشن سمری دی منظوری دے دتی جہدے بعد ایہنوں منظوری لئی صدر مملکت نوں گھل دتا گیا اے۔

آرڈیننس دے مطابق سرکاری ملازم دی جائیداد نوں عدالتی حکم نامے دے بغیر منجمد نہیں کیتا جا سکے گا۔ اثاثیاں وچ بے جا وادھے تے اختیارات دے نجائز استعمال دی کاروائی ہو سکے گی۔ محکمانہ نقائص تے سرکاری ملازماں دے خلاف کاروائی نہیں ہووے گی۔ تن مہینے وچ نیب تحقیقات مکمل نہ ہون تے گرفتار سرکاری ملازم ضمانت دا حقدار ہووے گا۔مجوزہ آرڈیننس دے مطابق نیب 50کروڑ توں ودھ دی کرپشن تے سکینڈل تے کاروائی کر س کے گا۔ ٹیکس، سٹاک ایکسچینج تے آئی پی اوز بارے معاملات وچ نیب دا دائرہ اختیار ختم ہو جاوے گا۔

آرڈیننس دے مطابق ایہناں معاملات تے ایف بی آر، ایس ای سی پی تے بلڈنگ کنٹرول اتھارٹیز کاروائی کر سکن گے۔ زمین دی قیمت دے تعین لئی نیب، ایف بی آر یاں ڈسٹرکٹ کلیکٹر دے طے کیتے ریٹاں توں رہنمائی لوے گا۔