سب کجھ پرانا…نواں کوئی نہیں

لکھت: فاروق ندیم

اوہو سڑک تے اوہدیاں ذیلی سڑکاں ، کوئی کوئٹہ تے پشور ، کوئی کراچی تے گلگت، کوئی سدھا تک کشمیر، اوہو میں تے پیدل مارچ۔ سب کجھ اوہو، کوئی فرق نہیں۔ سب کجھ پرانا نواں کوئی نہیں یاں فیر پرانے نوں نواں کہن دا رواج، جے ایہ نواں اے تے پرانا کیہ سی؟ اوہ کہندے نیں پرانے نوں پرانیاں نے پرانا کیتا۔ ہر برائی پرانیاں دے سر، اسیں نویں آں۔ سب کجھ نواں کیتا جو کہنے آں سچ منو جے سچ منو تے بچے نوں بے لباس بادشاہ ننگا ای لگدا اے۔ جے اوہناں دا سچ نہ منو تے اپنے اندریں اپنا سچ۔ باہر تے سب کجھ اوہو پرانا بلکہ پرانے توں وی پرانا ، اوہو سڑک تے اوہدیاں ذیلی سڑکاں، اوہو میں تے پیدل مارچ سب کجھ اوہو کوئی فرق نہیں۔
سب کجھ پرانا نواں کوئی نہیں۔ پہلی ڈولی تے پالکی سی ہن کروڑ پونے کروڑ دیاں دندناندیاں ہیوی ویٹ گڈیاں۔ وچ کوتوال، رئیس شہر، بیورو کریٹس، مُلا، مفتی، قاضی، تاجر، صنعت کار، زمیناں والے، سیاستدان، حکومت تے اپوزیشن والے، بن دے سردے سرمایہ دار، اختیار تے اقتدار دی نکیل پھڑن والے تے شہردیاں چوکاں وچ اوہو دیہاڑی دا مزدور، مستری تے نوکری لبھن والے، غولاں دے غول، دن ادھا اُڈیک وچ لنگھ جاندا اے کم نہیں ملدا۔ گھروں لیاندی باسی روٹی نال ڈھڈ بھرو، کھوکھے توں پانی منگ کے پیو، روٹی نال چٹنی کوئی نہیں، ہریاں مرچاں پنجاہ رُپیے ’’پائیا‘‘ چلو گولی مارو، گنڈھے نال ای روٹی نبیڑو، اگوں پیاز سو رُپیے کلو، نری خالی روٹی کہڑا چک وڈھدی اے۔ اوسے باسی روٹی دے ٹکڑیاں نوں چک مارو، اج فیر دیہاڑی نہیں لبھی۔ اٹھو، کپڑا جھاڑو، موہڈے رکھو گھر نوں جاؤ خورے کل ای دیہاڑی لگ جائے۔
اوہو سڑک تے اوہدے آسے پاسے اوہو ’’رومن اکھاڑے‘‘ تے وچ اکھاڑے بھکھی جنتا واہ واہ پئی پکارے۔ بادشاہاں شہنشاہاں دی خیر بُلاوے، اکھاڑے دے ’’پڑ‘‘ وچ قیدی باغی چھڈے جاندے تے باغیاں اُتے بھکھے شیر وی چھڈے جاندے تاش بیناں دا شور مرن والیاں اُتے ٹھٹھے مخول سب کجھ پرانا اج وی اوہو نواں کوئی نہیں۔ سڑک دے آسے پاسے اکھاڑے باہر کوٹھیوں اُچیاں ’’پیناں فلیکساں‘‘ اُتے تصویراں تھلے لکھیا ’’اسیں امن دے خواہاں سانوں عالمی سطح اُتے بڑے وڈے وڈے چیلنجاں دا سامنا پبلک لئی ٹائم کوئی نہیں ۔ سوری‘‘
مشکل معاشی صورتحال نے کہڑا ساڈی ٹنگ بھن لئی اے ایس اوس چوں کل آئے آں۔ مشکل وقت اے ، برداشت کرو، صبر کرو، بھلے دن آن گے۔
مینوں راتیں خواب آیا اے مالیاتی خسارہ گھٹ ہو گیا اے۔ مہنگاآٹا بُھل جاؤ ، کنک نوں افغانستان جان دیو۔ بریانی لئی پیسے ہن تے ریڑھی توں بریانی کھاؤ پیسے نہیں تے ککھسماں نوں کھاؤ، استخارہ کرو، لوٹا گھماؤ، خواب ویکھو، کدوں روٹی روزی لبھے گی۔
اکھاڑے باہر چورن ویچن والے مولوی صاحب پِٹی جا رہے نیں مسلماناں دے مقدر ای بھیڑے نیں ہندوستان وچ شہریت قنون نے جینا اوکھا کیتا اے۔ کشمیر وچ مودی ملعون نے، روٹی تے بھکھ غیر شرعی تے فحش الفاظ نیں۔ ایہناں نوں ڈکشنری چوں کڈھو ملین مارچ کرو، بیت المقدس چھڑایئے ، سب ساڈے گناہواں دیاں شامتاں نیں۔
نویں اکھاڑے دے پِڑ وچ بیرکاں اندر ڈکے اوہو منگتے، روٹی دے بھکھن بھانے فقیر، بائی (22)کروڑ توں ودھ ہندسے۔ انسان نہیں، روڑے پتھر، قیدی چھڈو، قیدیاں اُپر بھکھے شیر چھڈو، تماش بینو، وجاؤ تاڑیاں، موت دا ناچ ویکھو، مرن والیاں دیاں ہڈیانی چیخاں نہ سنو، سواد لوو، ویلا اوہی، اوہی سڑک تے اوہدیاں ذیلی سڑکاں آسے پاسے اوہو سیاسی تھیٹر، مسخریاں دیاں قوالیاں، اوہو سرکس، اوہو جوکر جنتا بغیر سوٹی دے تار اُپر ڈِگے بھاویں ترے اوہو میلہ منڈی اوہو میجک شو سانوں ووٹ دیو اسیں ایس ملک نوں پیرس بنا دیاں گے بھاویں اِکو بارش دے صدقے وینس بن جائے۔ کھان پین نوں دل کرے تے کھان نوں چھڈو، پین نوں پھڑو، بوتل دا آخری پیگ، آخری گھٹ، آخری تُبکا وی اندر سٹو۔ جے موج مستی دی گنجائش نہیں تے کیڑے مار دوائی پی کے خودکشی کر لوو۔ رُڑھ گئے تے بیڑہ پار سَتے خیراں بچ گئے تے اقدام خودکشی دے جرم وچ چھترول برداشت کرو کیونکہ ملک و قوم لئی ایہ بڑا مشکل وقت اے۔ ازمائش دی سخت گھڑی اے، برداشت کرو، سب ٹھیک ہو جائے گا۔ اوہو پرانا بلکہ پاٹا پرانا راگ انتظار کرو تے دیکھو روٹی بُھلو، ووہٹی لبھو۔
اوہو سڑک تے اوہدیاں ذیلی سڑکاں آسے پاسے اوہو منظر ’’ری ماڈلنگ‘‘ نال وی گل لُکے نہ زخم مُکے نا۔ گل بنے نہ وچ بزاریں اوہو یوسف اوہو سُوتر اَٹی، سوداگراں ہتھ پنجرے، وچ طوطے، مالکاں دی چُوری کھاندے، نمک حلالی کردے، میاں مٹھو کہندے، وچ بزاریں اوہو قید کبوتر، مُل تارو ، ازاد کرو اُچ اسمانیں جاندے نہیں اپنی چھتری اُپر مُڑ آندے چھتری تھلے دانے۔ کھمب وڈھنے ، اخباراں وچ اوہو خبراں روز طراں دیاں حکومت اُتے تنقید کرن والے ملک دے خیر خواہ نہیں جیلاں دے وچ ادھے توں ودھ بغیر سزاواں قیدی، بیرکاں وچ عورتاں، بغیر پیو دے بال جمن والیاں اتحادی جماعتاں لئی انتظامی اقدامات، شورا لاؤ شورا، کوئی کھسکے نہ آٹا، پٹرول، بجلی، گیس دے ریٹ سنو تے نانکے چیتے آن ، عوام نوں گولی مارو مرکز صوبے مرضی دے افسر لاؤ، ڈنگ ٹپاؤ۔ ہر پاسے سیاسی بونے اُچی اڈی دے بوٹ پان والے جنتا سڑک اُتے اوہو سڑک تے اوہدیاں ذیلی سڑکاں سب کجھ اوہو کوئی فرق نہیں سب کجھ پرانا، نواں کوئی نہیں۔ اوہو میں تے پیدل مارچ یا فیر پرانے نوں نواں کہن دا رواج۔