سارا غصہ خواجہ آصف تے کیوں؟

لکت:رئوف کلاسرا

ساڈے دوست محمد مالک دے پروگرام وچ اینکر کاشف عباسی نے انکشاف کیتا کہ جدوں لندن توں نوازشریف صاحب نے خواجہ آصف نوں ایہ پیغام دے کے گھلیا کہ آرمی ایکٹ تے کوئی چوں چراں کیتے بناں اوہناں نے ووٹ پانا اے تے ایہدے تے پارٹی دے اندر کجھ لیڈراں نے ردعمل دتا۔ اوہناں نے باقاعدہ ناں لے کے آکھیا سابق وزیراعظم شاہد خاقان عباسی تے بہت ناراض ہوئے اوہناں دی ناراضی اینی ودھ گئی کہ جہڑے واٹس ایپ گروپ وچ ایہ ساری بحث ہو رہی سی اوہدے توں خواجہ آصف نے اپنے آپ نوں باہر کر لیا۔ سب لوک ناراض سن کہ اچانک تن ورھے بعد پارٹی نے یوٹرن لے لیا اے تے کسے نال مشورہ تک نہیں کیتا گیا۔محمد مالک نے بڑی اہم گل کیتی کہ آخر خواجہ آصف نوں ای نوازشریف نے کیوں چنیا کہ اوہ پاکستان واپس جا کے ایہ پیغام پارٹی نوں دین کہ اوہ آرام نال آرمی چیف دی توسیع وچ ووٹ پان؟ ایہدا جواب مالک نے ایہ دتا کہ اک پارٹی رہنما دا کہنا اے کہ جدوں نوازشریف نوں سدھا تے بغیراگر مگر دے کوئی پیغام دینا ہوندا اے تاں جے کوئی ابہام نہ رہوے تے اوہ ایس کم لئی خواجہ آصف دا انتخاب کردے نیں کہ اوہ پیغام رسانی وچ کوئی غلطی نہیں کردے تے کوئی لفظ وی مس نہیں ہوندا تے اوہناں دا لہجہ ایہ دس رہیا ہوندا اے میاں صاحب چاہندے نیں کہ ایہ کم انج ہونا چاہیدا اے۔ہن سوال ایہ اے کہ پارٹی دے کجھ ایم این ایز صرف خواجہ آصف توں کیوں خفا نیں؟کاشف عباسی نے فیر چنگی گل کیتی کہ ایہ سب ناراض کارکن یاں ایم این ایز خواجہ آصف توں ناراض ہون دی بجائے تھوڑی جہی ہمت کردے تے فون چک کے نوازشریف یاں شہباز شریف نال براہ راست گل کر لیندے تے غصے دا اظہار کر لیندے۔ گل اوہی اے بہت سارے لیڈر اینی جرات نہیں کردے کہ اوہ اوہناں دے منہ تے اپنے غصے دا اظہار کر سکن۔ اپنے لیڈراں دے ساہمنے اوہ چپ رہ کے ایہ تاثر دین گے کہ اوہ ایہناں دی ہر گل نال اتفاق کردے نیں پر پیٹھ پچھے انج اظہار کردے نیں جیویں اوہ صاحب ایہناں دے ساہمنے ہون تے اوہ ایہناں نوں کچا چبا جان گے۔ مینوں ایہ واقعہ سن کے کجھ واقعات یاد آ گئے نیں۔ میں 2003وچ اپنی کتاب اک سیاست کئی کہانیاں تے کم کر رہیا سی تے چوہدری نثار علی خان نال ملیا۔ اوہناں نے پاکستانی وزیراں تے سیاستداناں بارے اک اہم واقعہ سنایا جہڑا ایہناں سب دی اوقات تے لیول نوں ظاہر کردا اے تے اج وی ایہ گل سب تے لاگو ہوندی اے۔ چوہدری نثار دسن لگے کہ میاں نوازشریف دوجی واری وزیراعظم سن تے چھ مہینے توں ودھ ویلا لنگھ گیا پر اوہناں نے کابینہ دا اجلاس نہیں بلایا سی۔ کجھ وزراء اوہناں نال ملے تے دسیا کہ بہت اہم سمریاں تے فیصلے ہون والے نیں پر نوازشریف نوں پروا نہیں اے تے نہ اوہ کوئی اجلاس بلاندے نیں تے نہ ای کوئی فیصلہ کردے نیں۔ چوہدری نثار نوں لگا کہ ایہ کجھ وزیر بہت غصے وچ نیں تے یقینا ایہ سب اپ سیٹ نیں۔ چوہدری نثار علی خان جہڑے اہم وزیر سن ، نے نوازشریف نال گل کیتی تے اوہ راضی ہو گئے کہ کابینہ دا اجلاس بلایا جاوے۔ جدوں اجلاس شروع ہون لگا تے چوہدری نثار نوں لگا کہ اج تے بہت فائر ورک ہووے گا ایہ وزیر نوازشریف تے اپنے غصے دا اظہار کرن گے کہ ویکھو تسیں چنگے وزیراعظم او چھ مہینے لنگھ گئے پر اجے تک تسیں کابینہ دا اجلاس تک نہ بلایا۔ جیویں ای اجلاس شروع ہویا تے چوہدری نثار دی حیرت دی حد نہ رہی جدوں اوہی وزیر جہڑے نوازشریف تے برس رہے سن کہ اجلاس نہیں بلاندے اوہ وزیراعظم دی اجہی تعریفاں تے خوشامداں کرن لگ گئے کہ چوہدری نثار شرمندہ ہو گئے۔ چوہدری نثار ورگا بندہ زیادہ دیر تک اجہی گلاں برداشت نہیں کر سکدا۔ اوہ اپنے آپ تے قابو نہ رکھ سکے تے کابینہ اجلاس وچ بول پئے کہ میاں صاحب میرا خیال اے کہ اک قنون لیایا جاوے جہدے تحت ایتھے کابینہ اجلاس وچ خوشامد تے پابندی لائی جاوے۔نوازشریف جہڑے ایس خوشامد دے مزے لے رہے سن ایہ سن کے ناراض ہو گئے تے آکھیا کہ اوہ ایہ گل بعد وچ وی کہہ سکدے سن۔ہن اوہی کم ہویا اے کہ سب لوک خواجہ آصف تے ناراض ہو گئے نیں کہ اوہناں نے ایہ پیغام کیوں دتا۔ گل اوہی کاشف عباسی دی ٹھیک اے جے تہاڈے لوکاں وچ ایناں غصہ اے تے کردار بہت وڈا اے تے فیر فون چکو تے سدھا لندن ملاؤ تے شہباز شریف تے نوازشریف نوں کھریاں کھریاں سناؤ کہ جناب تسیں ایہ کیہ فیصلہ کیتا اے تے سانوں شرمندہ کرا دتا اے سب دے ساہمنے، انج وی جے ویکھیا جاوے تے ایہ پہلی واری نہیں ہو رہیا جدوں شریف خاندان نے اپنے ساتھیاں نوں پچھے جیل وچ سڑن گلن لئی کلیاں چھڈ دتا تے آپ باہر نکل گئے۔ جے تہانوں یاد ہووے تے 1999ء دے ٹیک اوور دے بعد جدوں شریف خاندا نے جنرل مشرف نال ڈیل کیتی سی تے فیر وی ایہو کجھ ہویا سی کہ کنوں کن کسے نوں خبر نہ ہون دتی سی۔ اوس ویلے وی نوازشریف دے قریبی ساتھی جنرل مشرف دے نال ملن دی بجائے جیل وچ بیٹھے ہوئے سن پر نوازشریف خاندان نے صرف اپنی ذات لئی ڈیل ماری حالاں جے اوہ چاہندے تے کہہ سکدے سن کہ جیل وچ ایہناں دی پارٹی دے دوجے ساتھیاں نوں وی رہا کیتا جایو پر اوہناں نے اجیہا نہ کوئی مطالبہ کیتا تے نہ ای اوہناں نوںپتہ چلن دتا کہ اوہ کوئی اجہی ڈیل کر رہے سن۔ مینوں یاد اے کہ 2007ء وچ لندن وچ سندھ دے سابق وزیراعلیٰ غوث علی شاہ اکثر ڈیوک سٹریٹ دفتر وچ نوازشریف دے منہ تے آکھیا کردے سن کہ میں اٹک قلعہ وچ تہاڈے نال ای قید سی پر تسیں مینوں تک نہ دسیا کہ تسیں جا رہے او۔ شاہ جی بڑی معصومیت نال پچھدے سن: میاں صاحب تہانوں لیان لئی ایناں وڈا جہاز آیا سی ایس جہاز وچ ایس غریب مسکین سندھی لئی اک سیٹ وی نہیں سی؟ تسیں سانوں وی نال لے جاندے تے اسیں کلے جیل وچ نہ سڑدے رہندے؟ غوث علی شاہ نوں ایس گستاخی دی ایہ سزا ملی کہ جلاوطنی دے بعد جوں اقتدار ملیا تے ایہناں (غوث علی شاہ) نوں چک کے باہر ماریا جو ایہناں لئی جیلاں بھگتدے رہے سن تے اوہناں دی تھاں ممنون حسین نوں صدر بنا دتا جہڑے اوہناں نوں دہی بھلے کھواندے سن۔ غوث علی شاہ نوں اج تک ایہ الفاظ کہن تے معافی نہیں ملی۔ ایسے طرح مشاہد حسین تے چودھری شجاعت حسین جنرل مشرف دے نال رل کے (ق) لیگ بنان دا وی ایہو جواز فراہم کردے سن کہ اوہناں نے نوازشریف دے نال دھوکا نہیں کیتا سی سگوں ایہ دھوکہ اوہناں دے نال نوازشریف تے شہبازشریف نے کیتا سی جدوں اوہ اوہناں نوں کلیاں جنرل مشرف دی جیل وچ چھڈ کے آپ آرام نال سعودی عرب دوڑ گئے سن۔ہن وی جے ویکھیا جاوے تے شریف خاندان نے تریخ نوں دہرایا اے۔ نوازشریف تے شہبازشریف نے پہلاں اپنے آپ نوں رہا کرا لیا فیر مریم نوازوی ضمانت تے باہر نکل آئیاں۔ نوازشریف نے اپنے بالاں نوں لندن مفرور کرا دتا شہباز شریف نے وی اپنے پتر سلمان شہباز نوں بیوی بالاں سنے لندن گھل دتا۔ شہباز شریف نے اپنے جوائی علی عمران نوں وی لندن مفرور کرا دتا حالاں جے ایہناں سب دے وارنٹ نکل چکے سن پر جہڑی محنت اوہناں نے اپنی ذات تے اپنے ٹبر لئی کیتی اوہ محنت تہانوں شاہد خاقان عباسی، سعد رفیق،سلمان رفیق، رانا ثناء، احسن اقبال تے پارٹی دے دوجے گرفتار لیڈراں لئی نظر نہیں آندی۔ ایہ سب ڈیل شریف خاندان اپنے لئی کردا اے تے اپنے فالوورز تے سیاسی لیڈراں توں توقع رکھدا اے کہ اوہ آرام نال جیل کٹن گے، سزاواں بھگتن گے تے داد دین اوہناں سب نوں ایہ سب آرام نال جیل وچ بیٹھدے نیں تے ایہناں سب دا غصہ ایناں سمجھدار اے کہ ایہ صرف خواجہ آصف تے ای نکلدا اے شریف خاندان تے ہیں جہڑے لندن جان توں پہلاں اپنے اوہناں گرفتار ساتھیاں لئی اوہی ڈیل لین دی کوشش نہیں کردا جو اپنے خاندان لئی لئی ہوندی اے۔شریف خاندان ایہناں سب گرفتار لیڈراں لئی لندن ول گامزن قطری جہاز تے ایس طرح کوئی سیٹاں نہیں کڈھ سکیا جیویں 20ورھے پہلاں اوہناں قطریاں دے گھلے ہوئے وڈے خالی جہاز وچ نوازشریف دے نال اٹک قلعے دے سیل وچ قید غوث علی شاہ لئی اک سیٹ نہیں نکلی سی!