پاکستان دی کامیاب خارجہ پالیسی

لکت:  اعجازعلی ساغر

پچھلے کئی دناں توں بھارت وچ صف ماتم وچھیا ہویا اے تے بھارتی میڈیا چیخ چیخ کے کہہ رہیا اے کہ پاکستان عالمی طاقتاں دا فیورٹ ملک بن دا جا رہیا اے جد کہ بھارت دنیا وچ کلا ہوندا جا رہیا اے بھارت دے سیاستداناں خصوصاً اپوزیشن نے عمران خان نوں مودی دے مقابلے وچ بہترین وزیراعظم قرار دیندیاں آکھیا عمران خان نے موثر سفارتکاری تے بہترین حکمت عملی نال پوری دنیا وچ اپنا تے پاکستان دا وکھرا مقام بنا لیا اے بھارتی میڈیا جہڑا 7اگست تک رولا پا رہیا سی کہ پاکستان نوں فٹیف نے بلیک لسٹ کر دتا اے اوہی میڈیا اج چیخ چیخ کے کہہ رہیا اے کہ چین، امریکہ، برطانیہ، جاپان، فرانس، نیوزی لینڈ تے آسٹریلیا نے پاکستان دے حوالے نال اپنی خارجہ پالیسی وچ تبدیلی دا اشارہ دتا اے تے پاکستان دے موقف دی تائید کیتی اے ایہ ممالک بڑی جلدی پاکستان توں سفری پابندی ختم کرن دا اعلان کر رہے نیں جیویں برطانیہ نے کیتا اوہنے پاکستان نوں سیاحت دے لحاظ نال محفوظ ترین ملک قرار دتا اے جاپان تن لکھ پاکستانیاں نوں روزگار فراہم کرن دا معاہدہ سائن کرن جا رہیا اے جہدے نال نوجواناں نوں بہترین روزگار میسر آوے گا تے غربت وچ کمی واقع ہووے گی۔ عالمی پابندیاں دا شکار ملک دنیا دی سطح تے اک بہترین ملک بن کے ابھر رہیا اے بیرونی سرمایہ کار سرمایہ کاری لئی بھارت دی بجائے پاکستان نوں ترجیح دے رہے نیں امریکہ ورگے ملک نے وی پاکستان دے حوالے نال کھل کے اظہار کیتا اے بھارت نوں ایس گل تے مروڑاٹھ رہے نیں کہ پاکستان کیوں امریکہ دی اکھ دا تارا بن دا جا رہیا اے پچھلے ہفتے امریکی نائب وزیر خارجہ ایلس ویلز نے جنوبی ایشیا دا دورہ کیتا تے پاکستان اپڑن دے بعد اوہناں نے افغان مفاہمت عمل تے دہشت گرداں دے خلاف پاک آرمی دی طویل جنگ وچ کامیابی تے بیرونی فنڈنگ روکن تے پاکستان دے کردار دی تعریف کیتی تے امریکہ واپس جا کے اہم پریس کانفرنس کردیاں ہوئیاں اعلان کیتا کہ امریکہ پاکستان نوں فنانشل ایکشن ٹاسک فورس (فیٹف) دی گرے لسٹ توں نکلن وچ مدد فراہم کرے گا ایس دوران عمران خان دی بہترین خارجہ پالیسی دا عکس ویکھن نوں ملیا جدوں پاکستان وچ مقیم برطانوی ہائی کمشنر ڈاکٹر کرسٹائن ٹرنر نے اپنے اک ویڈیو پیغام وچ آکھیا کہ پاکستان اک محفوظ تے خوبصورت ملک اے اسیں اپنی ٹریول ایڈوائزری تبدیل کررہے آں اوہناں نے برطانوی شہریاں نوں پاکستان دے شمالی علاقے ویکھن دی وی دعوت دتی تے خاص کر پاک آرمی دے کردار نوں سراہیا حالیہ امریکہ ایران کشیدگی وچ پاکستان دی بہترین سفارتکاری ساہمنے آئی تے وزیراعظم پاکستان عمران خان نے وزیر خارجہ شاہ محمود قریشی تے آرمی چیف نوں دوواں ملکاں دے ہنگامی دورے کرن نوں آکھیا تے خطے وچ تیجی عالمی جنگ دے منڈلاندے خطرے نوں موثر انداز وچ ختم کرن لئی ٹاسک دتا تے آپ وی عالمی رہنماواں نال رابطے وچ رہے ایس لڑائی وچ پاکستان اک موثر ترین ملک دے طور تے ساہمنے آیا تے عالمی برادری پاکستان دے کردار دی معترف ہوئی تے عمران خان بطور بہترین لیڈر ساہمنے آئے۔ عمران خان دی قیادت وچ پاکستان نے افغان طالبان تے امریکہ نوں ٹیبل ٹاک تے لیان وچ اہم کردار ادا کیتا جہدی وجہ نال امریکہ دی نظر وچ پاکستان دی پوزیشن ہور مستحکم ہو گئی اے امریکہ جلد پاکستان توں پابندیاں دے خاتمے دا اعلان کرن والا اے جہدے نال پاکستان دی سیاحت نوں بہت فروغ ملے گا پچھلی حکومتاں دی غلط پالیسیاں دی وجہ توں پاکستان خطے وچ کلاّ ہو گیا سی تسیں پچھلے پنج ورھے وچ خارجہ پالیسی نوں ویکھو تے ایہناں پنج ورھیاں وچ وزیر خارجہ دا قلمدان کسے نوں نہیں دتا گیا تے میاں نوازشریف ملک دی بجائے ذاتی کاروبار دی تشہیر کردے رہے تے بھارت نال پیار دیاں پینگھاں پاندے رہے جہدے نال خطے وچ اسیں کلّے جد کہ بھارت مضبوط ہوندا گیا۔عمران خان نے اقتدار سنبھالدیاں ای خارجہ پالیسی نوں نویں سرے توں ترتیب دتا تے بہترین سفارتکاراں نوں پاکستان دا سفیر تعینات کیتا اوہناں نے منجھے ہوئے کھڈاری شاہ محمود قریشی نوں وزیر خارجہ مقرر کیتا تے فیر ہولی ہولی رُسے ہوئے دوستاں نوں وی قریب لے آئے۔ ملائیشیا، ترکی، چین، ایران سنے یورپی ممالک وی پاکستان دے نیڑے آن لگے ۔ ایہ بہترین تے مخلص قیادت دا نتیجہ اے عمران خان دی صورت وچ پاکستان نوں اک عالمی لیول دا رہنما ملیا اے جہڑا ایس ملک نوں ترقی دی بلندیاں تے اپڑانا چاہندا اے پاکستان کامیاب خارجہ پالیسی دی وجہ توں تنہائی توں نکل آیا اے تحریک انصاف تے عمران خان دا مشن پوری دنیا وچ پاکستان دا سافٹ امیج پیش کرنا اے جہدے نال ایہ ملک دن دگنی رات چوگنی ترقی کرے گا۔