ڈاکٹر اجمل نیازی دی بیماری

لکھت: ڈاکٹر اخترشمار

پے در پے مصروفیات پاروں بعض ویلے کسے دوست دی علالت دا سن کے، ویلے سر مزاج پرسی تے وی نہیں جایا جا سکدا اے، کجھ ایہو حال ہویا ایس شہر وچ اپنے محسن ڈاکٹر اجمل نیازی دی عیادت دے سلسلے وچ وی….اپنے وڈے بھرا دی وفات تے اک ہور خاندانی مصروفیات پاروں ویلے سر اجمل نیازی نوں ویکھن نہ جا سکیا، اگلے دیہاڑ شعبہ اردو دے رفیقان ڈاکٹر نجیب جمال، ڈاکٹر غفور شاہ قاسم تے ڈاکٹر شاہد اشرف دے نال اسیں نامور کالم نگار شاعر تے درویش صفت انسان ڈاکٹر اجمل نیازی دی عیادت کیتی تے کجھ دیر اوہناں دے نال رہے، اوہناں دی آواز مدھم ہو چکی اے پتہ چلیا سرکاری ہسپتال دے ڈاکٹراں دی غفلت پاروں ایہ سب کجھ ہویا، ہن اوہ ڈیفنس دے اک غیر سرکاری ہسپتال دے ڈاکٹر توں علاج کرا رہے نیںاجمل نیازی دے چہرے تے اوہی شادابی اے اوہناں نوں شوگر وی اے چلن پھرن توں قاصر نیں پر اپنی قوت ارادی پاروں ہشاش بشاش وکھائی دیندے نیں اوہناں نوں جے کجھ ملال اے تے اپنے احباب توں اے جہناں نے پلٹ کے اوہناں دی خبر نہ لئی۔ نوائے وقت ورگے اخبار وچ اک عمر توں کالم لکھ رہے نیں بہت سارے دوستاں نوں اپنے کالم وچ پروجیکشن دیندے نیں پر ادبی صحافتی حلقیاں توں وی بہت گھٹ دوستاں نے اوہناں دی مزاج پرسی کیتی…. اوہ ایس حالت وچ وی اپنے احباب نوں یاد کردے نیں شاعر ادیب لئی ادبی محفلاں آکسیجن دا درجہ رکھدیاں نیں جدوں کوئی تخلیق کار صاحب فراش ہو کے اپنے گھر دے کمرے تک محدود ہو جاندا اے تے اوہنوں اوہ سارے دوست وی یاد آندے نیں ادبی محفلاں وی….ایہناں حالات وچ جے اسیں اہل قلم ایس علیل ادیب شاعر دا حال تک نہ پچھیے تے بیمار لئی ایہ سب کجھ اک صدمہ بن جاندا اے۔ ڈاکٹر سلیم اختر، ڈاکٹر انور سجاد، افتخار مجاز، سلیم کاشر تے کئی دوجے اہل قلم اجہی تنہائی دے کرب نال دوچار رہے پر ایس مصروف زندگی وچ ہن اسیں قلم وی غمی و خوشی لئی فیس بک تے وٹس اپ تک محدود ہو کے رہ گئے آں، ٹریفک تے فاصلیاں نے وی لکھاریاں نوں اک دوجے توں دور کر دتا اے ہن خیر خبر لئی سوشل میڈیا ای واحد سہارا اے تے جہڑے لوک سوشل میڈیا تے نہیں اوہ زندگی دی سکرین تے وی گھٹ وکھائی دیندے نیں، ایتھے تے ہر صبح اٹھ کے آواز لانی پیندی اے کہ میں اجے زندہ آں ایہ حاضری وی شاید ویلے دی لوڑ اے، ڈاکٹر اجمل نیازی نے اہم اخبار وچ کالم لکھ کے وی اجہی پی آر نہیں بنائی کہ اوہ حکمران، وزیراں، مشیراں تے اعلیٰ سرکاری افسراں وچکار وکھائی دیندے، خیر ایہ تے اپنے اپنے مزاج دی گل اے بعض معمولی درجے دے لکھاری (کالم نگار) وی محدود سرکولیشن دے اخبار وچ کالم لکھ کے حکمراناں تے سرکاری افسراں دی کاسہ لیسی کردے نیں تے موج میلہ دی تصویراں سوشل میڈیا تے شیئر کرکے اپنا اثر و رسوخ بنائے پھردتے نیں، اجمل نیازی اک اہم کالم نگار نیں پر اوہناں نے ایس توں شاید ای کوئی فائدہ چکیا ہووے، اصل وچ اوہ اک تخلیقی شخصیت دے مالک نیں تے تخلیقی انسان وچ اک خو د داری تے مثبت انا وی ہوندی اے اوہ میں میں بہت گھٹ کردے نیں اوہناں نوں حکمراناں دے چاء پانی تے اوہناں دے نال تصویراں دا کوئی شوق وی نہیں ہوندا، نہیں تاں اوہ وی ساڈے بعض احباب وانگوں ہر حکومت دے بااثر بندیاں دی نک دا وال ہوندے، اجمل نیازی نے منیر نیازی نوں ہمیشہ اپنے قبیلے دا سردار آکھیا تے لکھیا منیر نیازی ورگے تخلیق کار دی خوشامد وی جائز اے۔ ساڈے وچوں کون نہیں جاندا کہ قلم گروی رکھ کے ایتھے کیویں دنیا کمائی جاندی اے ادیب شاعر تے سماج دا ترجمان ہوندا اے۔ اوہدا مزاج عوامی ہوندا اے اک سچا کھرا تخلیق کار ہمیشہ حزب اختلاف دا کردار ادا کردا اے۔ اجمل نیازی اوہناں وچوں اک اے، اوہ بارش تے پرندیاں دے خواباں ورگا بندہ اے۔بیمار ہون توں پہلاں اکثر فون تے اوہدی آواز سنن نوں ملدی یار اختر شمار ہن شہر وچ کوئی سرگرمی نہیں بندہ کتھے جاوے، کدی کدی اچانک اوہ کالج وچ میرے دفتر آ جاندا تے اسیں کافی دیر تک گلاں کردے۔اک واری اوہنے آکھیا اختر شمار پُھلاں نوں پھپھوندی لگن لگے تے تتلیاں خودکشی تے راضی نظر آن تے سمجھنا زوال دا عروج آ گیا اے اوس ویلے شاعری فریاد کرے گی تے کتاباں وچ بچھو تے کاکروچ رینگن لگن گے ایس گل توںمیں کافی دیر تک اداس رہیا۔عزیز قارئین! اج محفلاں وچ خمار آلود تے شاعرانہ گل بات کرن والے دی آواز مدہم ہو گئی اے۔ اجمل نیازی اپنے آپ نوں پٹھان کہندا اے پر اوہ اندروں پاکستانی لگدا اے، اوہنے عمران خان لئی وی کئی کالم لکھے اوہ عمران خان دی دھرتی دا سپوت اے پر عمران خان خوشامدیاں تے الجھناں وچ گھرے ہوئے نیں اوہناں نوں تے شاید کسے نے دسیا وی نہ ہووے کہ اوہدے دیس دی مٹی دا بنیا ہویا محبت دا پیکر علالت دی چادر لھویٹے لہور دے دل وچ اک کونے وچ پیا اے، اوہنوں بزدار دے گلدستے دی لوڑ نہیں اوہنوں محبت دے دست شفقت دی لوڑ اے، جہڑا اہل قلم لئی بنائے جان والے ادارے اکادمی ادبیات پاکستان دے کول نہیں اے۔اوہ اپنا مہنگا علاج آپ کر رہیا اے پر اوہدی خود داری نے اوہنوں چپ لا دتی اے۔ لہور دی زندہ شاماں وچ قہقہہ لان والا جدوں ہر پاسے بے حسی افراتفری تے منافقت ویکھدا اے تے اوہ ہونٹ سی لیندا اے، اوہ سرگوشیاں وچ گل کردا اے پر صرف اپنے دوستاں نال اوہنوں زمانے دی ناقدری دا گلہ نہیں، اوہ لہور دے پرانے دوستاں عطاء الحق قاسمی، امجد اسلام امجد نوں یاد کردا اے، سعید آسی جہڑا اوہدے اخبار دا ساتھی اے اوہدی ناالتفاتی تے وی انگشت بدنداں اے، یار لوک اوہنوں اوہدی مروت نال لٹدے رہے نیں اوہدا ناں استعمال کرکے مفادات حاصل کردے رہے نیں پر جاندیاں وی ایہ معصوم بندہ چپ چاپ دھوکہ کھاندا رہیا اے۔لوک دوستاں نوں وانس دی پوڑھی بنا کے اگے نکل گئے پر اوہنے وانس نال بانسری بنا لئی تے اپنی دھن وچ محبت دے گن گاندا رہیا دوستو! بھلے اج محبت دی کرنسی دی وقعت نہ ہووے پر اوہ زندہ دل لہور دی آخری کجھ نشانیاں وچوں اک اے آؤ اوہدی صحت یاب ہون دی دعا کریئے