آکھن لوک سیانے

بھاہ لاون کِیتے ہِک چنگاری بہؤں اے
معنے:لاون کِیتے: لان لئی٭ بہوُں: بُہت
ویروا:مت دِتی گئی اے لوکاں وِچ پیار مُحبت دی سِکھیا دین تاں اؤکھا کم اے پر فساد کرانا اِک پل دا کم ایں۔جِویں کِسے وی شَے نُوں اگ لان کوئی وی اؤکھا کم نہیں ۔ اگ تاں بس اِک چنگیاڑے نال وی لائی جا سکدی اے۔اصل کم لگی اگ نُوں بجھاون ایں جو اؤکھا کم ایں۔
بھٹھ یاری کمِینے دی’ اشراف پالے تِل’بادشاہواں دے پُتر باز پلِیندے’ مُورکھ پالے اِل
معنے:تِل: تھوڑا واسطہ٭ پلِیندے: پالدے٭ مُورکھ: احمق٭ اِل: چِیل۔
ویروا:مت دِتی گئی اے پئی بھَیڑے بندے دی یاری لَے کے بہ جاندی اے اتے بھلے مانس بندے نال تھوڑا تعلق واسطہ وی ہووے تاں وی اؤکھے ویلے کم دے جاندا اے اتے اوس سانجھ دی شرم کردا اے۔بادشاہواں دے پُتر اپنے شؤق لئی سدا باز پالدے نیں جدوں کہ احمق لوک اِلّاں پالدے پھِردے نیں۔
بھجدے دے پِچھے کؤن بھجے
معنے:بھجدے: دؤڑدے۔
ویروا:مت دِتی گئی اے پئی گل تاں کِسے نُوں تاں ای سنائی جا سکدی اے جے کوئی کھلو کے سُن لوے پر جے اگلا بندہ نٹھدا ای جاندا ہووے تاں اوس دے پِچھے نٹھ کے تاں کوئی گل سنانوں رہیا۔اہ تاں کھلوکے آرام چین نال ای سنائی جا سکدی اے۔
بھجدیاں پِچھے مُول نہ بھجّیں’ کلر بِیج نہ ہارِیں/ بھنے دے پِچھے موُل نہ بھجیِں’ کلر بیِج نہ ہاریں
معنے: بھنّے : نٹھدے ہوئے ٭ہارِیں: ازایاں کرِیں۔
ویروا:مت دِتی گئی اے پئی بندے نُوں دؤڑدے جاندے بندے دے پِچھے نٹھ کے اوس نُوں نہیں رلنا چاہیدا۔ جیاوہ آپوں کھلوکے پِچھلے نُوں رلا لوے تاں ٹھیک اے۔ اتے کلراٹھی بھوئیں وِچ بِیں پان دا کوئی فائدہ نہیں ہوندا۔اوہ بس بی پا کے ازایاں کرن والی گ ہوندی اے اُگنا تاں اوس ہوندا نہیں۔ ٭