سچ آکھن سیانے

پنجیِں مِیت تے پنجاہیں ساک نہیں چھڈنا چاہیِدا
معنے: پنجِیں: پنجاں روپیاں
ویروا: مت دِتی گئی اے پئی تھوڑے بؤہتے پَیسے دا گھاٹا کھا کے وی اپنا یار نہیں گوانا چاہیدا اتے اوس نال بھرم بھا بنائی رکھنا چاہیدا اے ۔اتے جے کِسے ساک لئی چوکھا گھاٹا وی کھانا پَے جاوے تاں اوہ جر لَینا چاہیدا اے۔پر ساکی نُوں بج نہیں لانی چاہیدی۔
پِنڈ اجاڑیا چؤہدریاں’ وساون والا کؤن
معنے: اُجاڑیا: برباد کیتا
ویروا: مت دِتی گئی اے پئی جدوں پِنڈ دے چؤہدری ای پِنڈ دے اجاڑے تے لک بنھ لَین تاں اوس نُوں ہور کوئی کِویں آباد کر سکدا اے۔حالاں پِنڈ دے چؤہدری نُوں تاں سارے پِنڈ دے ہر ماڑے غُربے دی عِزت اتے مال ڈنگر دا راکھیوان ہونا چاہیدا اے۔جے اوہ ایہ نہیں کردا تاں اوہنوں راٹھ کؤن آکھے گا اوہ تاں مُڑ رسہ گیر ای اکھوائے گا۔
پِنڈاں والے اگانہ’ کُتا پِچھانہ
معنے: اگانہ: اگے٭ پِچھانہ: پِچھے۔
ویروا: ایس اکھان وِچ مَت دِتی گئی اے پئی کُتا تاں ہر ویلے اپنے مالک دے نال نال ای رہندا اے ۔ پر جے مالک اگیرے ٹُر جاوے اتے اوسدا کُتا پِچھے رہ جاوے اتے کِسے ہور دھیانے لگ جاوے تاں اوہ وی بد نسلا ای اکھوائے گا۔
پواندی سنویں جاں سرہاندی’لک وچکار ای آؤندا اے
معنے: پواندی: منجی دا ہیٹھلا پاسہ
ویروا: مت دِتی گئی اے پئی بندہ جو مرضی وی کر لوے اوس نُوں جو کُجھ اؤکھت جرنی پَینی ایں اوس توں اوسدی خلاصی نہیں ہو سکدی۔اوہ تاں اوس نال ہو کے ای رہنا ہوندا اے اوس توں اوہ چتر چالاکی نال بچ نہیں سکدا۔
پوتڑیاں دے وِگڑے’ کدے نہیں سؤر دے
معنے: پوتڑیاں دے وِگڑے: جو بچے جمدیاں ای وِگڑ جان٭ سؤردے: سنور دے۔
ویروا: مت دِتی گئی اے پئی ماں پیو نُوں چاہیدا اے پئی اپنے بال بچیاں نُوں نِکی عُمرے ای چنڈ دین۔ اتے جو بال نِکی عُمرے چوکھے پیار پاروں ماں پیو دے ہتھوں نِکل جان اوہ مُڑ کے ساری عُمر ہتھ نہیں آؤندے۔٭