الحمرا آرٹس کونسل لہور وچ نیشنل یوتھ کنونشن دا پربندھ

رپورٹ:عارف اے نجمی

یوتھ فورم پاکستان تے آئی ایس ایس یو پی پاکستان دی سانجھ نال الحمرا آرٹس کونسل لہور وچ نیشنل یوتھ کنونشن دا پربند ھ کیتا گیا جہدے وچ گبھروواں نوں اپنیاں صلاحیتاں وکھان دا موقع دتا گیا تے معاشرے نوں نشے توں پاک کرن وچ عملی طور تے حصہ لین تے زور دتا گیا کنونشن دے مہمان خصوصی ڈاکٹر محمد اختر وزیر توانائی حکومت پنجاب نے انتظامیہ نوں کامیاب یوتھ کنونشن منعقد کرن تے مبارکباد دتی تے گبھروواں دی بھیڑ ویکھ کے عملی طور تے پہلے دستے دے طور تے ملک پاکستان چوں نشے دے خاتمے وچ کردار ادا کرن نوں چنگا قدم قرار دتا۔ کنونشن دے گیسٹ آف آنر شجاع الدین ذکاء اکائونٹنٹ جنرل پنجاب نے یوتھ فورم پاکستان دی کارکردگی نوں سراہیا تے آئی ایس ایس یو پی پاکستان نوں حکومت ولوں مکمل تعاون دا یقین دوایا۔ یوتھ فورم پاکستان دے فائونڈر محمد اسلم نے طلبہ و طالبات تے پروفیشنل نے شرکت تے خوشی دا اظہار کیتاکہ ایہ پلیٹ فارم گبھرو نسل نوں ٹھیک پاسے اپنا کردار ادا کرن لئی تے نشے توں فرار لئی پہلا قدم قرار دتا یوتھ فورم پاکستان دے سرپرست اعلیٰ بشیراحمد ناز نے آکھیا کہ میں آخری ساہ تک گبھرو نسل نوں نشے توں بچان لئی اپنا تن من دھن قربان کر دیواں گا تے نشے توں پاک صحت مند معاشرے لئی گبھروواں دے موڈھے نال موڈھا جوڑ کے اپنا کردار ادا کرن دا یقین دوایا۔ یوتھ کنونشن دا سب توں ودھیا سگمنٹ پینٹنگ اینڈ پوسٹر کمپی ٹیشن سی جہدے وچ گبھروواں نے نشے دے حوالے نال لوکاں دے شعور نوں اجاگر کرن لئی اپنے اپنے فن پارے وی پیش کیتے تے مقابلے وچ حصہ لے کے پوزیشن حاصل کیتی۔ چوہاں صوبیاں دی نمائندگی کردے ہوئے کشمیر، گلگت تے بلتستان دے کلچر نوں خوبصورتی نال پیش کیتا گیا سارے پروفیشنلز نے اپنی اپنی پریذنٹیشن وچ خاص طور تے طلبہ لئی نالج شیئر کیتا آخروچ سارے پروفیشنلز ڈاکٹرز، سائیکالوجسٹ، سوشل ایکٹویٹ تے پوزیشن حاصل کرن والے بندیاں وچ شیلڈز تے ایوارڈ ونڈے گئے نیشنل یوتھ کنونشن دی میزبانی دے فرائض امبرکاشف خان تے معروف ٹی وی اینکر پرسن وسیم حسن اعوان نے سوہنے انداز وچ نبھائے۔