صدر صاحب تہاڈا شکریہ!

لکھت:محمد اکرم چوہدری

صدر پاکستان عارف علوی کہندے نیں کہ سرکار نوں مافیاز نال نبڑن لئی ہمت کرنی ہووے گی۔ آٹے دا بحران پیدا کرن والیاں دی چھٹی ہونی چاہیدی اے۔ اسیں آئی ایم ایف دے کول گئے تے جہڑے فیصلے کیتے ایہدا اثر مہنگائی دی صورت وچ نکلیا۔ بجلی تے دوجیاں شیواں تے سبسڈی ختم کرن نال مہنگائی ودھی پر ایہدے تے قابو پان دی لوڑ اے۔ اوہناں دا کہنا سی کہ آٹا بحران تے کجھ گورننس دے مسئلے وی سن، آٹا باہر نہیں ویچنا چاہیدا سی ویچیا گیا فیر قلت ہوئی تے منگوایا گیا، ایہ ٹھیک نہیں۔ آٹے دا بحران انتظامی معاملہ اے تے ایہنوں حل کرنا چاہیدا اے تے ذمہ دار بندیاں دے خلاف سخت کاروائی وی ہونی چاہیدی اے۔صدر پاکستان دے ایہ خیالات وزیراعظم عمران خان تک جانے چاہیدے نیں تے پچھلے اک ورھے دے سائرن وی اوہناں دی میز تے ہونے چاہیدے نیں ایہ کم وزارت اطلاعات و نشریات یاں وزیراعظم دے دفتر دااے کہ اوہ اوہناں نوں دسے کہ اسیں پچھلے اک ورھے توں کیہ لکھ رہے آں اوہناں نوں کیہ دسن دی کوشش کر رہے آں۔ اسیں اوہناں نوں مافیاز دا وی دسیا اے پر بدقسمتی اے کہ سب کجھ جاندیاں ہوئیاں وی اوہناں نے کوئی ٹھوس قدم نہیں چکیا۔ اپوزیشن دا تے کم ای احتجاج اے تے مہنگائی اک حقیقی مسئلہ اے ایہدے تے اپوزیشن احتجاج نہ وی کرے تے عوام تے سوشل میڈیا تے جو کجھ حکومت دے نال ہو رہیا اے اوہ اکھاں کھولن لئی کافی اے۔ بہرحال جناب صدرتہاڈا شکریہ کہ تسیں آٹے دے بحران نوں انتظامی نکامی قرار دتا اے۔ عین ممکن اے سچ بولن تے وزیراعظم تہاڈے توں ناراض وی ہو جان کیوں جے سانوں تے سچ بولن تے مافیا دی نشاندہی تے عوامی مسئلیاں نوں اجاگر کرن تے ایہو پیغام ملیا سی کہ وزیراعظم بہت ناراض نیں۔ سائرن تے وجن لئی اے تے وجدا ای رہوے گا۔ہن ذرا کجھ خبراں دا سوالیہ جائزہ لینے آں۔ کیہ مہنگائی حکومت دے غیر سنجیدہ رویے دی وجہ توں اے؟؟؟سادہ جواب بالکل، غیر سنجیدہ رویہ تے چھوٹا لفظ اے ایہدے توں وی سخت الفاظ دا استعمال کیتا جا سکدا اے۔ وزیراں نوں ایہ سمجھ ای نہیں اے کہ پرائس کنٹرول کہڑی بلا دا ناں اے تے ایس شعبے وچ کیویں بہترین لیائی جا سکدی اے۔ قیمتاں نوں قابو وچ کیویں رکھنا اے تے سٹیک ہولڈراں نوں نال کیویں ملانا اے۔کیہ حکومت مہنگائی تے قابو پا سکدی؟؟؟جیویں دے فیصلے ویکھن نوں مل رہے نیں مشکل اے کہ موجودہ ٹیم دے نال ایس شعبے وچ کوئی بہتری ممکن اے۔ نہ صرف ٹیم سگوں منصوبہ بندی و حکمت عملی وی تبدیل کرن دی لوڑ اے جے نہیں کردے تے فیر عوامی غیض و غضب دا ساہمنا کرنا پوے گا۔ عوام باہر نہ وی نکلے تے کوئی بے بس اللہ نوں پکارے گا ممکن اے اوہدی بددعا سنی جاوے تے ویلا پورا ہو جاوے۔ کجھ وی ممکن اے۔ بعض وفاقی وزیراں ولوں وزیراعظم دے ریلیف پیکیج دی مخالفت کیوں ہو رہی اے؟؟ مخالفت کرن والے وزیراں دا موقف ٹھیک اے۔ یوٹیلیٹی سٹوراں دے راہیں کدی مہنگائی تے قابو نہیں پایا جا سکدا ایہ ادارہ تے آپ مسئلیاں نال دوچار اے عوامی مشکلات خاک گھٹ کرے گا۔ مخالفت کرن والے وفاقی وزراء وزیراعظم دے خیر خواہ نیں۔ وزیراعظم نوں ایہناں وزیراں دی گل ضرور سننی چاہیدی اے۔ ایہ موقف ٹھیک اے کہ یوٹیلیٹی سٹوراں تے لائناں لان نال مہنگائی گھٹ ہووے گی نہ حکومت نوں فائدہ ہووے گا نہ عوام لئی آسانی پیدا ہووے گی۔ وزیراں دا ایہ موقف وی ٹھیک اے کہ ایہدے توں چنگا اے کہ پٹرول تے ڈیزل دی قیمتاں وچ کمی کر دتی جاوے۔وزیراں نے مخالفت ایس لئی وی کیتی اے کیوں جے اوہ یوٹیلیٹی سٹوراں دی حقیقت وں واقف تے جاندے نیں کہ کم ٹھیک ہون دے بجائے ہور وگڑے گا۔ یوٹیلیٹی سٹورز آپ بے پناہ مسئلیاں دا شکار نیں۔ حکومت دے اجہے اقدامات نال اسیں سٹھ ستر دی دہائی وچ واپس جا رہے آں ایہ 2020اے ایہدے اپنے تقاضے نیں جے ایہناں تقاضیاں دے مطابق اقدامات نہیں کیتے جاندے تے سب دا نقصان اے۔قومی اسمبلی وچ مراد سعید دی شعلہ بیانی کس حد تک ٹھیک اے؟؟ایس حد تک تے ٹھیک اے کہ اپوزیشن تے چڑھائی کر دتی جاوے اوہناں نوں بولن دا موقع نہ دتا جاوے پر سوال ایہ پیدا ہوندا اے کہ کیہ وزراء اوتھے صرف بیان بازی لئی موجود نیں۔ اج تے مہنگائی دے علاوہ اسمبلی وچ کوئی گل ای نہیں ہونی چاہیدی سی بلاول بھٹو سمارٹ کھیڈے تے حکومتی بنچاں دا رخ اصل مسئلے توں موڑ دتا۔ اصولی طور تے اشیا خوردونوش دیاں قیمتاں دے علاوہ کسے وی قسم دی بحث دی کوئی لوڑ نہیں سی۔ ن لیگ دا پارلیمنٹ دے باہر مہنگائی دے خلاف احتجاج! پارلیمنٹ دی موجودگی وچ احتجاج لئی باہر آ کے ایہ احتجاج کرن دی کیہ لوڑ اے۔ اصل کم عمارت دے اندر اے پر سیاسی پوائنٹ سکورنگ لئی باہر دا ماحول زیادہ چنگا لگدا اے ایس لئی اپوزیشن والے اوتھے جمع ہوندے نیں۔ ریلوے نوں خسارے توں کڈھ کے منافع بخش بنان دا پلان سپریم کورٹ وچ جمع!!ایس پلان دا عدالت وچ کیہ کم اے۔ وزیر ریلوے کیہ عوام نوں دسن گے ہن تک ریلوے دی بحالی لئی اوہناں نے کیہ کیتا اے۔ حادثیاں دی تعداد ودھی اے پر وزیر ریلوے دی پھرتیاں ای ختم نہیں ہوندیاں اوہناں نوں پلانزنوں بہتر بنان لئی اقدامات بارے جواب جمع کرانا چاہیدا اے۔ ریلوے دی کارکردگی نال عوام خوش نہیں تے نہ ای کوئی بہتری دی آس نظر آ رہی اے۔