ایران توں واپس آن والے 600توں ودھ زائرین دی سکریننگ مکمل کر لئی گئی

کراچی: سندھ حکومت نے ایران توں واپس آن والے چھ سو توں ودھ زائرین دی سکریننگ کر لئی اے، کوئی نواں مریض ساہمنے نہیں آیا۔ مشیر قنون بیرسٹر مرتضیٰ وہاب کہندے نیں شہری خوف دا شکار نہ ہون، تعلیمی ادارے پیر توں کھول دتے جان گے۔

کراچی وچ پریس کانفرنس کردیاں بیرسٹر مرتضیٰ وہاب نے دسیا کرونا وائرس دے متاثرہ مریض دی فیملی تے دوجے 28بندیاں نوں ٹیسٹ دے بعد کلیئر قرار دتا گیا اے پر مقامات مقدسہ دی زیارت لئی گئے چار سو بندے ہن وی ایران وچ نیں۔

ترجمان سندھ حکومت نے آکھیا ماسک ذخیرہ کرن والیاں دے خلاف کاروائی ہو رہی اے۔ ایس موقع تے ملک دے معروف معالج ڈاکٹر عبدالباری نے شہریاں نوں مشورہ دتا ہر بندے نوں ماسک پان دی لوڑ نہیں اے۔ اودھر سندھ حکومت نے فیصلہ کیتا اے کرونا وائرس سکریننگ دے نتائج دی بنیاد تے دو مارچ توں تعلیمی ادارے کھول دتے جان گے۔