وزیراعلیٰ سندھ نے کرونا وائرس دے کیسز ودھن دا خدشہ ظاہر کر دتا

کراچی: وزیراعلیٰ سندھ سید مراد علی شاہ آکھیا اے کرونا وائرس دے کیسز ودھن دے امکانات نیں۔ ایس مرض دا علاج اجے تک دریافت نہیں ہویا۔

سانوں بچاؤ لئی حفاظتی اقدامات کرنے ہون گے۔ کراچی وچ پریس کانفرنس کردیاں وزیراعلیٰ سندھ دا کہنا سی شہری افواہواں تے کن نہ دھرن، اسیں حقائق نہیں لُکاواں گے، ہر کیس بارے دسیا جاوے گا۔

اوہناں آکھیا چین توں آن والے 34بندیاں دا ٹیسٹ کرایا گیا سی پر کسے مسافر وچ کرونا دی تشخیص نہیں ہوئی۔ سید مراد علی شاہ آکھیا مسئلہ ٹیسٹ دی سہولتاں دا اے، اسیں روزانہ 200ٹیسٹ کر سکنے آں۔

اک ٹیسٹ دی رپورٹ آن وچ 8گھنٹے لگدے نیں۔ سندھ حکومت نے 10ہزار کٹس درآمد کر لئیاں سن، ہور کٹس وی منگواواں گے۔

وزیراعلیٰ سندھ دا کہنا سی کرونا وائرس دے کیسز ودھن دے امکانات نیں پر ضروری نہیں سب نوں ہسپتال لیایا جاوے۔ سانوں ایس مرض توں بچن لئی حفاظتی اقدامات تے عمل کرنا ہووے گا۔