ذخیرہ اندوزاں تے نجائز منافع خوراں نوں معذور بالاں دی صورت وچ سزا ملدی اے: فیاض چوہان

صوبائی وزیر اطلاعات پنجاب فیاض الحسن چوہان دا کہنا اے ذخیرہ اندوزی تے نجائز منافع خوری کرن والے تاجراں نوں اپاہج تے معذور بالاں دی صورت وچ سزا ملدی اے۔

لہور وچ کورونا وائرس دی صورتحال دے حوالے نال پریس کانفرنس کردیاں پاکستان تحریک انصاف دے رہنما تے صوبائی وزیر فیاض الحسن چوہان نے تاجراں توں اپیل کیتی کہ تاجر ذخیرہ اندوزی نہ کرن تے ہینڈ سینی ٹائزر، ماسک تے دوجے سامان نوں مہنگے ریٹاں تے فروخت نہ کیتا جاوے۔

صوبائی وزیر دا کہنا سی جہڑے لوک صرف اپنی جیب بھرن لئی لوکاں دی جان و صحت تے عزت نال کھیڈدے نیں تے صرف اپنے مفادات دا سوچدے نیں فیر اللہ تعالیٰ اوہناں نوں دنیا وچ ای اجہی سزا دیندا اے جہنوں سب ویکھدے نیں۔