ایف آئی اے نوں بی آر ٹی منصوبہ دی تحقیقات توں روکن دے حکم امتناع وچ وادھا

اسلام آباد: سپریم کورٹ نے ایف آئی اے نوں بی آر ٹی منصوبہ دی تحقیقات توں روکن دے حکم امتناع وچ وادھا کر دتا۔

عدالت نے خیبر پختونخوا حکومت نوں کیس چلان دی ہدایت کردیاں منصوبے بارے سوالات کر دتے۔ جسٹس عمر عطا بندیال نے استفسار کیتا ویکھاں گے تعمیراتی ٹھیکہ کیویں دتا گیا؟ پشاور بی آر ٹی منصوبہ کیس دی جسٹس عمر عطا بندیال دی سربراہی وچ 3رکنی بنچ نے سنوائی کیتی۔

دوران سماعت جسٹس عمر عطا بندیال نے ریمارکس دتے صوبائی حکومت دی اپیل نوں زیادہ عرصے حکم امتناع وچ نہیں رکھنا چاہندے، صوبائی حکومت بی آر ٹی کیس چلاوے۔ جسٹس عمر عطا بندیال آکھیا بطور عدلیہ منصوبے دے حوالے نال مخصوص چیزاں دا جائزہ لینا اے، منصوبے دے ڈیزائن وچ بار بار عوام دے پیسے توں تبدیلی کیتی گئی۔

منصوبے دی تکمیل وچ تاخیر دا جائزہ وی لواں گے، ویکھنا اے کہ منصوبے وچ کدھرے مفادات دا ٹکراو¿ تے نہیں؟ منصوبہ کدھرے بغیر تیاری دے شروع تے نہیں کیتا گیا؟ منصوبے وچ غلطیاں نوں وی ویکھنا اے، صوبائی حکومت نے کدھرے ادھورے منصوبے تے ارباں روپے تے نہیں لا دتے؟ شفافیت دا جائزہ وی لواں گے۔

عدالت نے خیبر پختونخوا حکومت دے وکیل ولوں التوا دی استدعا تے سماعت غیر معینہ مدت لئی ملتوی کر دتی۔