وکیلاں دا پی آئی سی تے دھاوا، وزیر اطلاعات پنجاب فیاض الحسن چوہان تے وی تشدد

لہور: لہور وچ دل دا ہسپتال میدان جنگ بن گیا، وکیلاں نے پی آئی سی تے دھاوا بول دتا، ہسپتال وچ ہنگامہ آرائی کیتی، گڈیاں دے شیشے توڑ دتے، وزیر اطلاعات پنجاب فیاض الحسن چوہان تے وی تشدد کیتا گیا، رینجر اپڑ گئی۔

لہور وچ ڈاکٹراں تے وکیلاں دے وچکار لڑائی دا معاملہ ہور گرم ہو گیا۔ وکلاء پنجاب انسٹیٹیوٹ آف کارڈیالوجی دا مرکزی بوہا توڑ کے اندر داخل ہوئے تے ایمرجنسی وارڈ وچ وڑ گئے۔

وکیلاں نے ایمرجنسی وارڈ وچ ہلڑ بازی کیتی تے گڈیاں دے شیشے توڑ دتے، نعرے بازی وی کیتی۔وکیلاں نے ہسپتال تے پتھراؤ کیتا جہدے نال 4بندے زخمی ہوئے۔

واقعے تے پلس چپ رہن دے بعد حرکت وچ آئی تے مظاہرین نوں منتشر کرن لئی آنسو گیس دی شیلنگ کیتی، لاٹھی چارج وی کیتا۔ وکیلاں دے توڑ بھن دی وجہ توں ڈاکٹراں نے کم چھڈ دتا، علاج نہ ہون تے خاتون دم توڑ گئی۔

کئی مریضاں دی حالت تشویشناک اے۔وزیراعلیٰ پنجاب نے پی آئی سی وچ وکیلاں دی ہنگامہ آرائی دا نوٹس لے لیا تے واقعے دی تحقیقات دا حکم دتا۔

عثمان بزدار آکھیا مریضاں دے علاج وچ رکاوٹ پانا مجرمانہ اقدام اے، ذمہ داراں دے خلاف سخت کاروائی ہووے گی۔ گورنر پنجاب نے وی پی آئی سی واقعہ دے ذمہ داراں دے خلاف کاروائی دا اعلان کیتا۔

اوہناں آکھیا کوئی قنون توں بالاتر نہیں۔ وائس چیئرمین پنجاب بار کونسل اسماعیل شاہ نواز نے وی وکیلاں دی ہسپتال وچ ہنگامہ آرائی دا نوٹس لیا۔ اوہناں آکھیا قنون ہتھ وچ نہیں لینا چاہیدا جہڑا وی وکلاء ملوث نیں اوہناں دے خلاف کاروائی ہووے گی۔