مریم دا ناں ای سی ایل توں کڈھن دا معاملہ، سرکار توں 7دناں وچ جواب طلب

لہور: ہائی کورٹ نے مریم نواز دا ناں ای سی ایل توں کڈھن دی عرضی تے وفاقی حکومت نوں نوٹس جاری کردیاں 7دناں وچ تحریری جواب طلب کر لیا۔

جسٹس طارق عباسی دی سربراہی وچ دو رکنی بنچ نے سماعت کیتی۔ عدالت نے وفاقی حکومت نوں ہدایت کیتی دسیا جاوے حکومت نے مریم نواز دا ناں ای سی ایل توں کڈھن دے معاملے تے کیہ پیش رفت کیتی اے۔ مریم نواز دے وکیلاں نے نشاندہی کیتی کہ درخواست گزار دے والد بیمار نیں، اوہناں دی عیادت لئی بیرون ملک جانا چاہنی آں۔

وکیلاں نے عدالت نوں ایہ وی دسیا کہ مریم نواز دا ناں ای سی ایل وچ شامل کرن دے معاملے تے وفاق نوں 7دناں وچ فیصلہ کرن دی ہدایت کیتی گئی سی پر چار ہفتیاں وچ کوئی فیصلہ نہیں ہو سکیا تے ہن وفاقی حکومت دی چٹھی ملی اے جہدے وچ مریم نواز دا ناں ای سی ایل توں کڈھن توں انکار کر دتا گیا اے۔

ہائی کورٹ دے دو رکنی بنچ نے باور کرایا کہ اجے نیب دا موقف وی سننا اے۔ عدالت نے ہور کاروائی 21جنوری تک ملتوی کر دتی۔