لہور دنیا دے محفوظ ترین شہراں دی فہرست وچ شامل

لہور: سروے دے مطابق محفوظ شہراں دی حالیہ درجہ بندی وچ لہور ، پیرس، نیویارک، برلن، شکاگو، روم تے ڈربن توں وی سبقت لے گیا اے۔ بین الاقوامی کرائم انڈیکس سروے نمبیو نے جنوری 2020دی رپورٹ جاری کیتی اے جہدے مطابق پاکستان دا شہر لہور دنیا دے محفوظ شہراں دی فہرست وچ 56درجے ترقی ہو گئی اے، سروے دے مطابق مھفوظ شہراں دی حالیہ درجہ بندی وچ لہور پیرس، نیویارک، برلن، شکاگو، روم تے ڈرن توں وی سبقت لے گیا اے۔

ورلڈ کرائم انڈیکس نمیبو دی حالیہ رینکنگ وچ لہور دا دنیا دے 374شہراں وچ 230واں نمبر اے تے سروے وچ کسے وی شہر دی درجہ بندی ودھن دا مطلب ایس شہر وچ جرائم دی شرح وچ کمی اے۔ 2019ء دے شروع وچ لہور کرائم انڈیکس سروے دے مطابق 174ویں جد کہ پچھلے ورھے دے وسط وچ 202ویں نمبر تے سی۔ نمیبو رپورٹ وچ دسیا گیا اے شہر وچ امن وامان دی مجموعی صورتحال وچ بہت بہتری آئی اے، کیپٹل سٹی پلس لہور ولوں مناسب وسائل تے فنڈز دی کمی دے باوجود نسبتاً بہتر کرائم فائٹنگ حکمت عملی اپنائی گئی۔ شہر وچ نسلی تعصب دی وجہ توں ہون والے جرائم وچ وی واضح کمی ہوئی تے شہر وچ رنگ و نسل، مذہب یاں عقیدے دی وجہ توں شہریاں تے حملہ آور ہون دا امکان نہ ہون دے برابر اے۔ رپورٹ دے مطابق 2014توں لہور تے کراچی دی محفوظ شہراں دی درجہ بندی وچ مسلسل بہتری ویکھن وچ آئی، 2014وچ لہور محفوظ شہراں دی درجہ بندی وچ 74ویں جد کہ کراچی چھویں نمبر تے سی۔