سرکار دا کرونا وائرس بارے نیشنل ایکشن پلان لانچ کرن دا فیصلہ

وفاقی حکومت نے کرونا وائرس بارے نیشنل ایکشن پلان لانچ کرن دا فیصلہ کر لیا۔ چینی شہر ووہان توں دنیا دے وکھو وکھ ملکاں وچ پھیلن والے کرونا وائرس نال ہن تک 900توں ودھ بندے ہلاک ہو چکے نیں تے ہزاراں بندیاں وچ ایس وائرس دی تصدیق ہو چکی اے۔

کرونا نال امریکا، برطانیہ، جاپان تے تھائی لینڈ سنے 20توں ودھ ممالک متاثر ہوئے نیں جد کہ پاکستان وچ وی ہن تک کئی مشتبہ مریض ساہمنے آئے نیں پر ہن تک ایہناں وچ مہلک وائرس دی تصدیق نہیں ہوئی اے۔

وفاقی حکومت نے کرونا وائرس بارے نیشنل ایکشن پلان لانچ کرن دا فیصلہ کیتا اے جہدے تے صوبیاں تے دوجے فریقین نال مشاورت کیتی جاوے گی۔ ذرائع دے مطابق کرونا ایکشن پلان دی تشکیل تے عالمی اداریاں نال مشاورت پوری کر لئی گئی اے۔ جہناں نے ایکشن پلان تے تعاون دی یقین دہانی کروائی اے۔

ذرائع نے دسیا ایکشن پلان وچ کرونا وائرس بارے حکمت عملی مرتب کیتی جاوے گی۔