جوڈیشل کمیشن دا اجلاس، جسٹس قاسم خان نوں چیف جسٹس لہور ہائیکورٹ بنان تے اتفاق

لہور: جوڈیشل کمیشن دے اجلاس وچ لہور ہائیکورٹ دے سینئر ترین جج جسٹس قاسم خان نوں چیف جسٹس لہور ہائیکورٹ بنان تے اتفاق کر لیا گیا اے۔

تفصیلات دے مطابق جوڈیشل کمیشن دا اجلاس چیف جسٹس گلزار احمد دی زیر صدارت ہویا۔ اجلاس وچ کمیشن دے سارے ممبران نے رلت کیتی۔ اجلاس وچ لہور ہائیکورٹ دے سینئر ترین جج جسٹس قاسم خان نوں چیف جسٹس لہور ہائیکورٹ بنان تے اتفاق کیتا گیا۔ جوڈیشل کمیشن نے جسٹس قاسم نوں چیف جسٹس لہور ہائی کورٹ بنان دی سفارش کرکے معاملہ پارلیمانی کمیٹی برائے ججز نوں ارسال کر دتا اے۔

موجودہ چیف جسٹس لہور ہائی کورٹ مامون رشید شیخ 18مارچ نوں ریٹائرڈ ہو جان گے جہدے بعد 19مارچ نوں جسٹس قاسم خان چیف جسٹس لہور ہائیکورٹ دے عہدے دا حلف چکن گے۔

جسٹس قاسم خان نوں کریمنل لاء تے عبور حاصل اے، اوہناں دے کئی فیصلیاں نوں عدالتی نظیر دے طور تے ویکھیا جاندا اے۔ وکلاء تنظیماں نے وی جسٹس قاسم خان دی چیف جسٹس لہور ہائیکورٹ دے عہدے تے نامزدگی نوں سراہیا تے فیصلے تے اعتماد دا اظہار کیتا اے۔