ات گردی نوں کسے مذہب، قومیت تے تہذیب نال نہیں جوڑیا جا سکدا، پاک ترک مشترکہ اعلامیہ

اسلام آباد: پاک ترک دوواں ملکاں نے چیلنجاں وچ اک دوجے دی مدد تے حمایت دے جذبے دی یاد دہانی کیتی جد کہ ات گردی تے نسل پرستانہ حملیاں تے گہری تشویش دا اظہار کیتا۔

ترک صدر دے دورے دے اختتام تے دوواں ملکاں ولوں مشترکہ اعلامیہ جاری کیتا گیا۔ اعلامیے دے مطابق دوواں ملکاں دے شاندار تعلقات نوں باہمی فائدہ مند شراکت داری نوں توسیع دین دے عزم دا اظہار کیتا گیا، دوواں ملکاں دے لازوال تعلقات دے تحفظ تے زور دتا گیا، چیلنجاں وچ اک دوجے دی مدد تے حمایت دے جذبے دی یاد دہانی کیتی گئی تے دوواں ملکاں دی لازوال دوستی دا اعادہ کیتا گیا۔

اعلامیہ دے مطابق اسلامو فوبیا دی ودھدی ہوئی لہر تے مسلماناں دے خلاف ودھدے ہوئے دہشت گردی تے نسل پرستانہ حملیاں تے گہری تشویش دا اظہار کیتا گیا، اقوام متحدہ دی سینکشنزرجیم دا دائرہ کار ودھان تے اتفاق کیتا گیا، ات گردی نوں کسے مذہب، قومیت تے تہذیب نال نہیں جوڑیا جا سکدا، ات گردی دی بنیادی وجوہات نال نبڑن تے خاص طور تے طویل مدت تصفیہ طلب تنازعات دے حل تے غیر ملکی تسلط دے خاتمے تے زور دتا گیا۔

اعلامیے وچ ات گردی دی لعنت دے خلاف لڑائی دے مشترکہ عزم دا اعادہ کیتا گیا، پاکستان ترکی ’ڈیکلریشن آف سٹرٹیجک اکنامک فریم ورک] اینڈ ایکشن پلان نوں حتمی شکل دین دا خیر مقدم کیتا گیا، پاک ترک ہائی لیول سٹرٹیجک تعاون کونسل میکانزم تے زور دتا گیا، دوواں ملکاں وچکار وزراء خارجہ دی سطح تے مشاورت دے دائرہ کار نوں توسیع دتی جاوے گی، ہائی لیول سٹرٹیجک کوآپریشن کونسل فورم نوں جاری رکھیا جاوے گا جد کہ دو طرفہ ادارہ جاتی میکانزم تے وی اتفاق کیتا گیا۔