سرکار نوں سخت ترین سائبر قوانین بنانے ہون گے: چیف جسٹس

لہور: چیف جسٹس پاکستان گلزار احمد آکھیا اے پاکستانی حکومت نوں سخت ترین سائبر قوانین بنانے ہون گے۔

لہور وچ سائبر قوانین کانفرنس نال خطاب کردیاں چیف جسٹس پاکستان گلزار احمد آکھیا دوجے ملکاں وچ وکھو وکھ سائبر قوانین موجود نیں، پاکستان وچ وی سائبر جرائم نال نبڑن لئی 2016وچ پیکا ایکٹ بنایا گیا۔

جسٹس گلزار احمد دا کہنا سی دنیا وچ سائبر جرائم تے قوانین دے حوالے نال بہت کم ہو رہیا اے، عام تاثر اے کہ کمپیوٹر یا موبائل تے فیس بک تے واٹس ایپ تے سائبر جرائم ہوندے نیں، سب توں پہلاں سمجھن دی لوڑ ہوندی اے کہ سائبر جرائم کیہ ہوندے نیں۔

چیف جسٹس پاکستان ہور آکھیا سانوں سائبر کرائمز نوں عام جرم توں ہٹ کے سمجھنا چاہیدا اے، پاکستانی حکومت نوں وی سنجیدگی دے نال ایس پاسے توجہ دین دی لوڑ اے، موبائل فون تے کمپیوٹر نوں مثبت تے منفی استعمال کرن والے دوواں طرح دے بندیاں دی کونسلنگ دی لوڑ اے، پاکستانی حکومت نوں سخت ترین سائبر قوانین بنانے ہون گے۔