شہریاں نوں سہولتاں دی فراہمی وچ کوئی کوتاہی برداشت نہیں کیتی جاوے گی: وزیراعظم

اسلام آباد: وزیراعظم عمران خان دا کہنا اے سرکاری ہسپتالاں دی انتظامیہ نوں فعال، افرادی قوت دی کمی دور تے دواواں دی فراہمی تے توجہ دتی جاوے۔ وزیراعظم عمران خان دی زیر صدارت وفاقی دارالحکومت وچ شہری سہولتاں دے حوالے نال جائزہ اجلاس ہویا، اجہدے وچ وفاقی وزیر تعلیم شفقت محمود، وزیر داخلہ اعجاز شاہ، وزیر منصوبہ بندی اسد عمر، علی نواز اعوان، خرم شہزاد ، وفاقی سیکرٹری و سینئر افسران شریک ہوئے۔ سیکرٹری صحت نے صحت دی سہولتاں دی بہتری دے اقدامات تے تفصیلی بریفنگ دیندیاں آکھیا جون تک 4کمیونٹی ہیلتھ سنٹرز تے 16بنیادی مراکز صحت نوں فعال کر دتا جاوے گا، جی 11وچ پولی کلینک 2دی تعمیر تے پمز وچ نویں ایمرجنسی وارڈ دا منصوبہ بنایا جا رہیا اے، سرائے خربوزہ وچ نویں ہسپتال دے قیام دی وی منصوبہ بندی کیتی جا رہی اے۔

وزیراعظم نے صحت دی سہولتاں دے حوالے نال شکایتاں دا سخت نوٹس لیندیاں آکھیا شہریاں نوں صحت دی سہولتاں دے ضمن وچ کسے قسم دی کوتاہی برداشت نہیں کیتی جاوے گی، سرکاری ہسپتالاں دی انتظامیہ نوں فعال، افرادی قوت دی کمی دور تے دواواں دی فراہمی تے توجہ دتی جاوے، سکولاں وچ اساتذہ دی کمی پوری کرن نوں یقینی بنایا جاوے تے تعلیم نوں ایمرجنسی سمجھدیاں ہوئیاں سارے ضروری اقدامات کیتے جان۔