ٹریپ تے گیم

لکھت:فضل حسین اعوان

پہلی جنگ عظیم وچ ماتاہری نے جاسوسی وچ بڑی شہرت پائی۔ جاسوسی لئی اپنے سراپا، حسن و جمال تے اداواں نوں وی استعمال کردی سی۔ اوہ ڈبل ایجنٹ سی، آخر کار پھڑی گئی۔ 1917ء وچ فرانس وچ اینوں گولیاں نال چھلنی کر دتا گیا۔ دوجی جنگ عظیم وچ اک ہور جاسوسہ نے وی تہلکہ مچایا ۔ ورجینیا ہال سفارتکار بننا چاہندیاں سی پر امریکہ وچ ایہناں دناں سفارتکاری دے موقعے عورتاں لئی مسدود سن۔ 1906ء وچ میری لینڈ وچ پیدا ہون والی ایہہ خاتون فرانس وچ جنگ دے دوران فوجی ایمبولینس چلاندیاں رہیاں۔ سفارتکاری دے میدان وچ آن لئی وی کوشاں رہیاں پر ایس دا ایہہ خواب ایس ویلے چکنا چور ہو گیا جدوں شکار دے دوران لت اُتے گولی لگی تے لت کٹنی پئی۔ ایس نے لکڑی دی لت لا لئی جس دا وزن تن کلو سی۔ سپین وچ ایس اُتے برطانوی خفیہ ایجنٹ دی جظر جس نے اینوں برطانیہ آن نوں کہیا۔ برطانیہ آ کے اوہ سپیشل اپریشنز ایگزیکٹو یعنی (ایس او ای) وچ شامل ہو گئی۔ورجینا نے نازیاں دے ناقابل یقین راز اڑالئے۔ اینوں نازی لیمنگ لیڈی یعنی لنگڑی خاتون کہندے سن پر انج دی لکھاں وچ اک عورت جاسوسہ نوں پھڑیا نہ جا سکیا۔ایس نے بعد وچ سی آئی اے ایجنٹ دے طور اُتے وی کم کیتا۔ 80 دی دہائی وچ امریکہ طبی موت نال ہمکنار ہون والی ورجینیا ہال دے جاسوسی دے کارنامے ایس دی موت دے بعد ساہمنے آئے ۔ ورجینیا ہال ایہناں لوکاں لئی آئیڈیل اے جیہڑے معذوری تے مجبوری دا جواز تراش کے منزل ول پیر چکن توں پہلاں سر نڈر کر دیندے نیں۔
امریکہ تے روس دے وچکار کدی جنگ نہیں ہوئی پر دونواں نے سرد جنگ وچ کوئی کسر نہیں چھڈی ۔ روس تے امریکا دے وچکار سرد جنگ بدستور جاری اے۔ روس نے 2013ء وچ امریکی مفرور سفوڈن نوں پناہ دتی۔ اوہ امریکی فوج وچ ٹنگاں تڑوا بیٹھا سی۔ ایس دے بعد قومی سلامتی دے محکمے وچ بھرتی ہویا تے ایہہ راز چوری کر کے نس گیا کہ امریکہ وچ سفارتکاراں دی کنج جاسوسی کیتی جاندی اے۔ ایڈورڈ سنوڈن اج وی امریکا نوں مطلوب اے۔ ایسے طرح روس نوں وی اک بندا مطلوب اے پر ایس دی اہمیت سنوڈن توں کدھرے زیادہ تے ایسے دی واپسی لئی روس نے جو کجھ کیتا اوہ وی حیران کن اے۔
2012ء وچ سوویت یونین دی فضائیہ دے سابق افسر وکٹربوٹ نوں امریکیاں دے قتل ، پوری دنیا وچ امریکا دے خلاف سرگرم گواہواں نوں مسلح کرن الزام اتے 25 ورھے قید سنائی سی۔ وکٹر نوں 2008ء وچ تھائی لینڈ توں گرفتار کر کے امریکا لیایا گیا۔ بنکاک وچ اینوں کجھ امریکی کولمبیائی باغیاں دے بھیس وچ ملے جیہڑا اک ٹریپ سی۔ روس نے وکٹر بوٹ نوں چھڑان دی بڑی کوشش کیتی پر لاحاصل لیکن ہن جیہڑا کجھ کیتا نظر آ ندا اے۔
کجھ دن پہلاں وسط جون وچ سابق امریکی فوج پال ویلن نوں جاسوسی دے الزام وچ 16 ورھے قید دی سزا سنائی گئی۔ اینوں 18مہینے پہلاں ماسکو دے ہوٹل توں روسی رازاں دی فلیش ڈرائیور برآمد کر کے گرفتار کیتا گیا۔امریکی وزیر خارجہ مائیک پوپیو مشتعل ہو کے روس نوں دھنکاندے وکھائی دتے۔ پال کیس وچ روسی وکیل نے ہن کہیا اے ’’اسیں پال ویلن تے وکٹر بوٹ دا تبادلہ کر سکنے آں‘‘۔ وکٹر دی باقی سزا وی اینی ای رہ گئی اے جنی ہن پال نوں دتی گئی اے۔ کیہ پال نوں ٹریپ کیتا گیا؟؟
افضل گورو نوں وی ٹریپ کر کے بھارتی پارلیمنٹ اُتیے حملے وچ رلت کیتا گیا سی جس دا اظہار افضل گورو نے 2013ء وچ پھانسی دی سزا دے موقعے اتے اپنے وکیل نوں خط وچ کیتا سی۔ افضل گورو نے کہیا سی۔ پلس انسپیکٹر دیوندرسنگھ نے مینوں اک غیر ملکی عسکریت پسند نوں دہلی لے جان، اوتھے ٹھہران تے اک گڈی خریدن اُتے مجبور کیتا سی۔ ایتھے مجبور نوں تسیں آمادہ یا ورغلایا وی آکھ سکدے او۔ بھارتی پارلیمنٹ اُتے حملہ 2001 وچ ہویا۔ ایس حملے دا الزام وی بعد وچ ممبئی پٹھان کوٹ تے پلوامہ حملیاں دی طرح پاکستان اُتے لایا گیا سی۔ دیوندر سنگھ ہن ڈی پی اے، ایس دی سکھ دے طور تے پہچان داڑھی تے وردی تے پگڑی نال ہوندی اے۔ کشمیری حریت پسند ایس دے ٹریپ وچ آسانی نال اینوں خالصتان دا حامی سمجھ کے آ جاندے نیں ۔ دیوندر سنگھ نوں ایس ورہے جنوری وچ گرفتار کیتا گیا۔ پلوامہ حملہ دے دوران ایس دی ڈیوٹی پلوامہ پولیس ہیڈ کوارٹر وچ سی۔ پولیس نوں خبر ملی کہ حزب المجاہدین دے کمانڈر سید نوید عرف بابو آصف سری نگر توں جموں جا رہے نیں۔ ایہہ چوں کے وڈا ہدف سی تے رستے وچ قاضی گنڈ شہر دی چیک پوائنٹ اُتے ڈی آئی جی اٹل گوئل بہ نفس نفیس اپریشن وچ شریک ہوئے۔بی بی سی دے مطابق گڈی روکی گئی تے ایس وچوں اک نے اپنا تعارف ڈی ایس پی دیوندر سنگھ تے ساتھیاں دے باڈی گارڈدے طور تے کرایا پر اٹل گوئل نے گرفتاری دا حکم دے دتا۔ ایس اُتے دیوندر نے کہیا ’’سر ایہہ گیم اے تسیں گیم نوں خراب نہ کرو۔‘‘ پر ڈی آئی جی نے تھپڑ ماردے ہوئے وین وچ بیٹھن دا حکم دتا۔پلس ریکارڈ وچ ندیوندر مجاہدین (بھارت دی نظر وچ دہشتگرد) نوں اک توں دوجی تھاں منتقل کردا تے پاکستان توں دراندازیاں نوں سہولتاں فراہم کردا سی جیہڑا قاضی گنڈ وچ رنگے ہتھوں پھڑیا گیا۔ انڈین ناردرن کمانڈ چیف دا خانساماں اک پاکستانی مبینہ جاسوس دے طور پھڑیا گیا سی جنہوں حکام نے اشتعال وچ آ کے کریشر وچ پیسن دا حکم دے دتا۔
اے راہ حق کے شہیدو وفا کی تصویرو
تمہیں وطن کی ہوائیں سلام کہتی ہیں
دیوندر سنگھ بظاہر جیہڑا کجھ کر رہیا سی اوہ بھارت دے مفاد اُتے کاری ضرب تے مودی سرکار دی نظر وچ کریشر وچ پسے جان دی سزا دا مستوجب سی پر ایس دی 20 جون نوں ضمانت ہو گئی۔ مجاہدین دیوندر سنگھ دے ٹریپ وچ آندے رہے تے اوہ واقعی اک گیم سی جیہڑی ڈی آئی جی گوئل نے لاعلمی وچ خراب کر دتی۔ پر ہن کوئی ہور دیوندر فالس فلیگ اپریشن دا جواز پیدا کرن لئی سازش بن رہیا تے ٹریپ تیار کر رہیا ہوئے گا۔