ایل این جی کیس: شاہد خاقان تے فرد جرم لاگو کرن دی کاروائی موخر

اسلام آباد: احتساب عدالت نے نیب نوں 6اگست تک ایل این جی کیس وچ ضمنی ریفرنس دائر کرن دا حکم دیندیاں مقدمے وچ نامزد ملزم سابق وزیراعظم شاہد خاقان عباسی تے فرد جرم لاگو کرن دی کاروائی موخر کر دتی۔ اسلام آباد دی احتساب عدالت وچ ایل این جی کیس دی سنوائی ہوئی۔ قومی احتساب بیورو (نیب) ولوں اک وار فیر ایل این جی ضمنی ریفرنس دائر کرن لئی ویلا دین دی استدعا کیتی گئی تے موقف اپنایا گیا نواں ریکارڈ ملیا، ضمنی ریفرنس تیاری دے آخری مرحلیاں وچ اے۔ عدالت نے نیب پراسیکیوٹر دی استدعا منظور کردیاں حکم دتا کہ قومی احتساب بیورو 6اگست تک ضمنی ریفرنس دائر کرے، شاہد خاقان عباسی تے فرد جرم دی کاروائی وی ضمنی ریفرنس دائر ہون تک موخر کر دتی گئی۔ عدالت دے باہر میڈیا نال گل کردیاں شاہد خاقان آکھیا قومی احتساب بیورو پچھلے دو سال توں صرف سوالنامے دے رہیا اے، بغیر کسے جواز دے گرفتار کیتا گیا، 70دن نیب نے ریمانڈ لیا پر ایس دوران اک سوال تک نہیں پچھیا گیا، مجموعی طور تے 8مہینے تک قید وچ رکھیا گیا۔سابق وزیراعظم آکھیا کوئی شہادت نہیں، کوئی کیس نہیں بس دباء ودھان تے سیاستداناں نوں بدنام کرن لئی نیب نوں استعمال کیتا جا رہیا اے، جہڑا سوال کیتا، جہڑا کاغذ منگیا، اسیں مہیا کیتا۔ اوہناں نے چیلنج کیتا کہ نیب نے جہڑی تفتیش کرنی اے ٹی وی کیمرہ لا کے تفتیش کرے، عدالتی کاروائی وی کیمرے لا کے ہونی چاہیدی اے۔