کرونا وچارہ کی کرے

empty profile female

لکھت:راحت وفا راجپوت

اک عورت دا شوہر ملک توں باہر چلا گیا تے اہ ہنے محلے دے کریانے والے دے نال دوستی کر لیٔ تا کہ سودا مفت ملدا رہے َکریانے والا وی مفت سودا سلف اہدے گھر بھیجدا رہیا تے نالے لوکاں کولوں لک کے ملاقاتاں وی کردا رہیا ِ اک سال بعد اس عورت دا شوہر واپس آگیا دوسرے دن شوہر نے کریانے والے نوں بلایا تے سودے داحساب کتاب پچھیا کریانے والے نے اپنا کھاتے والا رجسٹر اہہدے سامنے رکھیا تے پورے سال وچ جناں سودا آیا گھر آیا سی اہہدے پیسے دس دتے ۔بیوی شوہر نے بیوی نوں پچھیا کہ ایہہ حساب ٹھیک اے ،بیوی شوہر سامنے کج وی نہ کہہ سکی تے ہاں وچ سر ہلا دتا ۔شوہر نے بیوی توں پیسے پھڑاے ،
اوس عورت تے پیسے کریانے والے دے ہتھ وچ پھڑاے تے آکھیا
اے پھڑ پورے سال دے سودے دے پیسے ، تے دوجا حساب تینوں اللہ ای پچھے ،
بلکل ایہو ای ۔۔ ہتھ ۔۔ پاکستانی عوام نال ہویا اے عمران خان نوں ووٹ دتے سن کہ حالات بدلن گے نواں پاکستان بنے گا غریباں دے چلے بلدے رہن گے خان صاحب نے وی چنگے لارے لایے مٹھیاں مٹھیاں گلاں کر کے سب نوں پچھے لا لیا ، تے عوام اکھاں وچ سنہری خواب سجا کے خان صاحب نوں تکن لگ پیٔ ،تے جدوں پہلا جھٹکا لگا تے عوام ڈگدیاں ڈگدیاں رہ گیٔ کہ نواں نواں کم اے کج ٹایٔم تے لگدا اے نا پر فیر ہویا اے کہ ۔۔
چوراں دی پگ سادھاں لا لیٔ
چار چوفیرے پے گیا شور
ایتھے ایڈی انی پے گیٔ
چور وی آکھن چور چور ،
خان صاحب نے جہڑی پارٹیاں دی ،، متنجن ،، پکایٔ سی او چول اینے پرانے سن کہ ،، متنجن وچوں چھیتی ،، بو ۔آن لگ پیٔ اونج وی اہ چول ہر دیگ وچ پک پک کے سڑے ہوے نیں اسمبلی وچ اچھل اچھل کے اینج اک دوجے نال لڑ دے نیں کہ عوام سوچی پے جاندی کہ اسی تے انساناں نوں ووٹ دتے سن ، اے کیڑی مخلوق اے منہگا یٔ نے عوام دی مت مار دتی اے خان صاحب دی ہر گل وکھری اے اک بیان دوجے نال نیں رلدا اج اک گل کہندے نیں تے اگلے دن اوہو ای گل ہور طراں آکھدے نیں ۔تے جہڑے وزیر مشیر رکھے نیں اووی ،،
میری بکل دے وچ چور ،
والا ای حساب اے
ایہناں جراحاں نے کیہہ علاج کرنا؟
مرہم ایس پاسے پھوڑا اوس پاسے
اساں منزل مقصود تے پہنچنا کیہہ ؟
ٹانگہ ایس پاسے …گھوڑا اوس پاسے ،
خان صاحب عوام نوں جھٹکے تے جھٹکا دے رہے سن تے عوام اوس ویلے نوں یاد کر کر کے روندی پیٔ سی جدوں تبدیلی دے ٹرک والی بتی دے پچھے لگ گیٔ سی ۔تے فیر اے ہویا کہ ،، کرونا ، آگیا
ایس معاملے وچ وی خان صاحب نے عوام نوں چکر وچ پایٔ رکھیا جدوں ساری دنیا وچ تیزی نال پھیل رہیا سی اوہدوں اے ،، راگ بجایٔ جا رہے سن کہ ساڈے ملک وچ اوہنا خطرہ نیں ساڈے حالات دوسرے ملکاں نالوں بہتر نیں گھبراو نہ ،تے ساڈی عوام اگے ای گھبران توں بچدی اے ایس لیٔ عوام ایہو ای سوچدی رہی کہ وزیر صاحب کہہ رہے نیں کہ حالات ساڈے کنٹرول وچ نیں تے فیر گھبران دی ضرورت ای نیں جدوں ملک وچ خطرہ ہووے تے حکومتاں عوام دی مدد کر دیاں نیں تے ساڈے وزیر جی نوں منگن دی ایسی عادت پے گیٔ اے کہ او کسے ویلے وی تے کسے کولوں وی امداد منگن لگ پیندے نیں دوسرے ملکاں وچ گھر گھر روٹی پچایٔ گیٔ تے ساڈے ملک وچ گھر گھر توں امداد منگی گیٔ سرکاری ملازماں دیاں تنخواواں کٹیاں گیاںتے سیاست داناں نے دیھاڑیاں لا ایاں جدوں کرونا کیس ودن لگ پیٔے تے لاک ڈاون کھول دتا تے فیر اک دم ای کیس مرن والے ہزاراں تے ، تے بیمار لکھاں تک پہنچ گیٔے عوام اک واری فیر ہکا بکا رہ گیٔ ، ادھ وچکار لیا کے ہن خان صاحب نے جواب دے دتا اے کہ ،حالات ہن ساڈے وس وچ نیں رہے سوال اے وے کہ جدوں باہروں امداد ملنی شروع ہویٔ تے حالات خراب ہون لگ پیے ایس سال دا بجٹ وی اپنی مرضی دا بنایا تے غریباں نوں ہور سولی تے چڑھایا نہ اسمبلی دے ممبران دی مراعات کٹ کیتیاں تے نہ اپنی شاہ خرچیاں ۔ٹیکس تے ٹیکس لا یٔ جا رہے نیں تے عوام روندی پیٔ اے آٹا چینی دالاں ، سبزیاں ہر چیز غریب دی پہنچ توں دور نیں ۔تے پٹرول جدوں ساری دنیا وچ سستا سی تے ایتھے غایٔب ای ہو گیا تے جدوں مہنگا ہویا تے راتوں رات پاکستان وچ مہنگا ہو گیا ، کویٔ خدا دا خوف نیں کسے نوں اللہ نوں جواب دین دا ڈر نیں ۔
لایٔ کھیس جاناں اے تے کھچی دری جاناں اے
ایہہ کی کری جاناں ایں ایہہ کی کری جاناں ایں ؟
کرونا جدوں نیں سی آیا تے اوہدوں وی عوام دا ایہو ای حال سی تے ہن وی حال مندا ای اے بلکہ بے روز گاری نے ، کریپشن نے ،ٹیکساں نے تے اہل اقتدار دی بے حسی نے عوام نوں زیدہ در گور کر دتا اے تے حضرت واصف علی واصف فرما ندے نیں ،
جے اتے ،، گدھ ،، ہون تے سمجھ لوو تھلے ،، مردار ،، اے ۔
ایس نیم جاں قوم نوں مارن واسطے کسے کرونا دی نیں لوڑ ، کیونکہ ساڈی اسمبلیاں وچ بیٹھے خود غرض وزیراں مشیراں نوں ویکھ کے کرونا وی حیران اے ۔کہ ایڈا ظالم تے میں وی نیں تے ہن فیر
کرونا وچارہ کی کرے ؟ تے ٹھنڈا پانی پی مرے ،
خان صاحب نے آکھیا سی ، میں ایناں نوں بہت رلاواں گا تے ویکھ لوو اپنی گل تے پکے رہے نیں ، سب روندے پیٔے نین ،
تینوں شوق سی سانوں رولن دا
آ ویکھ تے سہی اسی رل گیٔے آں …

اپنا تبصرہ گھلو