پِلاک دے پربندھ ہیٹھ پروفیسر راشد حسن رانا ہوراں دا تعزیتی ریفرنس

رپورٹ:علی قیصر

پنجاب انسٹیٹیوٹ آف لینگوئج، آرٹ اینڈ کلچر (پِلاک)، محکمہ اطلاعات و ثقافت، پنجاب دے زیر اہتمام معروف شاعر ، محقق تے استاد پروفیسر راشد حسن رانا دی یاد وچ آن لائن تعزیتی ریفرنس دا انعقاد کیتا گیا جس وچ ہارون عدیم، ڈائریکٹر اکیڈمی آف لیٹرز لہور عاصم بٹ، رانا اسلام، خاقان حیدر غازی، محمد عاصم چودھری تے ڈائریکٹر جنرل پلاک ڈاکٹر صغرا صدف نے اظہار خیال کیتا۔مقررین نے کہیا کہ راشد حسن رانا بطور پروفیسر قائداعظم یونیورسٹی اسلام آباد وچ اپنی خدمات سرانجام دیندے رہے نیں۔ اوہ اپنے شاگرداں نوں ہمیشہ حق دا ساتھ دین دی تلقین کردے، جمہوریت دے زبردست حامی، دوستاں دے نال انتہائی مخلص ، خوش گفتار، خوش لباس تے زندہ دل انسان سن۔

اکادمی ادبیات دے ممبر وی رہے۔ ابرار الحق وی ایہناں دے شاگرداں وچوں نیں۔ اپنی دھرتی تے فطرت نال پیار کرن والے نویں اسلوب دے شاعر سن ایہناں دی شاعری دی کتاب،چپ چپیتی،ادبی حلقیاں وچ کافی مقبول ہوئی۔ مشہور بزرگ صوفی برکت علی دے مرید سن۔ ہارون عدیم نے کہیا کہ میں تقریباً چھ ورہے تیکر ایہناں دا ہمسفررہیا۔ اسلام آباد توں لہور مل کے آندے، انڈیا وی مل کے گئے۔ اوہ بذلہ سنج تے فراخ دل انسان سن، دوستاں اُتے خرچ کرن وچ کدی بخل توں کم نہیں لیندے سن۔ عاصم بٹ نے کہیا کہ اوہ ہمیشہ کسر نفسی نال کم لیندے سن کدی شہرت دے پچھے نہیں نسے۔

ایہناں دے جان نال پنجابی زبان چنگے شاعر توں محروم ہو گئی اے۔ ایہناں دے شاگرد رانا اسلام نے کہیا کہ آپ ہوری نہایت شفیق استاد سن، کدی کسے نال سختی نال پیش نہیں آئے، اینے خوبصورت انداز وچ گل کردے کہ گلاں ای گلاں وچ نظم بنا دتا کردے۔ ہمیشہ چنگا لباس پاندے، شاگرد ہون دے ناطے میں ایہناں دی خدمت لئی ہمیشہ اپنا دامن ودھائے رکھیا۔ زندگی دے آخری دو ورہے اپنے پتر جلال دے ایکسیڈنٹ دے صدمے نال نسیان دے عارضہ وچ مبتلا رہے۔ خاقان حیدر غازی نے کہیا کہ اوہ جدید نظم لکھن وچ خاص مہارت رکھدے سن۔ جدید خیالات نوںاچھوتے انداز وچ پیش کرن وچ ماہر سن۔ ڈائریکٹر جنرل پلاک ڈاکٹر صغرا صدف نے دسیا کہ پلاک دی طرفوں راشد حسن رانا نوں ایہناں دی ادبی خدمات دے اعتراف وچ پرائیڈ آف پنجاب ایوارڈ نال نوازیا گیا۔ اوہ اکثر پلاک دی تقریبات دی زینت بن دے رہندے سن۔ ہر دانشور تے ادیب دی طرح ایہناں دے جان نال جیہڑا خلاء پیدا ہویا اے اوہ کدی پُر نہیں ہو سکے گا۔ تقریب وچ میزبانی دے فرائض ڈائریکٹر پلاک محمد عاصم چوہدری نے سرانجام دتے تے ایہناں دی شاعری وی پڑھ کے سنائی۔