ساڈے قائد نوں کسے قسم دا نقصان اپڑیا تے آخری حد تک جاواں گے: خواجہ آصف

اسلام آباد: مسلم لیگ (ن) دے سینئر رہنما خواجہ آصف آکھیا اے اسیں سیاسی دشمنی نوں ذاتی وچ نہیں بدلنا چاہندے، ساڈے قائدنوں کسے قسم دا نقصان اپڑیا تے آخری حد تک جاواں گے۔

قومی اسمبلی نال اپنے دھواں دار خطاب وچ خواجہ آصف آکھیا سابق وزیراعظم نوازشریف حکومت نہیں سگوں عدالتی فیصلے نال لندن گئے۔ لندن وچ جہناں نے احتجاج کیتا، ویلا آن تے سب دے ناں دساں گا۔ اوہناں آکھیا لندن وچ حملے دی کوشش کیتی گئی۔

ماضی وچ کدی انج نہیں ہویا، ایہ خطرناک روایت اے۔

ایہ سلسلہ شروع ہو گیا تے بند نہیں ہووے گا۔ نوازشریف یاں کسے ہور سیاستدان دے گھر دا تقدس پامال ہووے گا تے آخری حد تک جاواں گے۔ خواجہ آصف دا کہنا سی ساڈی سیاسی روایتاں وچ اجہی چیزاں شامل نہیں، ایہ چیزاں چار توں پنج ورھے وچ سیاست وچ متعارف کرائیاں گئیاں۔

گھراں دے تقدس نوں پامال نہیں کرنا چاہیدا۔ ایس طرح دے رویے نال تعاون نہیں سگوں سانوں جنگ دا پیغام دتا جا رہیا اے، فیر ایہ سارا سسٹم لپیٹا جا رہیا اے۔ اسیں اپنے ورکراں نوں کسے دے گھر دے باہر مظاہرے دی ہدایت نہیں دیواں گے۔