وزیراعظم سنے کئی وزراء مریم نواز نوں بیرون ملک جان دی اجازت دین دے مخالف

اسلام آباد: کابینہ اجلاس دے دوران وزیراعظم سنے کئی وزیراں نے مریم نواز دا ناں ای سی ایل توں کڈھن دی مخالفت کر دتی اے۔

وزیراعظم عمران خان دی سربراہی وچ وفاقی کابینہ دا اجلاس ہویا۔ جہدے وچ دوجے امور دے علاوہ مریم نواز دی بیرون ملک روانگی دی اجازت دا معاملہ وی زیر غور آیا۔

اجلاس دے دوران وفاقی وزیر فیصل واوڈا نے مریم نواز دی بیرون ملک روانگی دی مخالفت کیتی، اوہناں آکھیا سرکار کسے صورت مریم نواز دا ناں ای سی ایل توں نہ کڈھے۔

وزیراعظم عمران خان سنے کئی وزیراں نے وی فیصل واوڈا دی رائے نال اتفاق کیتا۔ واضح رہوے کہ لہور ہائی کورٹ نے وفاقی حکومت نوں اک ہفتے وچ مریم نواز دا ناں ای سی ایل توں کڈھن بارے فیصلہ کرن دا حکم دے رکھیا اے۔