نعت شریف

عبدالحمیدنظامی

میں کیتی بڑی صلاح نعلین پاک تے لکھاں
دل جان توں ہر طرح نعلین پاک تے لکھاں
سرکار دے پاک نعلین ہِن کنیاں شاناں والے
ہر لفظ دی کر شرح نعلین پاک تے لکھاں
کِس دتیاں نے چھڑا سب غزلاں نظماں میتھوں
کِس کیتی اے اصلاح نعلین پاک تے لکھاں
کس کڈھ دتی اے دوئی لا نفی اثبات اوزار
ایہہ دسیا کیس جراح نعلین پاک تے لکھاں
ایہ مولائی جہی سوچ کس کیتی آن عطا اے
ہو جاوے ہور فلاح نعلین پاک تے لکھاں
لگیا انج نظامی کجھ ہستیاں پاکاں آئیاں
ایہہ آکھن پاک ارواح نعلین پاک تے لکھاں