سینیٹ الیکشن وچ اپوزیشن ساڈے لوکاں نوں خریدنا چاہندی اے: وزیراعظم

غازی بروتھا( پنجابی میڈیا گروپ) وزیراعظم عمران خان نے آکھیا اے سینیٹ الیکشن وچ سیاستداناں نوں خریدن لئی منڈی لگی ہوئی اے۔ غازی بروتھا شجر کاری مہم دی تقریب نال خطاب کردیاں وزیراعظم عمران خان آکھیا درخت مستقبل لئی ضروری نیں، موسمیاتی اثرات نوں گھٹ کرن لئی بلین ٹری منصوبے نوں کامیاب کرنا ہووے گا، بدقسمتی نال ماضی وچ اسیں درخت لاؤن تے توجہ نہیں دتی، ماضی وچ جنگلات نوں بے دردی نال ختم کیتا گیا۔عمران خان نے آکھیا ماضی وچ کرپٹ لوکاں نے صرف پیسا چوری نہیں کیتا بلکہ دیس دی اخلاقیات وی تباہ کر دتیاں، ایہ چیز کرپشن توں ودھ خطرناک اے، کوئی اک مثال وکھا دیو کہ کوئی دیس خوشحال وی ہووے تے اوتھے کرپشن وی ہووے، دیس نوں پٹواریاں، سرکاری ملازماں تے تھانے داراں دی کرپشن تے رشوت خوری توں عوام پریشان ضروری ہوندے نیں پر ایہدے نال ملک تباہ نہیں ہوندا بلکہ ملک تباہ اودوں ہوندا اے جدوں اوہدا وزیراعظم تے وزراء کرپشن کرنا شروع کر دین، عمران خان دا کہنا سی سینیٹ الیکشن دا تماشا ویکھ رہے آں، منڈی لگی اے، سینیٹر بنن لئی سیاستداناں نوں خریدن لئی قیمتاں لگ رہیاں نیں، 30سال توں ایہ ہو رہیا اے تے سبھ نوں پتہ اے، جدوں اسیں کہنے آں کہ سیاسی جماعت دا رکن اسمبلی دسے کہنوں ووٹ دے رہیا اے تے اپوزیشن جماعتاں کہندیاںنیں اوپن نہیں خفیہ ووٹ دیو، پہلاں تے سبھ کہندے سن اوپن بیلٹ ہونا چاہیدا اے تے فیر تبدیلی کدھروں آئی اے۔