خصوصی عدالتاں ویلے دی لوڑ اے ،:گورنر پنجاب

لہور(پنجابی میڈیا گروپ )سرکار پنجاب نے جلد توں جلد بیرون ملک مقیم پاکستانیاں نوں انصاف دی فراہمی یقینی بنان لئی خصوصی عدالتاں قائم کرن دا فیصلہ کرلیا۔ اوورسیز پاکستانی ویڈیو لنک دے ذریعے اپنے مقدمات وچ بیانات ریکارڈ کرن دی اجازت دین سنے تجاویز اتے وی غور کیتا جارہیا اے۔ گورنرپنجاب چوہدری محمد سرور نے بیرون ملک مقیم پاکستانیاں دے مسائل حل کرن تے گورنرہائوس وچ ایہناں دے کیسز لئی خصوصی عدالتاں دے قیام توں متعلق اک اجلاس دی صدارت کیتی۔ اجلاس وچ پنجاب دی ایڈیشنل چیف سیکریٹری (اے سی ایس) ارم بخاری، لا سیکریٹری بہادر علی خان، ڈسٹرکٹ جوڈیشری ڈائریکٹر جنرل سعید اللہ مغل، لہور ہائی کورٹ دے ڈپٹی رجسٹرار تے پنجاب اوورسیز کمشنر عارف جاوید، اوورسیز کمشنر خادم عباس، وائس چیئرمین اوورسیز پاکستانیز کمیشن، پنجاب وسیم، ڈی جی اوورسیز عشرت اللہ، ڈائریکٹر لیگل اوورسیز کمیشن راجہ زبیر تے پرنسپل سیکرٹری برائے گورنر ڈاکٹر راشد منصور نے شر کت کیتی۔اے سی ایس ارم بخاری نے اجلاس دے شرکا نوں دسیا کہ سارے محکمے بیرون ملک مقیم پاکستانیاں دے مسائل دے حل لئی مل کے کم کر رہے نیں۔ ایس سلسلے وچ خصوصی عدالتاں دے قیام سنے کسی وی تعاون لئی تیار آں۔ گورنرپنجاب چودھری ہوراں نے مزیدآکھیا اے کہ خصوصی عدالتاں داقیام ویلے دی لوڑ اے ،بیرون ملک پاکستانی قوم دا اثاثہ نیں۔اوہناں نے آکھیا بیرون ملک مقیم پاکستانیاں دے مقدمات تاخیر دا شکار نہ ہون تے ہر کیس دے فیصلے لئی اک مخصوص ٹائم فریم ہووے گا۔