تحریک لبیک دے خلاف کارروائی انسداددہشت گردی قنون دے تحت کیتی: وزیراعظم

اسلام آباد( پنجابی میڈیا گروپ) وزیراعظم عمران خان ہوراں آکھیا کہ تحریک لبیک دے خلاف کارروائی انسداددہشت گردی قنون دے تحت کیتی۔
وزیراعظم عمران خان نے سماجی رابطے دی ویب سائٹ ٹوئٹراُتے آکھیا کہ اوہ عوام نوںایہ واضح کردئیے کہ حکومت نے تحریک لبیک دے خلاف کارروائی انسداددہشت گردی قنون دے تحت کیتی۔
وزیراعظم ہوراں آکھیا کہ ٹی ایل پی دے خلاف کارروائی ایس لئی کیتی کیونکہ اوہناں نے ریاست دی رٹ نوںچیلنج کیتا تے سڑکاں اُتے تشدد کرن سنے عوامی تے قنون نافذ کرن والیاں اُتے حملہ کیتا۔ ایس تناظروچ کوئی وی قنون تے آئین توں بالاترنہیں ہوسکدا۔
ایس توں پہلاںوزیراعظم ہوراں آکھیا کہ بیرون ملک اسلاموفوبیا تے نسل پرستی وچ ملوث انتہا پسند سن لین حضوراکرمۖ ساڈے دلاں وچ وسدے نیں، بیرون ملک انتہا پسند اک ارب30کروڑمسلماناں دے جذبات نوںٹھیس پہنچاندے نیں، مسلمان سب توں ودھ پیار تے احترام حضوراکرمۖ دا کردے نیں، اسیں بے حرمتی نوں برداشت نہیں کراں گے۔
وزیراعظم ہوراں ہور وی آکھیا کہ مغربی دنیا نے ہولوکاسٹ دے بارے وچ کسی وی منفی تبصرے اُتے پابندی لگائی، مغرب نال مطالبہ کردا واں کہ اوہ توہین رسالت کرن والیاں لئی یہی معیاراپنان، مسلماناں دے خلاف نفرت انگیزپیغامات پھیلان والیاں لئی وی سزا دا یہی معیار ہونا چاہیدا۔